"နှစ်" ငါးလုံးနေ့ နေပြည်တော်မှာ ဖမ်းခံရသူများ ပြန်လည်လွတ်မြောက်


နှစ်ငါးလုံး လူထုလှုပ်ရှားမှုဆိုပြီး တနိုင်ငံလုံးအတိုင်းအတာနဲ့ စစ်အာဏာသိမ်းကန့်ကွက်ဆန္ဒပြမှုတွေ မနေ့က လုပ်ခဲ့ရာမှာ နေပြည်တော်မှာ ဖမ်းဆီးခံရသူ လူအားလုံးနီးပါး ဒီကနေ့ပြန်လွတ်လာပါတယ်။ သူတို့ထဲက ငါးဦးကိုပဲ ဆက်ပြီး ဖမ်းဆီးထားတယ်လို့ သိရပါတယ်။ မမေခ စုံစမ်းမေးမြန်း သတင်းပို့ထားပါတယ်။

စစ်အာဏာသိမ်း ၂၂ ရက်မြောက် နေ့ဖြစ်တဲ့ နှစ် ငါးလုံး လှုပ်ရှားမှု သပိတ်ဆင်နွှဲခဲ့တာမှာ အစိုးရရုံးစိုက်ရာ နေပြည်တော်နဲ့ ပျဉ်းမနားဘက်မှာ လူအယောက် ၂၀၀ ကျော် ဖမ်းခံခဲ့ရတာပါ။ ဒီလိုဖမ်းခံရတဲ့ အထဲ ၆ ယောက်ကိုတော့ ဆက်လက်ဖမ်းထားပြီး၊ ကျန်တဲ့သူတွေကို ဒီကနေ့ညနေပိုင်းမှာပြန်လွှတ်လိုက်တယ်လို့ ပျဉ်းမနားမြို့ခံ ဦးဝင်းက ဗွီအိုအေကို ပြော ပါ တယ်။

"၂၁၃ ဦးလောက်တော့ ရှိမယ်လို့ ပြောတယ် ရှေ့နေအဖွဲ့ကလေ။ ကျနော်တို့ နေပြည်တော်ရှေ့နေအဖွဲ့က အဲဒီလို ပြောတယ်။ အဲဒီတော့ ၂၀၀ ကျော်ပေါ့နော်... အဲဒီလိုပြောရင်တော့ ပိုပြီးတော့ တိကျမယ်။ အခုက ဘယ်လိုလဲဆိုတော့ ကျနော်တို့ မသိရတာက သူတို့က စာရင်းအတိအကျကို မထုတ်ပြန်တာ၊ ဘယ်လောက် ဖမ်းမိတယ်၊ ဘယ်နှယောက်ပြန်လွှတ်လိုက်တယ်....ဆိုတာ လုံးဝမထုတ်ပြန်ဘူး။ အဲဒီဟာက တော်တော်ခက်တယ်ဗျ။ ၆ ယောက်က လွဲလို့ ကျန်တဲ့လူတွေတော့ လွှတ်ပေးလိုက်ပါတယ်။"

နှစ် ငါးလုံး လှုပ်ရှားမှု လုပ်တာနဲ့ပတ်သတ်လို့ နေပြည်တော် ဆန္ဒပြပွဲလုပ်ခဲ့တဲ့နောက် နေရာ ၃ နေရာမှာ ရဲနဲ့ စစ်သားတွေက ဆန္ဒပြသူတွကို လိုက်ခံဖမ်းဆီးခဲ့တာပါ။ ဖမ်းဆီးမှုကို သတင်းယူတဲ့ သတင်းထောက်တွေကိုပါ လုံခြုံရေးအာဏာပိုင်တွေက ရန်ရှာတာတွေ လုပ်ခဲ့တယ်လို့ သတင်းထောက်တွေကလည်းပြောပါတယ်။

လက်ရှိမှာ မနေ့က ဖမ်းခံရသူတော်တော်များများပြန်လွှတ်ခဲ့ပေမဲ့ ၅ ဦးကိုတော့ အများပြည်သူအကြား တည်ငြိမ်အေးချမ်းမှု ပျက်ပြားအောင်လှုံ့ဆော်မှု/လုပ်ဆောင်မှုဆိုတဲ့ ၅၀၅ (ခ) နဲ့ တရားစွဲဖို့ လုပ်မယ်လို့ကူညီနေတဲ့ ရှေ့နေတွေက ခန့်မှန်းကြောင်းဦးဝင်းကပြောပါတယ်။

"တရားစွဲဆိုဖို့လုပ်နေတယ်အခု ဒီ ၆ ယောက်ကိုပေါ့နော်... အခုက ရှေ့နေတွေက ခန့်မှန်တာ ၅၀၅(ခ) နဲ့ ခန့်မှန်းထားတယ်။ သူတို့က ဒီအချိန်ထိကို အမှုမဖွင့်သေးဘူး။ စစ်ဆေးဆဲကာလဆိုပြီး ဘယ်သူနဲ့မှ တွေ့ခွင့်မပေးဘူး။ အဲဒီလိုမျိုးဖြစ်နေတာ။"

မနေ့ကနေပြည်တော်ဘက်မှာလူပေါင်း သိန်းချီ နှစ် ၅ လုံး အထွေထွေ သပိတ်ဆင်နွဲခဲ့ကြတာမှာ သပိတ်ကို ငြိမ်းချမ်းစွာ ဆန္ဒပြနေသူတချို့အပြင် ဆန္ဒပြသူတွေကို အစားအသောက် ကူညီပေးနေသူတွေကိုပါ အတင်းဖမ်းဆီး ခေါ်ဆောင်တာတွေ ပျဉ်းမနားနာရီစင်အနီးမှာလည်း ဆန္ဒပြသပိတ်စစ်ကြောင်းမှ ပါဝင်သူတချို့ကို ဖမ်းဆီးခေါ်ဆောင်တာတွေ အနည်းဆုံး နေရာ ၃ နေရာမှာ လုပ်ခဲ့တာကြောင့်၊ လူ ၂၀၀ ကျော် ဖမ်းဆီးခံခဲ့ရပါတယ်။

ဒီလို ဖမ်းဆီးခေါ်ဆောင်ခံရသူတွေထဲ ပြန်လွတ်လာသူ အသက် ၃၈ နှစ်အရွယ် အမျိုးသားကတော့ သူတို့ကို လွှတ်လိုက်ပေမဲ့ သူ့အနေနဲ့ စစ်အာဏာသိမ်းမှုကို ဆက်လက်ဆန့်ကျင်တိုက်ပွဲဝင်သွားဖို့ရှိတယ်လို့ ပြောပါတယ်။ ဖမ်းဆီးခံရတဲ့ အခြေအနေနဲ့ သူကြုံတွေ့ရတာ တွေနဲ့ပတ်သတ်လို့ သူကအခုလို ဗွီအိုအေကိုပြောပါတယ်။

"ကျနော်တို့ ဆန္ဒထုတ်ဖော်ရင်း ပါသွားတာပါ။ စစ်ပါတယ်။ ကျနော်တို့ကို မင်းတို့လုပ်ချင်လည်း လုပ်လို့ရတယ်။ မလုပ်ချင်လည်း နေပေါ့။ ဒါပေမဲ့ မင်းတို့ လုပ်ရတာ တန်လား... ကျနော်တို့ကို မေးပါတယ်။ ကျနော်တို့ကို မေးတာမှာ စစ်ထောက်လှမ်းရေးက မေးတာမှာ နည်းနည်း အော်ဟောက်ပြီးတော့ မေးတာမျိုးတွေ၊ ဘာတွေတော့ ရှိပါတယ်။ ကျန်တဲ့ချိန်ဆက်ဆံတာကတော့ ကောင်းပါတယ်။ ကျန်တဲ့အချိန်ထမင်းကျွေးတာကလည်း အဆင်ပြေပါတယ်။ တခြားသူတွေမှာ ထိခိုက်ဒဏ်ရာရတာလည်း တွေ့တယ်။ ရှိလည်းရှိတယ်။ ဆိုင်ကယ်တွေနဲ့ ဖမ်းတာမှာ တွန်းလှဲ ဖမ်းတာမျိုးတို့ ရှိပါတယ်။ တချို့တွေ ခြေထောက်တွေ ယောင်တာရှိပါတယ်။ ကျနော်တို့ကတော့ ရှေ့ဆက်လုပ်မှာပါ။ ရှေ့ဆက် ဆန္ဒထုတ်ဖော်မှာပါ။ ကျနော်တို့ဆက်လုပ်မယ်။ ကျနော်တို့ ပေးဆပ်ရတာ တန်ပါတယ်။"

လွတ်လာသူတွေကို သီးခြားခံဝန်အနေနဲ့ ထိုးခိုင်းတာမျိုးတော့ မရှိဘူးလို့ သူကပြောပါတယ်။

စစ်အာဏာသိမ်းမှုကို ကန့်ကွက်တဲ့ ဆန္ဒပြမှုတွေ နိုင်ငံအနှံ့ လုပ်နေပေမဲ့ အကြမ်းဖက်ဖြိုခွင်းခံံရတဲ့မြို့တွေထဲ နေပြည်တော်လည်း ပါဝင်ပါတယ်။ ဖေဖော်ဝါရီလ ၉ ရက်နေ့တုန်းက ဆန္ဒပြသူတွေကို ပစ်ခတ်နှိမ်နင်းတာကြောင့် ၁၉ နှစ်အရွယ် မိန်းကလေးတဦး သေနတ် ကျည်မှန်ပြီး ဆေးရုံမှာ ကွယ်လွန်ခဲ့ပါတယ်။ စစ်ကောင်စီကတော့ ဒီထိမှန်တဲ့ကျည်ဆံဟာ လုံခြုံရေးတပ်တွေဆီက မဟုတ်ဘဲ ပြင်ပကလာတယ်လို့ ငြင်းဆန်ထားပါတယ်။


ေမခ/ VOA Burmese

https://burmese.voanews.com/a/naypyitaw-military-coup-protester-released/5789540.html

"နှစ်" ငါးလုံးနေ့ နေပြည်တော်မှာ ဖမ်းခံရသူများ ပြန်လည်လွတ်မြောက် "နှစ်" ငါးလုံးနေ့ နေပြည်တော်မှာ ဖမ်းခံရသူများ ပြန်လည်လွတ်မြောက် Reviewed by THITHTOOLWIN on 22:34 Rating: 5

No comments:

Powered by Blogger.