နှိပ်ကွပ်မှုအတွက် အထက်အမိန့်အရလို့ ဆင်ခြေပေးတာ လက်မခံနိုင် (ကုလလူ့အခွင့်အရေး ကိုယ်စားလှယ်)

ကုလသမဂ္ဂရဲ့ မြန်မာ့ လူ့အခွင့်အရေးဆိုင်ရာ အထူးသံတမန် Tom Andrews

မြန်မာပြည်မှာ စစ်အာဏာသိမ်းမှု၊ နောက် ဆန္ဒပြသူတွေကို ဖိနှိပ်ချုပ်ချယ်မှုတွေ အတွက် စစ်တပ်ရဲ့ကွပ်ကဲမှု အဆင့်ဆင့်က တာဝန်ခံရမှာ ဖြစ်ကြောင်း ကုလသမဂ္ဂရဲ့ မြန်မာ့ လူ့အခွင့်အရေးဆိုင်ရာ အထူးသံတမန် Tom Andrews က သတိပေးလိုက်ပါတယ်။ အထက်က ညွှန်ကြားချက် အရ အမိန့်အရ ဆိုတာနဲ့ ဆင်ခြေပေးလို့ မရဘူးလို့လည်း AFP နဲ့ တွေ့ဆုံမေးမြန်းခန်းမှာ ပြောပါတယ်။

“အောက်ခြေအဆင့် တာဝန်ရှိသူဘဲဖြစ်ဖြစ်၊ စစ်သားတဦးဘဲ ဖြစ်ဖြစ်၊ လမ်းပေါ်က လူတဦးဦးဘဲ ဖြစ်ဖြစ် အထက်က ခိုင်းလို့ လုပ်ရတာပါဆိုပြီး ဆင်ခြေ ပေးလို့ မရဘူးဆိုတာကို သိရပါမယ်။ အဲဒါနဲ့ အကြောင်းပြလို့ မရပါဘူး။ ဘယ်အဆင့်က လူဘဲ ဖြစ်ဖြစ် တာဝန်ယူရ တာဝန်ခံရပါမယ်။ အားလုံးက စောင့်ကြည့်နေပါတယ်” လို့ ကုလသမဂ္ဂရဲ့ မြန်မာ့ လူ့အခွင့်အရေးဆိုင်ရာ အထူးသံတမန် Tom Andrews က ပြောဆိုခဲ့တာပါ။

ဖမ်းထားတဲ့ ဒေါ်အောင်ဆန်းစုကြည်၊ နောက် သမ္မတ ဦးဝင်းမြင့်တို့ကို ဒီသီတင်းပတ် အတွင်း ဗွီဒီယို ကွန်ဖရင့်နဲ့ တရားရုံးက ကြားနာမယ့် ကိစ္စဟာလည်း တရားမျှတမှု ရှိမယ်လို့ မယုံကြည်ကြောင်း သူက ပြောပါတယ်။

“တရားရေး လုပ်ငန်းစဉ်က မျှတမှု ရှိမယ်လို့ မမျှော်လင့်ပါဘူး။ အာဏာသိမ်း စစ်အုပ်စုဟာ တရားမျှတမှု ဆိုတာ မရှိပါဘူး။ ဒါက လုပ်ဇာတ်ပါ။ ဘယ်သူမှလည်း သူတို့ကို မယုံပါဘူး” လို့ ကုလသမဂ္ဂရဲ့ မြန်မာ့ လူ့အခွင့်အရေးဆိုင်ရာ အထူးသံတမန် Tom Andrews က ပြောဆိုခဲ့တာပါ။

ဖေဖော်ဝါရီလ ၁ ရက်နေ့က အရပ်သား အစိုးရ ခေါင်းဆောင်တွေကို ဖမ်းပြီး အာဏာယူခဲ့တဲ့ စစ်ကောင်စီက သူတို့ကို စစ်အာဏာသိမ်းတယ်လို့ မသုံးဖို့ ထုတ်ပြန်ထားတာပါ။ ဒါပေမယ့်လည်း မြန်မာပြည်တွင်း ဆန္ဒပြသူတွေကလည်း စစ်အာဏာသိမ်း အဖွဲ့လို့ သုံးနှုန်းဆန့်ကျင်နေကြသလို အမေရိကန် ပြည်ထောင်စုကလည်း စစ်အာဏာသိမ်းမှု အဖြစ် သတ်မှတ်ထားတာပါ။

ဗွီအိုအေ (မြန်မာပိုင်း)

https://burmese.voanews.com/a/myanmar-special-rapporteur-tom-andrews-/5779374.html