၂ ငါးလုံးအထွေထွေသပိတ် ဆော်သြသူတချို့ရဲ့ အစီအစဉ်

Thousand and thousand of people are participating in the Civilian Disobedient Movement in Mandalay the day after two protesters killed by police fire.

ဒီကနေ့ တနင်္လာနေ့ ဖေဖေါ်ဝါရီလ ၂၂ ရက် (၂၂.၂.၂၀၂၁) မှာ တနိုင်ငံလုံး ရှိသမျှ ကုန်စုံဆိုင်တွေ၊ ဈေးတွေ၊ ကုန်ကားဂိတ်တွေ၊ လုပ်ငန်းတွေ အကုန်ပိတ်ပြီး ၂၂၂၂၂ ( နှစ်ငါးလုံး) CDM အထွေထွေသပိတ်ကြီးမှာ ပါဝင်ကြဖို့ Gen Z မျိုးဆက် လူငယ်တွေဦးဆောင်ပြီး နှိုးဆော်ထားသလို၊ လူထုလှုပ်ရှားမှုတွေမှာ ဦးဆောင်နေသူတွေရဲ့ ကိုယ်ပိုင် Facebook စာမျက်နှာတွေမှာလည်း ဖြန့်ဝေထားပါတယ်။၂၂၂၂၂ အထွေထွေသပိတ်ကို အကြမ်းမဖက် လူထုလှုပ်ရှားမှုကြီးအဖြစ် အသွင်မျိုးစုံနဲ့ စီစဉ်ထားတယ်လို့လည်း ပြည်သူ့လွှတ်တော်ကိုယ်စားလှယ် ကိုစည်သူမောင်က ဗွီအိုအေကို ပြောပါတယ်။

စစ်ကောင်စီက နေရာတချို့မှာ အကြမ်းဖက်ဖြိုခွဲမှုတွေလုပ်လာပေမယ့် ရန်ကုန်နဲ့ မန္တလေးမြို့တွေမှာ ပြည်သူတွေဘက်ကလည်း ဆန္ဒပြအရှိန်ပိုပြီးမြှင့်တင်လာတဲ့ အခြေအနေကို မအင်ကြင်းနိုင်က စုစည်းတင်ပြမှာပါ။

မြန်မာနိုင်ငံမှာ စစ်အာဏာသိမ်းပြီး ရက်ပေါင်း ၂၂ ရက်မြောက်တဲ့နေ့မှာ တတိုင်းတပြည်လုံး ပါဝင်လှုပ်ရှားမယ့် ၂၂၂၂၂ (နှစ်ငါးလုံး) အထွေထွေသပိတ်ကြီးဆင်နွဲှဖို့ Gen Z မျိုးဆက် လူငယ်တွေ ဦးဆောင် နှိုးဆော်ထားတဲ့အတွက် ဒီကနေ့ ရန်ကုန်မြို့မှာ မြို့နယ်အလိုက် သပိတ်ကြောင်းတွေနဲ့ချီတက်ကြဖို့ ပြင်ဆင်ထားကြောင်း NLD ပန်းဘဲတန်း ပြည်သူ့လွှတ်တော် ကိုယ်စားလှယ် ကိုစည်သူမောင်က ဗွီအိုအေကို ပြောပါတယ်။

" ဒီ ၂၂၂၂၂ (နှစ်ငါးလုံး) က Gen Z မျိုးဆက် အချင်းချင်းကြား လူထုလှုပ်ရှားမှုကြီးကို ပြန်ပြီး တပ်လှန့်သံအနေနဲ့ သူတို့ အရေးတော်ပုံရဲ့ အရှိန်အဟုန် ပြန်တင်တယ်လို့ ကျနော် နားလည်ပါတယ်။ ဘာပဲပြောပြော အခု ၂၂၂၂၂ (နှစ်ငါးလုံး) နေ့ဆိုပြီး နှိုးဆော်ထားတဲ့ ဖြစ်တဲ့အတွက် တနင်္လာမှာနေ့မှာဆိုရင် သပိတ်စစ်ကြောင်းတွေဟာ မြို့နယ်အလိုက် ဝန်ထမ်းပေါင်းစုံ၊ ဘာသာပေါင်းစုံ၊ အလွှာ လူတန်းစားပေါင်းစုံ ပါဝင်တဲ့ အထွေထွေ သပိတ်စစ်ကြောင်းမျိုးတွေ ပြင်ဆင်နေကြပါတယ်။ ပြင်ဆင်တဲ့အခါမှာ မြို့နယ်အသီးသီးရဲ့ logo တွေပါတဲ့ ဗွီနိုင်းပိုစတာတွေ ထုတ်နေတာ ကျနော်တို့ တွေ့ရပါတယ်။”

တနင်္ဂနွေနေ့ညက ရန်ကုန်မြို့တွင်း စစ်ကားတွေ နေရာအသီးသီးယူထားတဲ့ အခြေအနေကိုလည်း သူက အခုလိုပြောပြပါတယ်။

”အခု လွန်ခဲ့တဲ နာရီပိုင်းမှာ ရန်ကုန်မြို့ထဲနဲ့ လှည်းတန်းကုန်းတံတားပေါ်တွေ၊ တိုက်ခန်းတွေပေါ်ကနေ ရိုက်ယူထားတဲ့ ဗွီဒီယို မှတ်တမ်းတွေအရ အခု စစ်ကားတော်တော်များများက ရန်ကုန်မြို့တွင်းကို ဝင်လာပြီ။ နောက် သံရုံးတွေဘက်သွားတဲ့ လမ်းတွေကို စစ်ကားတွေ ပိတ်ဆို့ထားတာရှိတယ်။ တနင်္လာနေ့ကို သံရုံးတွေဘက် ချီတက်ဆန္ဒပြတာတွေမလုပ်နိုင်အောင် တားဆီးထားမယ့် သဘောလည်း ရှိနိုင်တယ်။ နောက်တခုက အခု ဆန္ဒပြပွဲတွေကို ဖြိုခွင်းတဲ့ ရေကားမျိုးတွေ၊ လုံထိန်းတွေကို အင်အားတိုးပြီး ချလာတဲ့ ဗွီဒီယိုဖိုင်တွေလည်း အများအပြားတက်နေပါတယ်။ နောက်တခုက တံတားတွေကိုလည်း ပိတ်လိုက်တယ်ဆိုတဲ့ သတင်းရုပ်သံတွေလည်း ကျနော်တို့ တောက်လျောက်ရနေတယ်။”

မေး။ ။ ပြီးခဲ့တဲ့ ရက်ပိုင်းကပဲ မန္တလေး၊ မြစ်ကြီးနား စတဲ့ မြို့တွေမှာ စစ်တပ်က အကြမ်းဖက်ဖြိုခွဲမှုတွေလုပ်ခဲ့တဲ့အတွက် သေနတ်ဒဏ်ရာရပြီး လူသေဆုံးမှုတချို့ ရှိခဲ့ပါတယ်။ အဲတော့ ရန်ကုန်မှာ စစ်တပ်က နေရာအသီးသီးမှာ ရှိနေတော့ လူတွေဘက်က အင်အားဘယ်လောက်ထိ ဆက်ပြီး ထွက်လာဖို့ရှိမယ်လို့ မျှော်လင့်ထားသလဲ။

ဖြေ။ ။ မန္တလေးရဲ့ အခြေအနေကိုပဲ ပြန်ကြည့်ပါဗျ။ မန္တလေးမှာ ပစ်ခတ်လိုက်တဲ့အခါမှာ ပိုပြီးတော့ လူစုလူဝေးနဲ့ လူထုရဲ့ ဆန္ဒပြမှု ပိုပြီး အားကောင်းလာတာတွေ့ရတယ်။ ပြောချင်တာက ပြည်သူတွေရဲ့ စိတ်မှာ ပြင်ဆင်ထားပြီးသာခင်ဗျ။ ပြည်သူတွေရဲ့ နိုင်ငံရေးနိုးကြားမှုက ဒီမတရားမှုကို ဆန့်ကျင်နေမယ်။ တရက်၊ နှစ်ရက်နဲ့ ပြီးသွားမှာ မဟုတ်ဘူး။ ဒီအရေးတော်ပုံကြီးဟာ တပတ်၊ ဆယ်ရက် ကြာကြာ၊ လနဲ့ ပဲ ချီကြာကြာ အမှန်တရားအတွက် သူတို့ရအောင် တိုက်ပွဲဝင်မယ်လို့ စိတ်ပိုင်းဖြတ်ထားတယ်။”

အလားတူ မန္တလေးမှာလည်း အရင် ၈၈၈၈ ရှစ်လေးလုံး လူထုလှုပ်ရှားမှုလို အခု ၂၂၂၂၂ (နှစ်ငါးလုံး) လှုပ်ရှားမှုမှာ တမြို့လည်း ဆိုင်တွေပိတ် အင်နဲ့ အားနဲ့ ပါဝင်ဖို့ ပြင်ဆင်ထားတာတွေ့ရတယ်လို့ Save Our Mandalay အဖွဲ့က ကိုနေမျိုးက ဗွီအိုအေကို ပြောပါတယ်။

”၂၂၂၂၂ (နှစ်ငါးလုံး) နေ့မှာ တမြို့လုံးထွက်ကြမယ်လို့ ပြောထားတယ်။ ဆိုင်တွေ အားလုံးပိတ်ပြီးတဲ့ အခါကျတော့ အထွေထွေသပိတ်ကြီးအဖြစ် အားလုံးထွက်ကြမယ်ဆိုတော့ ခါတိုင်းထက်တော့ လူပိုများမယ်ထင်တယ်။ ဒီနံပါတ်ကလည်း ၂၂၂၂၂ (နှစ်ငါးလုံး) ဆိုတော့ တိုက်ဆိုင်တာရယ်၊ နံပါတ်က လှတယ်ရယ်ဆိုတော့ ဒီရက်ကို ယူလိုက်တယ် ထင်တာပဲ။ ၈၈၈၈ ရှစ်လေးလုံး လိုပေါ့။”

မေး။ ။ မန္တလေးမှာ လူအင်အား ဘယ်လောက်ထိ ထွက်လာဖို့ရှိမလဲ။

ဖြေ။ ။ ခါတိုင်းတွေထက်တော့ အရှိန်အဟုန်က ပိုပြီး မြင့်လာမှာပဲ။ တတိုင်းတပြည်လုံး ဒီရက်မှာ ပိုပြီးတော့ အကုန် အရှိန်အဟုန်မြှင့်ပြီး ဆန္ဒပြကြဖို့၊ လိုချင်တာ မရမချင်း လူထုက ငြိမ်းချမ်းစွာ ဆန္ဒပြနေကြအုံးမှာပဲ။ စစ်အာဏာသိမ်းပြီး ကိုဗစ်ကိုတောင် မကြောက်နိုင်တော့ဘူးပေါ့ဗျာ။”

ကိုဗစ်-၁၉ ကပ်ရောဂါကြောင့် ထိခိုက်နစ်နာနေတဲ့ စီးပွားရေးလုပ်ငန်းတွေဟာ

ဖေဖေါ်ဝါရီလ (၁)ရက် စစ်အာဏာသိမ်းပြီးကတည်းကပိုပြီး အထိအခိုက်တွေရှိခဲ့ပေမယ့် နောင်အနာဂတ် မြန်မာနိုင်ငံမှာ စစ်အုပ်ချုပ်ရေးဆိုတာမျိုး လုံးဝမလိုလားတဲ့ ခံယူချက်တွေနဲ့ ပြည်သူတွေက နောက်မဆုတ်ပဲ ပါဝင်ဆန္ဒပြနေကြတာဖြစ်တယ်လို့ကိုနေမျိုးက ဗွီအိုအေကို ပြောပါတယ်။ 

အင်ကြင်းနိုင်/ VOA Burmese

https://burmese.voanews.com/a/myanmar-protest-plan-for-general-strike-five-twos-movement/5787064.html