မူဆယ်မြို့တွင်း တိုက်ခိုက်မှုဖြစ်ပွား

ပစ်ခတ်ခံရတဲ့ မူဆယ်မြို့က ဟိုတယ်။ (ဓာတ်ပုံ - Shan Herald News Agency - ဖေဖော်ဝါရီ ၂၄၊ ၂၀၂၁)

ရှမ်းပြည်နယ် မူဆယ်မြို့မှာ ရှိတဲ့ ပြည်သူ့စစ်ပိုင်ဟိုတယ်နဲ့ မြန်မာစစ်တပ်စခန်း တခုကို လက်နက်ကိုင် အဖွဲ့တဖွဲ့ကနေ ဒီမနက်မှာ ပစ်ခတ်တိုက်ခိုက်မှု ဖြစ်ပွါးခဲ့တယ်လို့ မူဆယ်ဒေသခံတွေကပြောပါတယ်။ ဒီအကြောင်း ဗွီအိုအေမြန်မာပိုင်းသတင်းထောက် ကိုနိုင်ကွန်းအိန်ကနေပြောပြပေးမှာပါ။

ဖေဖော်ဝါရီ ၂၄ ရက် ဒီမနက်ပိုင်းမှာ မူဆယ်မြို့အတွင်း တာမိုးညဲပြည်သူ့စစ်ပိုင်ဟိုတယ်နဲ့ ကောင်းမူးတုံရပ်ကွက်မှာ ရှိတဲ့ မြန်မာစစ်တပ်စခန်း တခုကို တိုင်းရင်းသားလက်နက်ကိုင် အဖွဲ့တဖွဲ့ကနေ နှစ်နေရာ ပစ်ခတ်တိုက်ခိုက်ခဲ့တယ်လို့ မူဆယ်ဒေသခံဦးစိုင်းတစ်ကပြောပါတယ်။

“ဒီမနက်လေ လက်နက်ကိုင်အုပ်စု တအုပ်စုက ကျနော်တို့ မူဆယ်မှာ ဒီမနက် ၄ နာရီကနေ ၅ နာရီထိုးခါနီး အဲဒီ အချိန်လောက်တုန်းကပေါ့။ လက်နက်ကြီးတွေနဲ့ လာပစ်တယ်လေ။ လာပစ်တာက ဒီစွမ်စော်ရပ်ကွက်မှာ ရှိတဲ့ တာမို ညဲပြည်သူ့ စစ်ပိုင်ဟိုတယ်နဲ့ သူတို့အိမ်ကို လာပစ်တယ်။ အဲဒါက ပြည်သူ့စစ်ပိုင်။ အများစုကတော့ အဲဒီ ဟိုတယ်က လောင်းကစားရုံရှိတယ်။ ပြည်သူ့စစ်ပိုင်တယ်လို့တော့ ကျနော်တို့ သိထားကြတယ်လေနော်။ နောက်ပြီးတော့မှ ကောင်းမူးတုံမှာ ရှိတဲ့ အစိုးရတပ်စခန်း တခုကိုလည်း လာပစ်တာပေါ့နော်။”

ဒီပစ်ခတ်မှုဖြစ်စဉ်အတွင်း ထိခိုက်မှုအခြေအနေကိုတော့ မူဆယ်ဒေသခံ ဦးစိုင်းတစ်က အခုလိုဆက်ပြောပါတယ်။

“ထိခိုက်မှုအခြေအနေကတော့ အဲဒီမှာ ရှိတဲ့ပြည်သူ့ စစ်အိမ်တအိမ်ထိမှန်တယ်။ နောက်ပြီးတော့မှ အဲဒီဟိုတယ်ရဲ့ မှန်တွေကွဲတယ်။ တပ်ကနေပြန်ကူပစ်တဲ့နေရာမှာ အပြင်ကနေ လာတိုက်တဲ့အဖွဲ့ကနေ နှစ် ယောက် သေတယ်လို့တော့ပြောကြတယ်။ အခုလာပစ်တာကတော့ ကျနော်တို့တဆင့်ကြားရတာကတော့ KIA တပ်လို့ ပြောကြတယ်။”

တာမိုးညဲပြည်သူ့စစ်ပိုင်ဟိုတယ်ကို ဦးတည်တိုက်ခိုက်လာတဲ့ အဓိကအကြောင်းရင်းကိုတော့ မူဆယ်မြို့ခံ ဦးသောင်းထွန်းက အခုလိုပြောပါတယ်။

“ပစ်ခတ်မှုအခြေအနေက သူတို့ဆက်ကြေးမပေးလို့ ဝင်ရောက်ပစ်ခတ်တာလို့တော့ပြောတယ်။ စွမ်စော်ရပ်ကွက်မှာ ရှိတဲ့ ဟိုတယ်ဆက်ကြေးကောက်တယ်လို့တော့ကြားတယ်ဗျ။”

မူဆယ်မြို့အတွင်း ပစ်ခတ်တိုက်ခိုက်ခံရမှု အခြေအနေကို သိရှိဖို့ မူဆယ်မြို့မရဲစခန်းကိုဆက်သွယ်မေးမြန်းခဲ့ပေမဲ့ ဖြေကြားခြင်း မရှိခဲ့ပါဘူး။

ဒီပစ်ခတ်မှုဟာ KIO ကချင်လွတ်လပ်ရေးအဖွဲ့ကလို့ ဒေသခံတချို့က ယူဆနေကြတာရှိပေမဲ့ KIO ပြောခွင့်ရ ဗိုလ်မှူးကြီးနော်ဘူကတော့ ဒီမနက်ပစ်ခတ်မှု အခြေအနေ မသိရသေးပေမဲ့ မူဆယ်မြို့နယ်ဘက်မှာ KIA နဲ့ မြန်မာစစ်တပ်တို့အကြား တိုက်ပွဲရက်ဆက်ဖြစ်နေကြောင်းပြောပါတယ်။

“အဲဒါကတော့ ကျနော် သေချာမကြားရသေးပါဘူး။ အောက်ခြေသတင်းက မတက်ဘူး... အဲဒီကိစ္စကတော့။ ဒါပေမဲ့ တပ်မတော်ကတော့ ကျနော်တို့ရဲ့တပ်မဟာ ၆ ပေါ့နော်။ တပ်ရင်း ၉ နယ်မြေဘက်မှာ သူတို့စစ်ဆင်ရေး လုပ်တာတော့ ၄ ရက်လောက်ရှိပြီ။ ဒီနေ့နဲ့ဆိုရင်တော့ ၄ ရက်လောက်ရှိတယ်... အဲဒီမှာတိုက်ပွဲဖြစ်တာ။”

ဒီရက်ပိုင်းအတွင်း မူဆယ်မြို့နယ်အစပ် ဒီမာကျေးရွာနဲ့ ကွတ်ခိုင်မြို့နယ် နမ့်ကွတ်ကျေးရွာအနီးမှာ တိုက်ပွဲဖြစ်ပွားတာရှိခဲ့တယ်လို့ ဗိုလ်မှူးကြီးနော်ဘူက ဆိုပါတယ်။

မူဆယ်မြို့အတွင်း တိုင်းရင်းသားပြည်သူ့စစ်အဖွဲ့တွေရဲ့ စီးပွါးရေးလုပ်ဆောင်နေတဲ့ ဟိုတယ်နေရာတွေ မကြာခဏ တိုက်ခိုက်ခံရမှုတွေ ရှိနေပေမဲ့ ဘယ်အဖွဲ့လက်ချက်ဖြစ်ကြောင်းထုတ်ဖော်ပြောတာတော့ မရှိသေးပါဘူး။

လက်ရှိ ရှမ်းပြည်နယ်မြောက်ပိုင်းဒေသမှာ တပ်မတော်က COVID 19 ရောဂါတိုက်ဖျက်ရေးနဲ့ ငြိမ်းချမ်းရေးအတွက် ဒီလကုန်ထိ အပစ်ရပ်ကြောင်း ကြေညာထားပေမဲ့ မူဆယ်နဲ့ကွတ်ခိုင်ဘက်မှာ KIO အဖွဲ့နဲ့ တိုက်ပွဲဖြစ်ပွါးနေသလို နမ္မတူနဲ့ ကျောက်မဲဘက်မှာလည်း တအာင်းပလောင်တပ်ဖွဲ့TNLA နဲ့ တောင်ပိုင်းရှမ်းပြည်တပ်မတော် RCSS တို့အကြား စစ်ရေးတင်းမာနေဆဲဖြစ်ပြီး ထောင်နဲ့ချီတဲ့ ရွာသားတွေ စစ်ဘေးတိမ်းရှောင်နေရပါတယ်။

ကိုနိုင်ကွန်းအိန်/ VOA Burmese

https://burmese.voanews.com/a/muse-shan-conflicts/5790748.html