ဖမ်းဆီးခံရသူ‌ဒေါ်အောင်ဆန်းစုကြည်နဲ့ တွေ့ခွင့်ရဖို့ ရှေ့နေဖြစ်သူတွေ ကြိုးပမ်း

နိုင်ငံတော်အတိုင်ပင်ခံ ဒေါ်အောင်ဆန်းစုကြည် (ညာ)နဲ့ သမ္မတဦးဝင်းမြင့် (ဝဲ)။ (ဇန်နဝါရီ ၁၈၊ ၂၀၂၀)

မြန်မာနိုင်ငံမှာ စစ်တပ်က အာဏာသိမ်းပြီးကတည်းက ဖမ်းဆီးထားတဲ့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို တွေ့ခွင့်ရဖို့ ဥပဒေအကျိုးဆောင်က ကြိုးပမ်းနေပါတယ်။ စစ်တပ်က ဖမ်းဆီးထားတဲ့ ဒေါ်အောင်ဆန်းစုကြည်နဲ့ သမ္မတဦးဝင်းမြင့်တို့ကို ဥပဒေအရ ခံစားခွင့်တွေ ဆုံးရှုံးနေတဲ့အပေါ် ဥပဒေပညာရှင်တွေရဲ့ သုံးသပ်ချက်တွေကိုတော့ ဗွီအိုအေမြန်မာပိုင်း သတင်းထောက် မစုစုက ပြောပြပေးပါမယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ပို့ကုန်၊ သွင်းကုန် ဥပဒေ ပုဒ်မ ၈၊ သမ္မတဦးဝင်းမြင့်ကို သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေ ပုဒ်မ ၂၅ တို့နဲ့ ဇဗ္ဗူသီရိမြို့နယ် တရားရုံးမှာ အမှုဖွင့်ထားပေမဲ့ ဒီနေ့အထိ ဥပဒေအကျိုးဆောင်တွေနဲ့ တွေ့ခွင့်မရသေးပါဘူး။ ဒါကြောင့်လည်း တွေ့ခွင့်ရဖို့ အာဏာပိုင်တွေထံ တောင်းခံထားတယ်လို့ အမှုမှာ လိုက်ပါအကျိုးဆောင်ပေးဖို့ ပြင်ဆင်ထားတဲ့ တရားလွှတ်တော်ရှေ့နေ ဦးခင်မောင်ဇော်က နေပြည်တော်မှာ ဒီကနေ့ပဲ သတင်းထောက်တွေကို ပြောပါတယ်။

"တွေ့ဖို့အလားအလာ ယတိပြတ်ပြောမယ်ဗျာ... အလားအလာ မရှိဘူး။ အခုမရှိလို့ ဒီလိုဖြစ်နေတာပေါ့။ ကျနော်ပြောတာက ဒီလို အဲဒီအလားအလာအတွက် ကျနော်တို့ကြိုးစားမယ်။ ကြိုးစားမယ်ဆိုတာက ဥပဒေနဲ့အညီ ရှေ့နေ့က ညွှန်ကြားချက်ယူဖို့ ရှိတဲ့အတွက်ကြောင့် တွေ့ဖို့ကြိုးစားပါမယ်။ သက်ဆိုင်ရာခရိုင် ရဲတပ်ဖွဲ့မှူးကို ကျနော်တို့ထပ်ပြီးတော့ ကြိုးစားပါ့မယ်။ အဲဒီတော့ ဘယ်လိုပဲဖြစ်ဖြစ် တရားရေးရဲ့ သဘောထားကတော့ ရှေ့နေမပါလို့မဖြစ်ဘူး။ အဲဒီတော့ ရှေ့နေပါရင်လည်း ရှေ့နေက ညွှန်ကြားချက်ယူဖို့ တွေ့ရမှာပေါ့ဗျာ။ အဲဒီ တွေ့ရမှာကို ဘယ်လိုစီစဉ်ပေးမလဲဆိုတာကိုတော့ ကျနော်တို့မသိဘူးပေါ့ အဲဒါကတော့။"

နိုင်ငံတော်အတိုင်ပင်ခံ ဒေါ်အောင်ဆန်းစုကြည်နဲ့ သမ္မတ ဦးဝင်းမြင့်တို့ကို ရမန်ချုပ်ရက်ပြည့်တဲ့ နေ့ရက် အတိအကျကိုလည်း မသိရဘူးလို့ ရှေ့နေ ဦးခင်မောင်ဇော်က ပြောပါတယ်။ အစောပိုင်း သတင်းတွေအရ ဒီကနေ့ ရမန်ပြည့်တဲ့ ရက်အဖြစ် သိထားရတာကြောင့် ရှေ့နေပါဝါတင်ဖို့လာတာ ဖြစ်ပေမဲ့ ခရိုင်တရားသူကြီးက ၁၇ ရက်နေ့အထိ ရမန်ယူထားကြောင်း ပြောဆိုခဲ့ပြီး၊ အမှုကိုလည်း ဇဗ္ဗူသီရိမြို့နယ်တရားရုံးမှာ Video Conferencing နဲ့သာ လုပ်ဆောင်မှာဖြစ်တယ်လို့ ပြောဆိုခဲ့ကြောင်းလည်း ရှေ့နေ ဦးခင်မောင်ဇော်က ပြောပါတယ်။

ပြည်ထောင်စုရှေ့နေများနဲ့ ဥပဒေအထောက်အကူပြုသူများအဖွဲ့ ဥက္ကဋ္ဌဖြစ်သူ ရှေ့နေ ဦးကြီးမြင့်ကတော့ ဖမ်းဆီးခံထားရသူတွေကို ဥပဒေအကျိုးဆောင်တွေ တွေ့ခွင့်မရတာဟာ အခြေခံအခွင့်ရေးတွေကို ချိုးဖောက်ရာရောက်တယ်လို့ ဗွီအိုအေကို ပြောပါတယ်။

"အဖမ်းခံရပြီဆိုကတည်းက ရှေ့နေတွေနဲ့ တွေ့ခွင့်ပေးရမယ်ဆိုတာ ဒါကျင့်ထုံးဥပဒေတွေမှာ ပြဌာန်းထားပြီးသားပဲလေ။ ၁ ရက်နေ့က ဖမ်းတယ်ဆိုတော့ ရမန်ကြီး ၁၄ ရက်နဲ့ပေါင်းလိုက်ရင် ၁၅ ရက်နေ့ ဒီနေ့မှာ ရုံးထုတ်ရမယ်လေ။ ဒါမှမဟုတ်ရင်လည်း ရမန်ဆက်ယူရမယ်လေ။ ဒါ ဥပဒေပဲလေ။ သူတို့က အဲဒါကို ရက်စွဲကိုပြောင်းလိုက်ပြီးတော့ ၁၇ ရက်နေ့ဆိုပြီးတော့ နောက်ထပ် ၂ ရက်ထပ်တိုးလိုက်တာ အဲဒီကတည်းကစ ဥပဒေက မညီတော့ဘူးလေ။ Video Conference နဲ့ ကြားနာရမယ် ဆိုတဲ့အခါကျတော့ ဒီကသွားတင်တဲ့ ရှေ့နေက ဘယ်သွားတင်ရမှာလဲ။ သူတို့က တရားရုံးထဲလည်း အဝင်မခံဘူးလေ။ တရားခံနဲ့ တရားရုံးနဲ့ပဲ တိုက်ရိုက်ဆက်ဆံမယ်ဆိုတဲ့ အခါကျတော့ ရှေ့နေက ဘယ်သွားတင်ရမှာလဲ။ အဲဒါတွေကတော့ ဥပဒေနဲ့ တခုမှမညီပါဘူး။"

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပေါ် စွဲဆိုထားတဲ့ ပို့ကုန်၊သွင်းကုန်ဥပဒေ ပုဒ်မ ၈ အရ အပြစ်ရှိကြောင်း ဆုံးဖြတ်မယ်ဆိုရင်တော့ အမြင့်ဆုံးပြစ်ဒဏ် ထောင် ၃ နှစ် ကျခံရမှာဖြစ်သလို၊ သမ္မတဦးဝင်းမြင့်အပေါ် စွဲဆိုထားတဲ့ သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေ ပုဒ်မ ၂၅ ဟာလည်း အမြင်ဆုံးပြစ်ဒဏ် ထောင်ဒဏ် ၃ နှစ်ကျခံရနိုင်ပါတယ်။

ပြီးခဲ့တဲ့ရွေးကောက်ပွဲမှာ မဲအပြတ်အသတ်နဲ့ အနိုင်ရခဲ့တဲ့ NLD ပါတီနာယကဖြစ်သူ ဦးဝင်းထိန်ကိုလည်း နိုင်ငံတော်အကြည်ညိုပျက်စေမှု ပုဒ်မ ၁၂၄ က နဲ့ ရမန်ယူထားတာ ၁၉ ရက်နေ့ဆို ပြည့်မှာဖြစ်ပေမဲ့ ဘယ်တရားရုံးမှာ ရုံးထုတ်စစ်ဆေးသွားမလဲဆိုတာကိုတော့ မသိရသေးပါဘူး။

အမေရိကန်နိုင်ငံခြားရေး ဝန်ကြီးဌာနကတော့ ထိန်းသိမ်းခံထားရတဲ့ ဒေါ်အောင်ဆန်းစုကြည်နဲ့ အဆက်အသွယ်ရဖို့ ကြိုးပမ်းခဲ့ပေမဲ့ မြန်မာအာဏာပိုင်တွေက ငြင်းပယ်ခဲ့ကြောင်း ပြောဆိုထားပါတယ်။ 

 စုစု/ VOA Burmese

https://burmese.voanews.com/a/myanamr-military-coup-dassk-uwinmyint-/5778659.html