လုံခြုံရေးတပ်ဖွဲ့ဝင်တွေ လက်ချက် ကလေးငယ်တွေ ထိခိုက်သေဆုံးမှု ကုလထပ်မံသတိပေး

မန္တလေးမြို့ ဆန္ဒပြပွဲ မြင်ကွင်း။

မြန်မာနိုင်ငံမှာ စစ်တပ်က အာဏာသိမ်းတာကို ဆန့်ကျင်တဲ့ ဆန္ဒပြလှုပ်ရှားမှုတွေကို လုံခြုံရေးတပ်ဖွဲ့တွေ နှိမ်နင်းရာမှာ ကလေးငယ်တွေပါ ထိခိုက်သေဆုံးနေတဲ့အပေါ် ကုလသမဂ္ဂက ထပ်မံသတိပေးလိုက်ပါတယ်။

ဆန္ဒပြပွဲတွေမှာ ကလေးတွေအပေါ် လုံခြုံရေးတပ်ဖွဲ့တွေ အင်အားအလွန်အကျွံ အသုံးပြုနေတဲ့အပေါ် ကလေးငယ်များ အရေးပေါ် ရန်ပုံငွေအဖွဲ့ (Unicef) အနေနဲ့ အလွန်အမင်းစိုးရိမ်ကြောင်း ဗုဒ္ဓဟူးနေ့က ထပ်မံပြောဆိုလိုက်တာပါ။

ပြီးခဲ့တဲ့ တနင်္လာနေ့က ကချင်ပြည်နယ်၊ မြစ်ကြီးနားမြို့မှာ လုံခြုံရေးတပ်ဖွဲ့တွေ လက်ချက်ကြောင့် ကလေးငယ်တဦး အပြင်းအထန် ဒဏ်ရာရခဲ့သလို၊ ၅ နှစ်အရွယ် ကလေးငယ် တဦးဟာလည်း လေးခွနဲ့ ပစ်ခတ်ခံခဲ့ရတာကြောင့် ဒဏ်ရာအပြင်းအထန်ရခဲ့တယ်လို့လည်း ပြောပါတယ်။

ပြီးခဲ့တဲ့ စနေနေ့မှာတုန်းကလည်း မန္တလေးညမို့မှာ လုံခြုံရေးတပ်ဖွဲ့တွေ လက်ချက်နဲ့ ကလေးတဦး သေဆုံးခဲ့တာပါ။ လုံခြံုရေး တပ်ဖွဲ့တွေ အနေနဲ့ ကလေးငယ်တွေနဲ့ လူငယ်တွေကို ကာကွယ်စောင့်ရှောက်ဖို့နဲ့ အကြမ်းဖက်မှုကို ရှောင်ကျဉ်ပြီး ထိန်းထိန်းသိမ်းသိမ်း ဆောင်ရွက်ဖို့လည်း တောင်းဆိုထားပါတယ်။

ကလေးသူငယ် အခွင့်အရေးများဆိုင်ရာ ကုလသမဂ္ဂ သဘောတူညီချက်စာချုပ် (CRC) နဲ့ ၂၀၁၉ ခုနှစ်က မြန်မာနိုင်ငံ ကလေးသူငယ်အခွင့်အရေးများဆိုင်ရာ ဥပဒေအရ အပ်နှင်းထားတဲ့ အခွင့်အရေးတွေ အားလုံးကို တာဝန်ရှိသူတွေ စောင့်ထိန်းလိုက်နာဖို့လည်း ထပ်မံသတိပေးထားပါတယ်။ မြန်မာနိုင်ငံမှာ ဒီလဆန်းကပဲ အရပ်သားအစိုးရကို ဖယ်ရှားပြီး စစ်တပ်က အာဏာသိမ်းလိုက်တဲ့အပေါ် နိုင်ငံအဝန်း ကန့်ကွက်ဆန္ဒပြပွဲတွေ ပေါ်ပေါက်နေပြီး၊ ဆန္ဒပြလှုပ်ရှားမှုတွေကိုလည်း အာဏာပိုင်တွေ အင်အားသုံး ဖြိုခွင်းမှုကြောင့် ထိခိုက်သေဆုံးသူတွေလည်း ရှိနေပါတယ်။

ဗွီအိုအေ (မြန်မာပိုင်း)

https://burmese.voanews.com/a/myanmar-unicef-concern-/5792001.html