ကရင်ကျေးရွာ ၃၀ ကျော် မြဝတီမြို့ကို ချီတက်ဆန္ဒပြ

ကရင်ပြည်နယ် မြဝတီမြို့ကို ကရင်ကျေးရွာပေါင်း ၃၀ ကျော်က လာရောက်ပူးပေါင်း ချီတက်ဆန္ဒပြတဲ့ မြင်ကွင်း။ (ဖေဖော်ဝါရီ ၂၁၊ ၂၀၂၁)

ကရင်ပြည်နယ် မြဝတီမြို့ကို ကရင်ကျေးရွာပေါင်း ၃၀ ကျော်က လာရောက်ပူးပေါင်းခဲ့ပြီး ဆန္ဒပြ ချီတက်ခဲ့တာကြောင့် ပြီးခဲ့တဲ့ရက်တွေက ရဲနဲ့ စစ်တပ်တွေ တားဆီး ပိတ်ဆို့ထားတဲ့ဘုရင့်နောင်လမ်းမကြီးကို ဖွင့်ပေးလိုက်ရပါတယ်။ ဒီသတင်းကို ဗွီအိုအေမြန်မာပိုင်း သတင်းထောက် မအေးအေးမာက တင်ဆက်ပေးပါမယ်။

ကရင်ပြည်နယ်ထဲက ကျေးရွာပေါင်း ၃၀ ကျော်က ကရင်လူထုတွေ ချီတက်လာခဲ့ပြီး မြဝတီက ဆန္ဒပြသူတွေနဲ့ လာရောက်ပူးပေါင်းခဲ့တာပါ ချီတက်လာဒေသခံ ကရင်လူထုကို ကရင်အမျိုးသားအစည်းအရုံး ကေအန်ယူက ဝန်းရံပေးခဲ့တယ်ဆိုတဲ့ သတင်းတွေလည်း ထွက်ပေါ်ခဲ့တာပါ ခန့်မှန်းခြေ သိန်းဂဏန်းလောက်ရှိတဲ့ တနင်္ဂနွေနေ့က ဆန္ဒပြပွဲအခြေအနေနဲ့ ပတ်သက်ပြီး မြဝတီမြို့ခံတဦးက အခုလိုပြောပြပါတယ်။

"ကေအန်ယူ ပါလာတယ်ဆိုပြီး မိန်းလမ်းမကြီးကို ဖွင့်ပေးလိုက်ရတယ်။ ခရစ်ယာန်ဘုရားကျောင်းရှေ့ရယ်၊ အ.ထ.က ကျောင်းရှေ့ရယ်ကို သူတို့က ပိတ်ထားတယ်။ အဲဒီလို ပိတ်ထားတာကို ဟိုဘက် သင်္ကန်းညီနောင်ဘက်က လာတဲ့အဖွဲနဲ့ အမှတ် (၁) တံတားဘက်တဖွဲ့ လာတယ်၊ နှစ် ဖွဲ့လာတယ်။ ဟိုဘက်တဖွဲ့၊ ဒီဘက်တဖွဲ့လာကြတယ်။ အလယ်မှာ ရဲတွေက ပိတ်ထားတယ်။ သူတို့ရောက်လာပြီး ဆွေးနွေးတယ်။ ခရိုင်အုပ်ချုပ်ရေးမှူးရုံးရှေ့မှာ ဆွေးနွေးပြီးတော့မှ ဖွင့်ပေးလိုက်တယ်။ အလယ်မှာ နှစ် ဖွဲ့ပေါင်းမိသွားတယ်။ ၃၂ ရွာလို့ ပြောတယ်။ ညီနောင်ဘက်မှာတော့ ထီဝါပလော အတွင်းမဲကနယ် အပြင်မဲကနယ် သူတို့လာတဲ့ကားတွေမှာ ရေးထားတာပေါ့။ ကေအန်ယူတွေနဲ့ ချီတက်လာတဲ့ စစ်ကြောင်းဆိုပြီး လူထုကတော့ ဝမ်းသာကြတာပေါ့။ လက်ခုတ်လက်ဝါးတီးပြီး ကြိုဆိုကြတယ်။"

မကြာသေးခင်တုန်းကတော့ ကေအန်ယူက ကြေငြာချက်ထုတ်ပြန်ပြီး ကရင်လူထုတွေနဲ့ ဆန္ဒသဘောထားအတိုင်း တသားတည်း ရှိတယ်လို့ ပြောဆိုခဲ့တာပါ။ တနင်္ဂနွေနေ့ မြဝတီမြို့က ဆန္ဒပြပွဲမှာ ကေအန်ယူတွေ ပါဝင်ခဲ့သလားဆိုတာကို ကေအန်ယူ ကရင်အမျိုးသားအစည်းအရုံးရဲ့ တွဲဘက်အတွင်းရေမှူး (၂) ဖဒိုစောလှထွန်းကို အခုလိုမေးကြည့်ခဲ့ပါတယ်။

"ကေအန်ယူအနေနဲ့ကတော့ ပြောပြီးသားပဲ။ ကေအန်ယူကြေငြာချက်ထဲမှာလည်း ပါတယ်။ လူထုနဲ့ တသားတည်းရှိတယ်ဆိုတာ ပါတယ်။ ကေအန်ယူ ဝန်းရံတယ်ဆိုတာကတော့ ကေအန်ယူရဲ့ သူဒေသမှာတော့ ရှိနေကြမှာပဲ သက်ဆိုင်ရာ အောက်ခြေမှာတော့ ရှိနေကြမှာပဲ။ ကိုယ့်ဒေသမှာတော့ ကြည့်နေရတာပဲ ပါဝင်လာတယ်ဆိုတာကတော့ အတိအကျတော့ မသိသေးဘူး။ တချို့ကိုတော့ အောက်ခြေမှာ ပြန်မေးရဦးမှာပေါ့... လူထုထဲမှာသွားနေတဲ့အပိုင်းတော့ ရှိတယ်။"

မြဝတီမြို့မှာတော့ စစ်အုပ်ချုပ်ရေးကောင်စီကို ဆန္ဒပြမှုတွေ ဆက်တိုက်ရှိခဲ့ပြီး ကရင်ပြည်နယ်ရဲ့ တခြားမြို့နယ်တွေမှာတော့ ဆန္ဒပြတာတွေ သိပ်မရှိပါဘူး။ ကရင်ပြည်နယ် ဘားအံဘက်မှာတော့ လူထုတွေ ညဘက်သံပုံးတီးတာကအစ စောင့်ကြည့်နေတာတွေ ရှိနေတာကြောင့် မြဝတီမြို့လောက်တော့ လှုပ်ရှားမှုတွေ မရှိပါဘူး။ စစ်အာဏာသိမ်းပြီးတဲ့နောက် မြဝတီမြို့မှာ ဆန္ဒပြမှုတွေကို သေနတ်နဲ့ ပစ်ခတ်ဖြိုခွဲတာတွေလည်း ရှိခဲ့ပေမဲ့ စစ်အာဏာရှင်ဆန့်ကျင်ရေး ဆန္ဒပြပွဲတွေကတော့ ဆက်ရှိနေဆဲဖြစ်ပါတယ်။

မအေးအေးမာ/ VOA Burmese

https://burmese.voanews.com/a/karen-myawaddy-myanmar-military-coup-protest/5786680.html