သေနတ်ထိမှန်သေဆုံးသူ မမြသွဲ့သွဲ့ခိုင်စျာပန ကျင်းပ

မမြသွဲ့သွဲ့ခိုင်ရဲ့ စျာပန မြင်ကွင်း။ (ဖေဖော်ဝါရီ ၂၁၊ ၂၀၂၁)

ရဲလက်ချက်နဲ့ ခေါင်းကို သေနတ်ထိမှန်ပြီး သေဆုံးသွားတဲ့ မမြသွဲ့သွဲ့ခိုင်ရဲ့ စျာပနကို ဒီနေ့နေပြည်တော်မှာ ကျင်းပတာမှာ ပြည်သူအများအပြား လိုက်ပါပို့ဆောင်ကြပါတယ်။ သူ့ရဲ့ ရုပ်အလောင်းကို ဆေးရုံကနေ မီးသဂြိုလ်မယ့်နေရာ သယ်ဆောင်သွားရာ လမ်းတလေ ျှာက် ဆိုင်ကယ်တွေ၊ မော်တော်ကားတွေက ယာဉ်တန်းကြီးတွေအဖြစ်နဲ့ လိုက်ပါပို့ဆောင် နှုတ်ဆက်ခဲ့ကြပါတယ်။

လမ်းပေါ်ကနေလည်း တချို့က စောင့်ပြီး သူ့ရဲ့နောက်ဆုံးခရီးကို နှုတ်ဆက်ကြပါတယ်။ ဖေဖော်ဝါရီလ ၉ ရက်နေ့က သပြေကုန်းအဝိုင်းနားမှာ စစ်အာဏာသိမ်းမှု ဆန့်ကျင်ဆန္ဒပြနေသူတွေကို ရဲက ပစ်ခတ်နှိမ်နှင်းစဉ် မမြသွဲ့သွဲ့ခိုင်ရဲ့ ဦးခေါင်းကို ကျည်ထိမှန်ခဲ့တာဖြစ်ပါတယ်။ ၁၀ ရက်ကြာဆေးရုံမှာ စက်တွေနဲ့ အသက်ဆက်နေခဲ့ပြီး ဖေဖော်ဝါရီလ ၁၉ ရက်နေ့က သေဆုံးခဲ့တာဖြစ်ပါတယ်။ သူဟာ သေနတ်ဒဏ်ရာရထားစဉ် ဖေဖော်ဝါရီလ ၁၁ ရက်နေ့ကမှ အသက် ၂၀ ပြည့်ခဲ့တာပါ။

မမြသွဲ့သွဲ့ခိုင်ရဲ့ စျာပန မြင်ကွင်း။ (ဖေဖော်ဝါရီ ၂၁၊ ၂၀၂၁)

သေဆုံးခဲ့ပြီးနောက် သူ့ဦးခေါင်းထဲက ကျည်ကို ဆရာဝန်တွေက စစ်ဆေးခဲ့တာမှာ ရာဘာကျည်မဟုတ်ဘဲ ကျည်အစစ်ဖြစ်တယ်လို့ အတည်ပြုကြောင်း မမြသွဲ့သွဲ့ခိုင်ရဲ့ မိသားစုက သတင်းထောက်တွေကို ပြောပါတယ်။ အာဏာသိမ်းစစ်ကောင်စီရဲ့ သတင်းစဉ်ထုတ်ပြန်ချက်ထဲမှာတော့ မမြသွဲ့သွဲ့ခိုင် ဦးခေါင်းမှာ တွေ့ရတဲ့ ကျည်ထိပ်ဖူးဟာ အဓိကရုဏ်းနှိမ်နင်းရေးတပ်တွေရဲ့ ခဲယမ်းကျည်တွေ မဟုတ်ဘူးလို့ ငြင်းထားပြီး ဒါဟာ ပြင်ပက အသုံးပြုတဲ့ လက်နက်တစုံတရာကြောင့်ဖြစ်မယ်လို့ ဒီကနေ့ထုတ်နိုင်ငံပိုင်သတင်းစာတွေမှာ ဖော်ပြထားပါတယ်။

 ဗွီအိုအေ (မြန်မာပိုင်း)

https://burmese.voanews.com/a/military-coup-protester-mya-thwate-thwate-khine-funeral/5786668.html