မြန်မာ့ငွေကြေးနဲ့ ရွှေစျေးကွက် လှုပ်ခတ်

ရန်ကုန်မြို့ရှိ ရွှေဆိုင်တခုမှာ တွေ့ရတဲ့ မြင်ကွင်း။ (စက်တင်ဘာ ၀၁၊ ၂၀၁၀)

မြန်မာနိုင်ငံမှာ စစ်တပ်က အာဏာသိမ်းလိုက်ပြီးနောက် စိုးရိမ်မှုတွေနဲ့အတူ ကုန်စျေးနှုန်းတွ မတည်မငြိမ်ဖြစ်လာနေရာမှာ အမေရိကန်ဒေါ်လာနဲ့ ရွှေစျေးဟာလည်း စံချိန်တင်မြင့်တက်လာနေပါတယ်။ အာဏာသိမ်းမှု နောက်ဆက်တွဲ စီးပွားရေးမှာ ရိုက်ခတ်လာတဲ့ အခြေအနေတွေကို ဗွီအိုအေမြန်မာပိုင်းသတင်းထောက် အဂ္ဂနွန်က တင်ပြပေးပါမယ်။

အရပ်သားအစိုးရ ထိပ်တန်းခေါင်းဆောင်တွေကို ထိန်းသိမ်းလိုက်ပြီး တပ်မတော်က အာဏာသိမ်းလိုက်ပြီးနောက် နိုင်ငံရေးအခြေအနေ မရေမရာ ဖြစ်နေချိန်မှာပဲ စီးပွားရေးမှာလည်း ရိုက်ခတ်လာနေပါတယ်။ အထူးသဖြင့် ဒီရက်ပိုင်းမှာပဲ လက်ရှိသုံးစွဲနေတဲ့ ငွေကြေးတွေထဲက တချို့ကို ဖျက်သိမ်းဖို့ ပြင်ဆင်နေတယ်ဆိုတဲ့ အတည်မပြုနိုင်တဲ့ သတင်းတွေ ပျံ့နှံ့ခဲ့ရာက တန်ဖိုးခိုင်မာတဲ့ ရွှေနဲ့ အမေရိကန်ဒေါ်လာတွေကို အလုအယက် ဝယ်ယူလာကြတာလို့လည်း လုပ်ငန်းရှင် အသိုင်းအဝန်းက ပြောပါတယ်။

စိုးရိမ်စိတ်နဲ့ ရွှေနဲ့ ဒေါ်လာတွေကို ဝယ်ယူသူများလာတာကြောင့် ရွှေစျေးတွေ အဆမတန်တက်လာတာလို့လည်း မန္တလေးတိုင်း ရွှေလုပ်ငန်းရှင်များအသင်း ဥက္ကဋ္ဌ ဦးဝင်းစိန်က ပြောပါတယ်။

“လူတွေက စိတ်ပူတယ်ပေ့ါနော်၊ ဘဏ်ကို ငွေ စိတ်မချတာတို့.... မနက်က ၁၀,၀၀၀ တန်ကောလာဟာလကြောင့်မို့ ဖြစ်သွားတာ မနေ့ကစတာ ၁၃,၃၅၀,၀၀၀ စတာ အဲဒီလို မနေ့က နောက်ဆုံးအပိတ်တော့ ၁၃,၅၀၀,၀၀၀ ပိတ်တယ်။ အခုက ဒီမနက် ၁၃,၆၆၀,၀၀၀ စတယ်။ အခု ၁၄,၀၀၀,၀၀၀ အထိဖြစ်တယ်။”

ဒီကနေ့ ရန်ကုန်နဲ့ မန္တလေးရဲ့ အပိတ်စျေးကတော့ အခေါက်ရွှေ တကျပ်သားကို ကျပ် ၁,၄၁၀,၀၀၀ ရှိပါတယ်။ အာဏာမသိမ်းခင် ဇန်နဝါရီလ ၃၀ ရက်နေ့ အပိတ်စျေးနဲ့ နှုန်းယှဉ်ရင်တော့ ၉၀,၀၀၀ နီးနီး မြင့်တက်လာပါတယ်။

ဇန်ဝါရီလ ၃၀ ရက်နေ့က ပြင်ပပေါက်စျေး ငွေလဲနှုန်း အမေရိကန် တဒေါ်လာကို မြန်မာကျပ်ငွေ ၁,၃၄၀ ရှိခဲ့ရာက၊ ဒီကနေ့မှာတော့ ကျပ်ငွေ ၁,၄၅၀ စျေးပေါက်ခဲ့တာကြောင့် ၃ ရက်အတွက် ကျပ် ၁၀၀ ကျော် စျေးတက်ခဲ့တာပါ။

မြန်မာနိုင်ငံမှာ နိုင်ငံရေးအခြအနေတွေ မရောရာမှုတွေနဲ့အတူ စီးပွားရေးနဲ့ ငွေကြေးတန်ဖိုးတွေ မတည်မငြိမ်ဖြစ်လာနေတာလို့လည်း စီးပွားရေးပညာရှင် ဦးဇော်ဖေဝင်းက ပြောပါတယ်။

“ပြည်တွင်းအခြေအနေက သိတဲ့အတိုင်းပဲ၊ ပြည်တွင်းမှာ နိုင်ငံရေးအခြေအနေ မတည်ငြိမ်မှုရှိတဲ့ အတွက်ကြောင့်မို့လို့ လူတွေက ထုံစံအတိုင်းပေါ့နော်၊ အထူးသဖြင့်တော့ စိတ်ချရတဲ့ ပစ္စည်းဘာညာဝယ်ကြတာ... ဒါကငွေကြေးတတ်နိုင်တဲ့ သူတွေ ငွေကြေးများများရှိတဲ့ လူတွေပေါ့၊ အဲ့ဒါဝယ်ကြတာပေါ့။ နိုင်ငံရေး မတည်မှုရှိတယ်။ နောက်တစ်ခါ ငွေရေးကြေးရေးကို စိတ်မချတဲ့ သဘောလည်းပဲ တချို့ပါတာပေါ့။”

နိုင်ငံရေး အခြေအနေတွေကြောင့် စီးပွားရေးမှာ ရိုက်ခတ်မှုတွေ ရှိလာနိုင်တဲ့အတွက် တာဝန်ရှိသူတွေ ပြင်ဆင်ထားဖို့ လိုတယ်လို့လည်း စီးပွားရေးပညာရှင် ဦးဇော်ဖေဝင်းက သုံးသပ်ပါတယ်။ အထူးသဖြင့် အုပ်ချုပ်မှုစနစ် အပြောင်းအလဲမှာ ကုန်စျေးနှုန်း မတည်ငြိမ်မှုတွေ ဖြစ်လာနိုင်တာကြောင့် တည်ငြိမ်အောင် ကြိုးပမ်းဖို့လိုတယ်လို့လည်း ပြောပါတယ်။

“အခုမှာ ဗဟိုဘဏ်လည်းပဲ ဥက္ကဋ္ဌပြောင်း ဘာညာစသည်ဖြင့် ဖြစ်နေတော့ ချက်ချင်းတော့ ဒီကိစ္စကို ကိုင်တွယ်နိုင်မယ်လို့မထင်သေးဘူး။ ဒါပေမဲ့ တစ်ခုရှိတာက ဒီဗဟိုဘဏ်ရဲ့ မူလပေါ်လစီပေါ့နော်။ အခုတော့ ပေါ်လစီပြောင်းကောင်းပြောင်းတယ်။ မူလပေါ်လစီမှာက

ဒေါ်လာစျေး တည်ငြိမ်အောင်လုပ်တယ်ဆိုပြီးတော့ သူတို့လုပ်တဲ့ ဥစ္စာတွေက ဒေါ်လာစျေးကို ၁,၃၀၀ ကျော်ကျော် ပတ်ဝန်းကျင်လောက်ရှိနေတာကို ဒေါ်လာစျေး တည်ငြိမ်တယ်လို့ သူတို့သတ်မှတ်တာရှိတယ်။ အဲ့ဒီလိုသတ်မှတ်တဲ့အတွက်ကြောင့်မို့လို့ ဒေါ်လာစျေးတက်တဲ့ အပေါ်မှာ သူတို့ သိပ်ပြီးအလေးတကြီးထားပြီးတော့ အရေးတကြီးထားပြီးတော့ပေါ့နော်။ ဒါကိုထိန်းသိမ်းတာမျိုး မရှိတတ်ဘူး။ အဲ့ဒီလိုတွေ့ရတယ်။ အခုဒီဥက္ကဋ္ဌအပြောင်းအလဲကြောင့် မူဝါဒလည်းပဲ ပြောင်းမယ်ဆိုလို့ရှိရင်တော့ ဒေါ်လာစျေးချင်ဟာ ခုဏပြောသလို တိုင်းသူပြည်သားအတွက်ရော၊ လုပ်ငန်းရှင်တွေအတွက်ရော ထိခိုက်နိုင်တဲ့အတွက်ကြောင့် အဲ့ဒီဒေါ်လာစျေးတက်တဲ့ ဥစ္စာကို ဘယ်လိုထိန်းချုပ်မလဲဆိုတာကတော့ သူတို့မူဝါဒချပြီးတော့ လုပ်ရမယ်။”

အာဏာသိမ်းလိုက်တဲ့ တပ်မတော်ကတော့ နိုင်ငံတော်စီမံအုပ်ချုပ်ရေးကောင်စီအဖြစ် တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင် ဦးဆောင်ပြီး မနေ့တုန်းကပဲ ဖွဲ့စည်းလိုက်သလို၊ တိုင်းနဲ့ပြည်နယ်မှာလည်း အုပ်ချုပ်ရေးကောင်စီတွေကို ဖွဲ့စည်းပေးလိုက်ပါတယ်။ ဒီမတိုင်ခင်မှာတုန်းကလည်း အရပ်သားအစိုးရအဖွဲ့ကို ဖျက်သိမ်းလိုက်ပြီး အစိုးရအဖွဲ့သစ်ကို ဖွဲ့စည်းလိုက်ကြောင်းလည်း ကြေညာထားပါတယ်။

အဂ္ဂနွန်/ VOA Burmese

https://burmese.voanews.com/a/myanmar-old-and-us-dollar/5763699.html