အင်တာနက် ထိန်းချုပ်မယ့်ဥပဒေ ပြဌာန်းဖို့ စစ်ကောင်စီပြင်ဆင်နေ

မြန်မာနိုင်ငံမှာ အာဏာသိမ်းယူထားတဲ့ စစ်ကောင်စီက ဆိုင်ဘာလုံခြုံရေး ဥပဒေတရပ်ကို မကြာခင် ထုတ်ပြန်နိုင်ဖို့ ပြင်ဆင်နေပါတယ်။ Cyber Security Law ဆိုပြီး အင်တာနက် အွန်လိုင်းဆက်သွယ်မှုတွေအပေါ် ထိန်းချုပ်မယ့် ဥပဒေမူကြမ်းကို ကွန်ပျူတာပညာကျွမ်းကျင်သူတွေ၊ ဆက်သွယ်ရေးဆိုင်ရာ လုပ်ငန်းလုပ်နေတဲ့ လုပ်ငန်းရှင်တွေကို ဖြန့်ဝေထားပြီး ဖေဖော်ဝါရီ ၁၅ ရက်နေ့မတိုင်ခင် ဥပဒေမူကြမ်းထဲက ပြင်ဆင်သင့်တာတွေ ပြောဖို့ ညွှန်ကြားထားပါတယ်။

အဲဒီဥပဒေဟာ သတင်းအချက်အလက် ဖြန့်ဝေမှုတွေကိုထိန်းချုပ်ပြီး ကန့်သတ်ချက် ချိုးဖောက်သူတွေကို အရေးယူမယ့် ဥပဒေဖြစ်တယ်လို့ ပြည်တွင်းက နည်းပညာကျွမ်းကျင်သူတွေက ထောက်ပြနေကြပါတယ်။ အင်တာနက်ဆက်သွယ်ရေးကို ထိန်းချုပ်နိုင်ဖို့ လိုအပ်တဲ့နည်းပညာရပ်ဆိုင်ရာ အထောက်အကူတွေကို တရုတ်နိုင်ငံကနေ မှာယူ တင်သွင်းခဲ့ပြီး အင်တာနက်ဆက်သွယ်ရေးနဲ့ ဝန်ဆောင်မှုလုပ်ငန်းကုမ္ပဏီတွေဆီ ပေးပို့တပ်ဆင်ခိုင်းနေပြီလို့ ရန်ကုန်မြို့က ဆိုင်ဘာလုံခြုံရေး ကျွမ်းကျင်သူပညာရှင်တယောက်က VOA မြန်မာပိုင်းကိုပြောပါတယ်။

စစ်အုပ်ချုပ်ရေးအဖွဲ့က အင်တာနက်အသုံးပြုမှုကို အကြီးအကျယ် ကန့်သတ်မယ့် internet firewall အတွက် တရုတ်အစိုးရက မြန်မာနိုင်ငံကို စက်ကိရိယာတွေနဲ့ ကျွမ်းကျင်သူတွေကို ပို့ပေးနေတဲ့ သတင်းက မမှန်ဘူးလို့ တရုတ်နိုင်ငံခြားရေးဌာန ပြောခွင့်ရ Wang Wenbin က ဗုဒ္ဓဟူးနေ့သတင်းစာရှင်းပွဲမှာတုံးက ငြင်းဆန်ထားပါတယ်။

"မြန်မာနိုင်ငံနဲ့ဆက်နွယ်ပြီး တရုတ်နဲ့ပတ်သက်တဲ့ သတင်းမှားတွေ၊ ကောလဟာလတွေ အရင်ကလည်း ထွက်ခဲ့ဖူးပါတယ်။ အဲဒီလို မမှန်ကန်တဲ့ပြောဆိုမှုတွေကို လွယ်လွယ် မယုံပါနဲ့" လို့ တရုတ်နိုင်ငံခြားရေးဌာနပြောခွင့်ရက ပြောသွားတာဖြစ်ပါတယ်။

မြန်မာနိုင်ငံမှာ ဆိုင်ဘာလုံခြုံရေးဥပဒေ ထုတ်တော့မယ်ဆိုတဲ့ သတင်းတွေနဲ့အတူ တရုတ်က ကုန်ပစ္စည်းသေတ္တာတွေ ရန်ကုန်လေဆိပ်ရောက်လာတဲ့ ပုံတွေ ထွက်ပေါ်လာခဲ့ပါတယ်။ အဲဒါတွေဟာ အင်တာနက်ဆက်သွယ်မှု ပိတ်ပင် ကန့်သတ်ရေးမှာ အသုံးပြုဖို့ ပစ္စည်းတွေလို့ သတင်းတွေ ထွက်ခဲ့ပြီးနောက် တရုတ်က ခုလို ငြင်းဆန်တာဖြစ်ပါတယ်။

VOA (မြန်မာပိုင်း)

https://burmese.voanews.com/a/cyber-myanmar-coup-tatmadaw-internet-/5774219.html