အမေရိကန်တဝှမ်း မြန်မာစစ်အာဏာသိမ်းဆန့်ကျင်ရေး ဆန္ဒပြပွဲတွေ အရှိန်မြင့် ပြုလုပ်

ဝါရှင်တန်ဒီစီ မြန်မာ စစ်သံရုံးရှေ့ စစ်အာဏာသိမ်း ဆန့်ကျင် ဆန္ဒပြပွဲ

မြန်မာနိုင်ငံမှာ စစ်တပ်က အာဏာသိမ်းထားတဲ့ကိစ္စကို ဆန့်ကျင်ဖို့နဲ့ ပြည်တွင်းက ငြိမ်းချမ်းတဲ့ ဆန္ဒပြလှုပ်ရှားမှုတွေကို ထောက်ခံအားပေးဖို့ အမေရိကန်ပြည်ထောင်စုရောက် မြန်မာတွေ ပြည်နယ်တချို့မှာ တနင်္ဂနွေနေ့က ထပ်မံ ဆန္ဒပြကြတဲ့အကြောင်း ကိုဉာဏ်ဝင်းအောင် စုစည်းတင်ပြ ထားပါတယ်။

ဝါရှင်တန်ဒီစီမြို့တော် မြန်မာစစ်သံရုံးရှေ့ ဆန္ဒပြပွဲကိုတော့ ကရင်တိုင်းရင်းသားတွေနဲ့ ချင်းတိုင်းရင်းသားအဖွဲ့အစည်းတွေအပြင် အခြားမြန်မာနိုင်ငံသားတွေလည်း လာရောက်ကြပြီး လူရာကျော် ရှိတယ်လို့ ဆန္ဒပြပွဲမှာ ကိုယ်တိုင်သတင်းယူနေတဲ့ VOA သတင်းထောက် မအင်ကြင်းနိုင်က ရှင်းပြပါတယ်။

" ဟုတ်ကဲ့ အခုဆန္ဒပြပွဲကတော့ မေရီလန်း ဗာဂျီးနီးယား ဝါရှင်တန်ဒီစီ တဝိုက်မှာနေတဲ့ တိုင်းရင်းသားနွယ်ဖွားတွေ မြန်မာနွယ်ဖွားတွေ လာရောက်ပူးပေါင်း ဆန္ဒပြနေကြတာ ဖြစ်ပါတယ်။ လူအင်အား အနည်းဆုံး၂၀၀ လောက် ရှိပါတယ်။ နောက်ပြီးတော့ ဒီပွဲရဲ့ ထူးခြားချက်က အထူးသဖြင့် ချင်းတိုင်းရင်းသားတွေကနေ ဦးဆောင်ပြီးကျင်းပတဲ့ နေရာမှာ မြန်မာနွယ်ဖွားတွေကလည်း စုစုစည်းစည်းနဲ့ ပါဝင်လာကြတယ်။ နောက်ပြီး လူငယ်မျိုးဆက်သစ်တွေလည်း အများကြီး တွေ့ရပါတယ်။ ဒီနေ့ဆန္ဒပြပွဲမှာ မနက်ပိုင်းကဆိုရင် ပြည်နယ်ပေါင်းစုံကလာတဲ့ ကရင်တိုင်းရင်းသားတွေလည်း ဒီမှာ ဆန္ဒပြကြပါတယ်။ မြန်မာနိုင်ငံမှာ စစ်အာဏာ သိမ်းလိုက်တဲ့အပေါ် သူတို့ မခံမရပ်နိုင်ဖြစ်လို့ ပူးပေါင်းပါဝင်တာဖြစ်တယ်ဆိုပြီး VOA ကို ပြောပါတယ်။ သူတို့ပြောတဲ့အထဲမှာ လက်ရှိ မြန်မာနိုင်ငံက လမ်းမတွေပေါ် မကြောက်မရွံ့ ဆန့်ကျင်ဆန္ဒပြတာတွေနဲ့ အတူပေါ့နော် တညီတညွတ်ထဲရှိတယ်ဆိုတာ ပြသတဲ့အနေနဲ့ သူတို့ခုလိုလာပြီး ဆန္ဒပြကြတာ ဖြစ်ပါတယ်။ "

" အခု ဒီဆန္ဒပြပွဲမှာပါတဲ့ မေရီလန်းပြည်နယ်က ကိုရင်အေးက ဆန္ဒပြပွဲအတွင်း သူတို့ တောင်းဆိုချက်တွေကို ခုလို ပြောပါတယ်။ "

" မြန်မာနိုင်ငံမှာ မတရား စစ်အာဏာသိမ်းမှုကို ကျနော်တို့ အနေနဲ့ လုံးဝ လက်မခံကြောင်း ၊ မတရား ဖမ်းဆီးထားတဲ့ ပြည်သူ့ခေါင်းဆောင် ဒေါ်အောင်ဆန်းစုကြည်နဲ့ သမ္မတကြီး ဦးဝင်းမြင့်အပါအဝင် ပြည်သူ့ ကိုယ်စားလှယ်တွေအားလုံး အမြန်ဆုံးပြန်လွှတ်ပေးဖို့ ကျနော်တို့ တောင်းဆိုပါတယ်။ ဒါ့အပြင် ပြည်တွင်းမှာ တိုက်ပွဲဝင်နေကြတဲ့ ပြည်သူလူထုရဲ့ လှုပ်ရှားမှုအားလုံးနဲ့ ကျနော်တို့ တသားတည်းရှိကြောင်း၊ အားလုံးကို အပြည့်ဝ ထောက်ခံကြောင်း ၊ လိုအပ်တာကို တတ်နိုင်သမျှ အစွမ်းကုန် ကျနော်တို့ဆောင်ရွက်သ ွားမယ်။ အထူးသဖြင့်တော့ ပြည်သူ့လွှတ်တော် ကိုယ်စားပြုကော်မတီကို ကျနော်တို့ အပြည့်အဝ ထောက်ခံကြောင်း လာရောက်ဆန္ဒဖေါ်ထုတ်တာ ဖြစ်ပါတယ်။ "

တက္ကဆက်ပြည်နယ် အော်စတင်မြို့မှာရှိတဲ့ ပြည်နယ်လွှတ်တော် အဆောက်အဦရှေ့ ဆန္ဒပြပွဲနဲ့ ပတ်သက်လို့ ချင်းတိုင်းရင်းသား ဂျိုးဇက် ပန်ဂယို့ ပြောတာက -

" စစ်အစိုးရက မတရား အနိုင်ကျင့်ပြီးတော့မှ အာဏာသိမ်းလိုက်တာကို ကျနော်တို့ ဆန့်ကျင်နေတာဖြစ်တယ်။ နောက်ပြီး ဒီစစ်အစိုးရရဲ့ နောက်မှာ အထောက်အပံ့ လုပ်ပေးနေတဲ့ တရုတ်နဲ့ ရုရှားကိုလည်း ကျနော်တို့ ရှုတ်ချရင်းဆန္ဒပြတာဖြစ်တယ်။ အထူးသဖြင့် ကျနော်တို့ မြန်မာနိုင်ငံရဲ့ ဒီမိုကရေစီ လွတ်လပ်ခွင့်ကို ကျနော်တို့ ပြန်လိုချင်လို့ ခုလို ဆန္ဒပြကြတာဖြစ်ပါတယ်။ မြန်မာနိုင်ငံထဲက ဆန္ဒပြပြည်သူတွေ အားမလျော့နဲ့ အားမငယ်ပါနဲ့ .. ကမ္ဘာအနှံ့မှာ ရောက်နေတဲ့ မြန်မာနိုင်ငံသားတွေဟာ ခင်ဗျားတို့နဲ့အတူတူ တိုက်ပွဲဝင်နေပါတယ်။ "

မြန်မာ့ ဒီမိုကရေစီရေးကို အစဉ်တစိုက် ထောက်ခံအားပေးတဲ့ အမေရိကန် အထက်လွှတ်တော်အမတ် Mitch McConnell ရဲ့ ကန်တပ်ကီပြည်နယ် Louisville မြို့က ရုံးရှေ့ ဆန္ဒထုတ်ဖေါ်ပွဲမှာ ပါဝင်သူ ဆလိုင်းဌေးအောင်မနာ့ က ခုလိုပြောပါတယ်။

" ယူအက်စ် အထက်လွှတ်တော်အမတ် မစ်ရှ်-မက်ကောနားရဲ့ ရုံးရှေ့မှာ ကျနော်တို့ ဆန္ဒပြတာ ဖြစ်တယ်။ မြန်မာပြည်မှာ အာဏာသိမ်းတာကို ကန့်ကွက်ဆန္ဒပြတာဖြစ်တယ်။ လွှတ်တော်အမတ် မစ်ရှ်-မက်ကောနား ကနေတဆင့် အမေရိကန်အစိုးရသော်၎င်း ဒီနိုင်ငံတကာ ဒီမိုကရေစီ အင်အားစု နိုင်ငံတွေကနေတဆင့် မြန်မာစစ်အစိုးရကို ဖိအားပေးရေး လိုချင်လို့ ဆန္ဒပြရတာပါ။ "

မြောက်ကယ်လိုရိုင်းနားပြည်နယ် ရှားလေ့ာမြို့ မြို့တော်ခမ်းမရှေ့မှာ ဆန္ဒပြနေကြတဲ့အကြောင်းကိုတော့ မြန်မာ့အရေးလှုပ်ရှားသူ ကိုထက်ဇော်က ပြောပြပါတယ်။

" ဒီက တိုင်းရင်းသားပေါင်းစုံကလည်း သူတို့ရဲ့ဘာသာစကားနဲ့ရော ဗမာလိုရော နောက်ပြီးတော့ နိုင်ငံခြားသားတွေလည်း ပါတယ်ပေါ့နော်။ သူတို့ရဲ့ခံစားချက်တွေနဲ့ အကုန်လုံး ဒီမှာလာပြီး ဆန္ဒပြကြတာပါ။ လူဦးရေ အားလုံးပေါင်း ၁,၂၀၀ လောက်ရှိမယ်။ စစ်အာဏာသိမ်းမှုကို ကျနော်တို့ လက်မခံဘူး။ ဖမ်းဆီးထားတဲ့ ကျနော်တို့ရဲ့ အရွေးချယ်ခံ ခေါင်းဆောင်တွေကို ပြန်လလွှတ်ပေးရေး အဓိက တောင်းဆိုပါတယ်။ နောက်ပြီး မြန်မာပြည်ထဲမှာ အင်တာနက်ရော ဖုန်းတွေကအစ မတရား နှိပ်ကွပ် ပိတ်ပင်ခံနေရတဲ့ကိစ္စကို နိုင်ငံတကာကလည်း သိအောင်လို့ တင်ပြနေတာပါ။ "

အင်ဒီယားနားပြည်နယ် အင်ဒီယာနာပုလိဇ်မြို့ World Memorial အရှေ့မှာ လူထောင်ကျော်နဲ့ ဆန္ဒပြခဲ့ကြောင်း နိုင်ငံရေးတက်ကြွ လှုပ်ရှားသူ ဒေါက်တာ ရိုဒင်းငါက ပြောပါတယ်။

" စစ်အုပ်စုက မတရား အာဏာသိမ်းယူတာကို ဆန့်ကျင်တဲ့အနေနဲ့ အင်ဒီယားနားပြည်နယ်ရေဂာက် မြန်မာပြည်သားတွေက ဘာအဖွဲ့အစည်းရယ်လို့ မဟုတ်ပဲနဲ့ Free Myanmar Campaign USA ဆိုပြီးမှ ဖွဲ့လိုက်တယ်။ ဒီနေ့က ဒုတိယမြောက် ဆန္ဒပြပွဲလုပ်တာပါ။ လူ(၁,၀၀၀)ကျော်လောက် လာတာ တွေ့ရပါတယ်။ ကျနော်တို့က ဖိနှိပ်ခံ မြန်မာ ပြည်သူပြည်သားတွေနဲ့အတူ ရပ်တည်နေတယ်ဆိုတာကို ပြသတယ်။ ကုလသမဂ္ဂ အပါအဝင် အမေရိကန်ပြည်ထောင်စုက ပြည်သူလူထုရယ်၊ လွှတ်တော်ကိုယ်စားလှယ်တွေရယ် သမ္မတ ဂျိုးဘိုင်ဒန်ကအစ စစ်အာဏာရှင် ပြုတ်ကျရေးအတွက် ဆောင်ရွက်ပေးဖို့ ကျနော်တို့ တောင်းဆိုတယ်။ "

ဆန်ဖရန်စစ္စကို UN Plaza ရှေ့ စစ်အာဏာသိမ်း ဆန့်ကျင်ရေးဆန္ဒပြပွဲ

အမေရိကန် အနောက်ဖက်ခြမ်း ဆန်ဖရန်စစ္စကိုမြို့က ကုလသမဂ္ဂ UN Plaza ရှေ့ ဆန္ဒပြပွဲမှာ ပါဝင်သူ အမျိုးသမီးတဦး ပြောတာက -

" အမေစုအတွက် တိုက်ပွဲလာဝင်တာပါ။ အမေစု ကျန်းမာပြီး တိုင်းပြည်အတွက် ပိုပြီးတော့ အလုပ်လုပ်နိုင်ပါစေ။ မြန်မာပြည်ကြီး တိုးတက်တာ မြင်ချင်ပါတယ် နောက်ထပ် စစ်ဖိနပ်အောက်မှာ ပြားပြားမဝပ်ဖို့အတွက် ဒီမှာ အလေးအနက်ထား ဆန္ဒထုတ်ဖေါ် နေပါတယ်။ "

ဆန်ဖရန်မြို့ ဆန္ဒပြပွဲမှာ လူ(၁,၀၀၀)ဝန်းကျင် လာရောက်ကြပြီး နောက်တပတ် စနေနေ့ ဒီနေရာမှာပဲ ထပ်မံ ဆန္ဒပြကြဖို့ရှိတယ်လို့ သိရပါတယ်။

ကိုဉာဏ်ဝင်းအောင်/ VOA Burmese

https://burmese.voanews.com/a/burmese-protest-in-us/5768431.html