မြန်မာလူထုဆန္ဒပြမှု အမေရိကန်သံအမတ်ကြီးအားပေးထောက်ခံ

မြန်မာနိုင်ငံဆိုင်ရာ အမေရိကန်သံအမတ်ကြီး Thomas Vajda။ (နိုဝင်ဘာ ၂၀၊ ၂၀၁၇)

မြန်မာနိုင်ငံမှာ ဒီမိုကရေစီနည်းလမ်းကျ ရွေးကောက်တင်မြောက်ခံထားရတဲ့ အစိုးရကို ထောက်ခံကြောင်းနဲ့ သတင်းအချက်အလက်တွေ လွတ်လပ်စွာရရှိနိုင်ဖို့ တောင်းဆိုတဲ့ မြန်မာပြည်သူတွေရဲ့ ဆန္ဒပြမှုကို အမေရိကန်က အားပေးထောက်ခံတယ်လို့ မြန်မာနိုင်ငံဆိုင်ရာ အမေရိကန်သံအမတ်ကြီး Thomas Vajda ကပြောကြားပါတယ်။ စစ်တပ်အနေနဲ့ အာဏာသိမ်းယူထားတာကို စွန့်လွှတ်ဖို့ ဒီမိုကရေစီနည်းကျ ရွေးကောက်တင်မြှောက်ထားတဲ့ အစိုးရလက် အာဏာပြန်ပေးဖို့၊ ဖမ်းဆီးထားသူတွေအားလုံးကို ပြန်လွှတ်ပေးဖို့၊ သတင်းနဲ့ဆက်သွယ်ရေး ကန့်သတ်ချက်အားလုံးကို ဖယ်ရှားပေးဖို့နဲ့ အကြမ်းဖက်လုပ်ရပ်တွေ မလုပ်ဖို့ အမေရိကန်ပြည်ထောင်စုက ထပ်မံတောင်းဆိုတဲ့အကြောင်း သံအမတ်ကြီး Vajda ရဲ့ ထုတ်ပြန်ချက်ကို အမေရိကန်သံရုံးရဲ့ Facebook စာမျက်နှာမှာ ဖော်ပြထားပါတယ်။

မြန်မာနိုင်ငံမှာ စစ်တပ်က အာဏာသိမ်းယူပြီး ဒေါ်အောင်ဆန်းစုကြည်အပါအဝင် အရပ်သားအစိုးရခေါင်းဆောင်တွေကို ဖမ်းဆီးထားတာကို ကန့်ကွက်တဲ့အနေနဲ့ နိုင်ငံတကာမှာလည်း ဆန္ဒပြပွဲတွေ ပြုလုပ်နေကြပါတယ်။ အမေရိကန်ပြည်ထောင်စုမှာဆိုရင် ဝါရှင်တန်မြို့တော် မြန်မာသံရုံးရှေ့၊ မြောက် Carolina ပြည်နယ်၊ Charlotte မြို့တော် မြို့တော်ခန်းမရှေ့၊ Indiana ပြည်နယ်၊ Indianapolis မြို့တော်က World War Memorial Plaza အထိမ်းအမှတ်နေရာ၊ Texas ပြည်နယ် Austin မြို့ ပြည်နယ်လွှတ်တော်အဆောက်အဦးရှေ့၊ San Francisco မြို့က ကုလသမဂ္ဂ UN Plaza ရှေ့ စတဲ့ နေရာစုံမှာ စနေနေ့က ဆန္ဒပြပွဲတွေ ရှိခဲ့ပါတယ်။

တခြားနိုင်ငံတွေမှာ ရောက်နေကြတဲ့ မြန်မာတွေကလည်း မြန်မာပြည်သူတွေနဲ့ တသားထဲဖြစ်တယ်ဆိုတာ ပြသတဲ့အနေနဲ့ သက်ဆိုင်ရာနိုင်ငံတွေရဲ့ ည ၈ နာရီအချိန်မှာ သံပုံးတွေ တီးနေကြပါတယ်။ ဗြိတိန်နိုင်ငံက မြန်မာလူမျိုးတွေ စနေနေ့တုန်း Online ပေါ်မှာ စုပြီး သံပုံးတီး ဆန္ဒပြပွဲမှာ ၃၀၀ နီးပါးလောက် ပါဝင်ခဲ့ကြပါတယ်။ တခြားနိုင်ငံတွေမှာ ရောက်နေကြတဲ့ မြန်မာတွေကလည်း သူတို့ရောက်ရာ နိုင်ငံတွေက အစိုးရတွေအနေနဲ့ မြန်မာနိုင်ငံမှာ စစ်အုပ်ချုပ်ရေးစနစ် အဆုံးသတ်အောင် ကူညီဆောင်ရွက်ပေးကြအောင် ဆန္ဒပြုလွှာတွေ၊ စာတွေ ပေးပို့ တောင်းဆိုနေကြပါတယ်။ 

 ဗွီအိုအေ (မြန်မာပိုင်း)

https://burmese.voanews.com/a/myanmar-protest/5768510.html