တနင်္သာရီတိုင်းတွင်း စစ်အာဏာဆန့်ကျင်ရေးဆန္ဒပြမှုများ ဖြိုခွဲခံရ

ထားဝယ်မြို့မှာ စစ်တပ်အာဏာသိမ်းမှုကို ဆန့်ကျင်ဆန္ဒပြသူတွေကို မီးခိုးဗုံးခွဲပြီး ဖြိုခွဲ (၀၂၊ ၂၇၊ ၂၀၂၁)

မြန်မာပြည်တောင်ပိုင်း၊ တနင်္သာရီတိုင်းဒေသကြီး ထားဝယ်မြို့နဲ့မြို့မှာ စစ်အာဏာသိမ်းမှုကိုဆန့်ကျင်ဆန္ဒပြတဲ့ လူထုသပိတ်ဖြိုခွင်းခံရပြီး လုံခြုံရေးတပ်ဖွဲ့တွေရဲ့ပစ်ခတ်မှုကြောင့် ဆန္ဒပြသူ (၆) ဦးဒဏ်ရာရရှိပြီး (၇) ဦးခန့် အဖမ်းရတယ်လို့ ဆန္ဒဖော်ထုတ်ပွဲမှာပါတဲ့သူတွေက ပြောပါတယ်။ ဗွီအိုအေမြန်မာပိုင်းသတင်းထောက် နိုင်ကွန်းအိန်ကနေ သတင်းပေးပို့ထားပါတယ်။

တနင်္သာရီတိုင်းဒေသကြီးဘက် ဖေဖေါ်ဝါရီလ ၂၇ ရက်၊ ဆန္ဒဖော်ထုတ်နေသူတွေကို လုံခြုံရေးတပ်ဖွဲ့တွေက မျက်ရည်ယိုဗုံးတွေ၊ ရာဘာကျည်တွေနဲ့ပစ်ခတ်မှုကြောင့် ဒဏ်ရာရသူရှိခဲ့သလို အဖမ်းအဆီးတွေလည်း ရှိနေတာပါ။ ဒီနေ့မနက် အစောပိုင်းမှာ ထားဝယ်မြို့က ဆန္ဒပြလူအုပ်တွေရဲ့သပိတ်စစ်ကြောင်းကို ရဲတပ်ဖွဲ့တွေက ဖြိုခွင်းရာမှာ ထိခိုက်ဒဏ်ရာရသူတွေရှိခဲ့ကြောင်း ဆန္ဒဖော်ထုတ်ပွဲမှာပါဝင်သူ လူငယ်တဦးက ပြောပါတယ်။

“ကျနော်တို့ ပထမစစ်ကြောင်းက ပုံမှန်အတိုင်းပဲ ဆုံနေကျနေရာရှိပါတယ်။ ဒီနေ့မနက်ကျ အဲဒီစုရပ်မှာ ရဲတပ်ဖွဲ့က လာပြီးစောင့်နေ တာပေါ့ နော်။ …ဆိုတော့ အဲဒီနေရာမှာ သပိတ်စခန်းစုလို့မရတော့ဘူး။ တခြားနေရာမှာသွားစုပြီးတော့မှ ဆန္ဒပြသပိတ် ထွက်သွားတာပေါ့နော်။ ကရပ်ပြင်လမ်းဆုံကိုရောက်တော့ ရဲတပ်ဖွဲ့ရောက်လာပြီး မျက်ရည်ယိုဗုံးတွေနဲ့ပစ်တယ်။ ရာဘာကျည်နဲ့စပစ်တာပေါ့။ စပစ်တော့ မနက် ၈ နာရီ၊ ၄၅ မိနစ်လောက်ရှိပြီ။ သေနတ်ဖောက်တာ ဆယ်ချက်လောက်ရှိတယ်။ ဒရစပ်ပစ်တာပေါ့နော်။ အဲဒီမှာ ခန လူစုကွဲသွားတယ်။ ဒါပေမယ့် ခနအတွင်းမှာပဲ သပိတ်စစ်ကြောင်း ပြန်ပြီးတော့ လူစုမိသွားတယ်။ ပြန်ချီတက်ကြတော့ အဲဒီမှာ လူစုခွဲကြတယ်။ အဲဒီနောက်မှာ ရဲတပ်ဖွဲ့က ဥတ္တံတားကြီးလမ်းဆုံကို ထပ်ရောက်လာတာပေါ့နော်။ အဲဒီမှာ တချို့ ကျန်ခဲ့တဲ့လူတွေက ဆန္ဒထပ်ပြကြတာမျိုးဆိုတော့ အဲဒီဥတ္တံတားကြီးလမ်းဆုံမှာ ထပ်ပစ်တယ်။ အဲဒီမှာတော့ မီးခိုးဗုံးတွေ မသုံးတော့ဘူး။ ရာဘာကျည်တွေနဲ့ပစ်တယ်။ ဒဏ်ရာရတဲ့သူတွေကတော့ အခုချိန်ထိ သိရတာကတော့ ၈ နှစ်၊ ၉နှစ်လောက်ရှိတဲ့ ကလေးလေးရှိတယ်။ နောက် ဆန္ဒပြသပိတ်စစ်ကြောင်းမှာ ဦးဆောင်တဲ့သူတွေလည်း ပါတယ်ပေါ့နော်။ အနည်းဆုံးတော့ (၆) ယောက်လောက်ရှိတယ်လို့ သိရတယ်။”

ထားဝယ်မြို့ ၊ ကရပ်ပြင်လမ်းဆုံမှာရှိတဲ့သပိတ်စစ်ကြောင်းကိုရဲတပ်ဖွဲ့က ပထမအကြိမ် ဖြိုခွင်းပစ်ခတ်အပြီး လူစုကွဲသွားတဲ့ လူအုပ်ကို ဥတ္တံတားကြီးလမ်းဆုံမှာ ထပ်မံပစ်ခတ်ခဲ့တယ်လို့ အဆိုပါလူငယ်ကပြောပါတယ်။ မျက်ရည်ယိုဗုံးကြောင့် ထိခိုက်ထားသူတွေကိုတော့ ထားဝယ်မြို့ဇမ္ဗူသီရိအရေးပေါ်လူနာကူညီသယ်ဆောင်ရေး အဖွဲ့က ဆေးကုသပေးနေပါတယ်။

ဒီဆန္ဒပြမှု ဖြိုခွင်းရာမှာ လူတဦးကိုလည်း လုံခြုံရေးတပ်ဖွဲ့က နေဖမ်းဆီးခဲ့တယ်လို့ သူကဆိုပါတယ်။

“ဥတ္တံတားကြီးလမ်းဆုံမှာလည်း လူတယောက်အဖမ်းခံရတာပေါ့နော်။ လောလောဆယ်သိရတဲ့အခြေအနေကတော့ အဲဒီလောက် ပါခင်ဗျ။”

အလားတူမြိတ်မြို့မှာလည်းဒီကနေ့ လူထောင်နဲ့ချီဆန္ဒပြခဲ့ရာမှာ ကျောင်းဆရာမ (၄) ဦးအပါဝင် (၆) ဦးဖမ်းဆီးခံရတယ်လို့ အထွေထွေသပိတ်ဝန်းရံသူ ဦးအေးမြင့်က ပြောပါတယ်။

“လမ်းကြောင်းတွေပိတ်ထားတော့ ဆန္ဒပြပြီးလို့ ဖြုတ်လိုက်တဲ့အချိန်မှာ အဲဒီကောင်တွေက ဝင်ဆွဲတာ။ (၁၀) နာရီကျော်ကျော်လောက်။ သူတို့ သပိတ်ကြီးကိုခွဲလိုက်တာလေ။ သပိတ်ရပ်ပစ်လိုက်တာ။ ရပ်ပြီးတာနဲ့ သူတို့ လူခွဲတဲ့အချိန်မှာ အတင်းဝင်ဆွဲတာပေါ့။ ကျောင်းဆရာမ (၄) ဦးကတော့ အဖမ်းခံရတယ်။ တခြားအမျိုးသား ၂) ယောက်ပါသွားတယ်ပြောတယ်။ အမျိုးသား (၂) ယောက်က ဒီအနားမှာ အလုပ်လုပ်နေတဲ့ အလုပ်သမား(၂)ယောက်။”

မြိတ်မြို့ အတွင်း နောင်လယ့် (၁၁)လမ်းမှာ သပိတ်ဖြိုခွင်းခံရပြီး လူ (၆) ဦးအဖမ်းခံထားရတယ်လို့ သူကဆိုပါတယ်။

လက်ရှိ ထားဝယ်မြို့နဲ မြိတ်မြို့အတွင်း သပိတ်ဦးဆောင်သူတွေအနေနဲ့ လုံခြုံရေးအခြေအနေအရ တိမ်းရှောင်နေရတယ်လို့ ဦးဆောင်သူတွေကဆိုပါတယ်။

ဖေဖော်ဝါရီလ ၁ ရက်နေ့ မနက်ပိုင်းက ပြည်ထောင်စုသမ္မတမြန်မာနိုင်ငံတော်သမ္မတရုံးက အမိန့် ကြေညာစာအမှတ် ၁/၂၀၂၁ နဲ့ အရေးပေါ်အခြေအနေကြေညာခဲ့ပြီး နိုင်ငံတော်ရဲ့ အုပ်ချုပ်ရေး၊ ဥပဒေပြုရေး တရားစီရင်ရေးလုပ်ငန်းတွေကို တပ်မတော် ကာကွယ်ရေး ဦးစီးချုပ်ထံ အာဏာလွှဲပြောင်းလိုက်ကြောင်းကြေညာခဲ့ပါတယ်။

တပ်မတော်ကနေ အာဏာထိန်းသိမ်းခဲ့ပြီးတဲ့နောက်မှာ နိုင်ငံတော်အတိုင်ပင်ခံပုဂ္ဂိုလ်၊ သမ္မတအပါအဝင် ပြည်ထောင်စုအစိုးရအဖွဲ့ဝင်တွေ၊ တိုင်းနဲ့ပြည်နယ်ဝန်ကြီးချုပ်တွေနဲ့အစိုးရအဖွဲဝင်တွေ၊ လွှတ်တော်ကိုယ်စားလှယ်တွေ ထိန်းသိမ်းခံခဲ့ရသလို တိုင်းနဲ့ပြည်နယ်အားလုံးမှာ ကန့်ကွက်သပိတ်မှောက်ဆန္ဒပြမှုတွေရှိနေပြီး ဖမ်းဆီးတာတွေလည်း တိုးလာနေပါတယ်။

ကိုနိုင်ကွန်းအိန်/ VOA Burmese

https://burmese.voanews.com/a/dawei-thaninthayi-military-coup-protests/5795114.html