မြစ်ကြီးနားဆန္ဒပြပွဲ ပစ်ခတ်နှိမ်နင်းခံရ

မြစ်ကြီးနားမြို့တွင်း တပ်စွဲဖို့ ရောက်လာသည့် လုံခြုံရေးတပ်ဖွဲ့ဝင်များ ( Photo - Kachin Wave )

ကချင်ပြည်နယ်မှာ ဆန္ဒပြသူတွေကို မျက်ရည်ယိုဗုံးသုံး၊ ပစ်ခတ် လူစုခွဲတဲ့သတင်းကို မစုမြတ်မွန်က တင်ပြပါမယ်။

ကချင်ပြည်နယ် မြစ်ကြီးနားမြို့ စက်မှုဇုံ ရပ်ကွက်က လ ျှပ်စစ်ဓါတ်အားပေးစက်ရုံမှာ စစ်တပ်က လာရောက်တပ်စွဲတာကို ဖယ်ရှားပေးဖို့ တောင်းဆိုဆန္ဒပြတဲ့ ဒေသခံတွေကို ရဲနဲ့ စစ်တပ်က မျက်ရည်ယိုဗုံးတွေအပြင် ပစ်ခတ်လူစုခွဲတဲ့အသံဖြစ်ပါတယ်။ ကျည်အစစ်လား ရာဘာကျည်လားဆိုတာ မသိရပေမယ့် ပစ်ခတ်မှုကြောင့် ဒဏ်ရာရသူတချို့ ရှိခဲ့ပါတယ်။ အခြေအနေကို တိုက်ရိုက် ထုတ်လွှင့်နေတဲ့ သတင်းထောက် ၅ ယောက်လည်း ဖမ်းခံခဲ့ရပါတယ်။

ည ၉ နာရီခွဲလောက်က စပြီးမျက်ရည်ယိုဗုံးတွေသုံး လူစုခွဲတာကို အဲဒီမှာ ဆန္ဒပြနေတဲ့ ကချင်ဒေသခံ ကိုလဂျာက ဗီအိုအေမြန်မာပိုင်းကို ပြောပြပါတယ်။

" ၉ နာရီခွဲ လောက်မှာ သူတို့ မျက်ရည်ယိုဗုံးနဲ့ စပစ်တာ ... ခုထိ ပစ်နေတုန်းပဲပေါ့နော့ ။ ကျနော်တို့ ဆန္ဒထုတ်ဖေါ်တဲ့ ပြည်သူလူထုတွေကို လူစုခွဲတဲ့ သဘောပေါ့။ ကျနော်တို့ ပြည်သူတွေ ထိုင်နေတဲ့ကြားထဲကို ပစ်တာ။ အဲဒီမှာ လူငယ်တွေ အများအပြား ဒဏ်ရာရကြတာပေါ့ ... အယောက် ၃၀ နဲ့ ၄၀ ကြားလောက် ရှိမယ်ထင်တယ်။ သူတို့ မျက်ရည်ယိုဗုံးနဲ့ ပစ်တော့ အသက်ရှုမဝတာတို့ မျက်စိစပ်တာတို့ အတော်များများမှာ ဖြစ်ကြတာပေါ့။ အဲဒီမှာက လူငယ်တွေ အများစုပါကြတာ။ "

ဆန္ဒပြသူတွေကို မျက်ရည်ယိုဗုံးတွေသုံး လူစုခွဲပေမဲ့ သူ့နဲ့ မေးမြန်းချိန်မှာ မြန်မာစံတော်ချိန် ည ၁၀ နာရီခွဲအထိ လူစု မကွဲသေးပါဘူး။

ကိုလဂျာ။ ။ " ခုထိ လူစုမကွဲသေးဘူး။ ပြည်သူတွေက ထပ်တိုးလာတယ်၊ များသထက် များလာတယ်။ ၉ နာရီခွဲတုန်းက လူသိပ်မများသေးဘူး။ အဲဒီအချိန်တုန်းက မိနစ် ၂၀ လောက်မှာတကြိမ်ပစ်ပေမယ့် အခုတော့ ၁၀ မိနစ်လောက်မှာတကြိမ် ပစ်နေပါတယ်ဗျ။

မစုမြတ်မွန် ။ ။ ကိုလဂျာရော အခု ဘေးကင်းလုံခြုံတဲ့နေရာမှာ ရှိနေလားရှင့်။

ကိုလဂျာ ။ ။ အခု ကျနော်က ဘေးကင်းတဲ့နေရာမှာ ရှိနေတယ်။ ကျနော်တို့က ဆက်ပြီးတော့ ဆန္ဒထုတ်ဖေါ်ရမှာပဲ ၊ ငြိမ်းချမ်းစွာ ထိုင်ပြီးမှ ဆန္ဒထုတ်ဖေါ်နေတာ.. ကျနော်တို့က တရားမျှတမှုလိုချင်တဲ့ ပြည်သူတွေဆိုတော့ ရန်လိုတာမျိုးလည်း မရှိပါဘူး။ သူတို့က စက်မှုဇုံမှာရှိတဲ့ EPC လျှပ်စစ်ရုံးကို လာဝိုင်းထားပြီးတော့ လမ်းပိတ်တာတွေ ဘာတွေလုပ်တော့ အဲဒါတွေကို ကျနော်တို့ ပြည်သူတွေက ဆန္ဒပြကြတာပေါ့။ မြစ်ဆုံကိုသ ွားတဲ့ လမ်းမကြီးပေါ့ - ဆွမ်ပရာဘွန်လမ်းမကြီး- အဲဒါကို သူတို့ပိတ်တယ်၊ ပြီးတော့ EPC ရုံး လယ်ကွင်းအရှေ့ထိပေါ့ အဲဒီထိ သူတို့ဆက်ပိတ်တယ်။ အသွားအလာ လုပ်လို့မရအောင် ပိတ်လိုက်တော့ ကျနော်တို့ပြည်သူတွေက ကြားထဲမှာ ပိတ်မိပြီး ဆန္ဒပြနေတာပေါ့။ "

စက်မှုဇုံ ဓါတ်အားပေးစက်ရုံရှေ့မှာ ဆန္ဒပြနေတဲ့ ကိုလဂျာဖြစ်ပါတယ်။

မြစ်ကြီးနားမှာရှိတဲ့ ဓါတ်အားပေးစက်ရုံ ၃ ခုကို စစ်တပ်က ဝင်ရောက်တပ်စွဲခဲ့ပါတယ်။ ဒါကို မကျေနပ်တဲ့ ဒေသခံတွေနဲ့ တပ်ကြားမှာ ငြိမ်းချမ်းပြေလည်အောင် PCG အဖွဲ့က ကြားဝင် ညှိပေးခဲ့ပေမဲ့ စက်မှုဇုံ ရပ်ကွက်က လ ျှပ်စစ်ဓါတ်အားပေးစက်ရုံကိစ္စ အဆင်မပြေခဲ့ဘူးလို့ မြစ်ကြီးနား သတင်းဂျာနယ်က အယ်ဒီတာချုပ် Seng Mai Maran ဆိုင်းမိုင် မရမ်က ရှင်းပြပါတယ်။

" ကျမတို့ မြစ်ကြီးနားမှာ EPC ဓါတ်အားခွဲရုံ ၃ ရုံကို စစ်တပ်က ဝိုင်းတယ်ပေါ့လေ။ လာပြီးမှ ဝိုင်းထားပြီး နေရာယူထားတယ်ပေါ့။ ရန်ကြီးအောင် အီးပီစီရယ် ၊ နောက်တခုက မိုင်းနား အီးပီစီရယ် ၊ နောက်ဒီဘက်က စက်မှုဇုံ အီးပီစီရယ်ပေါ့ ။ ဒါပေမဲ့ မနေ့ညကပဲ ပြည်သူတွေ မောင်းထုတ်လိုက်လို့ ဒီဘက်က ရန်ကြီးအောင်-အီးပီစီမှာတော့ PCG က ညှိပေးလိုက်တော့ မနေ့က ညတွင်းချင်းပဲ စစ်တပ်တွေက အဲ့ကနေ ဖယ်သွားတယ်။ ဒီမနက်ကျတော့ မိုင်းနားကဟာကိုလည်း ဒီလိုပဲ ဆန္ဒပြတဲ့ သပိတ်စစ်ကြောင်းပြည်သူတွေနဲ့ PCG တွေက ညှိပြီးမှ .. အဲဒါ လူထုအင်အားနဲ့မို့ သူတို့က ဖယ်ရှားပေးလိုက်တယ်။

ဒါပေမဲ့ ဒီညနေပိုင်းအထိ ဒီနောက်ဆုံးတခု စက်မှုဇုံက ဓါတ်အားပေးရုံနေရာကိုကျတော့ ဘယ်လိုမှ ဖယ်ရှားလို့ မရဘူး။ PCG ကလည်း ညှိလို့မရဘူး။ EPC ရုံးကနေ ထွက်ပေးပါလို့ ပြည်သူတွေက တောင်းဆိုနေတာကို စစ်တပ်တွေက - ပြည်သူတွေပြန်မှ သူတို့လည်း ပြန်မယ်လို့ ပြောတယ်။ ပြည်သူတွေကလည်း စစ်တပ်ပြန်မှ ပြည်သူတွေကလည်း ပြန်မယ်ဆိုပြီး ပြောတော့ .. ဘယ်လိုမှ ညှိနှိုင်းလို့ မရတဲ့အချိန်မှာ - PCG ကလည်း သူတို့ညှိနှိုင်းလို့ မရတော့ဘူးဆိုပြီး ပြန်သွားတယ်ပေါ့နော်။

အဲလို ပြန်သွားပြီးနောက်ပိုင်း ၈ နာရီဆို ညမထွက်ရအမိန့် ဖြစ်တဲ့အတွက်ကြောင့် ၊ ၈ နာရီဆို စပြီးဖြိုခွဲမှာ ဖြစ်တဲ့အကြောင်း တပ်ဖက်က ကြေညာထားတယ်။ ၈ နာရီကျတောာ့ တကယ်ပဲ တင့်ကားတွေရော၊ ရဲကားတွေ အချုပ်ကားတွေရော ဒီမှာလာပြီးမှ စပြီး လူစုခွဲတာပေါ့နော်။ ကျမတို့ သတင်းထောက်တွေကလည်း Live တောက်လျှောက် လွှင့်နေတာပေါ့။ အဲဒီမှာ 74 တို့ Mizzima တို့လည်းလွှင့်နေတယ် ။ ဒါပေမယ့် သူတို့လည်း အစောပိုင်း နာရီဝက်လောက် လိုင်းပြုတ်ကျသွားပြီးမှ သူတို့က အဖမ်းခံနေရတဲ့ အခြေအနေပုံရိပ်ကို မြင်တွေ့လိုက်ရတယ်ပေါ့လေ။ "

ဆန္ဒပြသူတွေကို အင်အားသုံး လူစုခွဲမှုအတွင်း သတင်းထောက် ၅ ယောက်လည်း အဖမ်းခံခဲ့ရပါတယ်။

ဖမ်းဆီးခံရတဲ့ သတင်းထောက်တွေကတော့ EPN သတင်းဌာနက ကိုရန်ကောင်း၊ ကိုဝေယံ၊ Mizzima သတင်းဌာနက ကိုဆိုင်းလတ်အောင်၊ The 74 media က ထွယ်အောင်နဲ့ နော်ဆိုင်းတို့ ဖြစ်ကြပါတယ်။ ကျွန်မစုမြတ်မွန်ပါရှင်။

စုမြတ်မွန်/ VOA Burmese

https://burmese.voanews.com/a/myitkyina-protest-crack-down/5777976.html