မြန်မာစစ်အာဏာသိမ်းမှု ထိုင်းဝန်ကြီးချုပ်တုံ့ပြန်ချက်

ထိုင်းဝန်ကြီးချုပ်၊ ဗိုလ်ချုပ်ကြီးဟောင်း ပရာယုသ် ချန်-အိုချာ။

မြန်မာ့ဒီမိုကရေစီရေးကို ထောက်ခံအားပေးပါလို့ စစ်အာဏာသိမ်းခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပန်ကြားထားတဲ့ စာတစ်စောင်ကို သူ လက်ခံရရှိခဲ့တဲ့အကြောင်း ထိုင်းဝန်ကြီးချုပ်၊ ဗိုလ်ချုပ်ကြီးဟောင်း ပရာယုသ် ချန်-အိုချာက ဒီကနေ့ပြောပါတယ်။

ဝန်ကြီးချုပ် ပရာယုသ်က သူ့အနေနဲ့ အိမ်နီးချင်း မြန်မာနိုင်ငံရဲ့ ဒီမိုကရေစီရေးကို အမြဲ ထောက်ခံ အားပေးပါတယ်လို့ ဘန်ကောက်မြို့မှာ သတင်းထောက်တွေကိုပြောပါတယ်။

"မြန်မာနိုင်ငံရဲ့ ဒီမိုကရေစီနည်းကျ လုပ်ငန်းစဉ်ကို ကျနော်တို့ ထောက်ခံပါတယ်။ ဒါပေမဲ့ ဒီကနေ့မှာ အရေးအကြီးဆုံးက ကောင်းမွန်တဲ့ဆက်ဆံရေးကို ထိန်းသိမ်းထားဖို့ပါ၊ ဘာကြောင့်လဲဆိုတော့ လူထု၊ စီးပွားရေးနဲ့ အထူးသဖြင့် နယ်စပ်ကုန်သွယ်ရေးတို့ကို ထိခိုက်တာကြောင့်ဖြစ်ပါတယ်။" လို့ ဝန်ကြီးချုပ် ပရာယုသ်ကပြောပါတယ်။

"ဒီမိုကရေစီနည်းကျ လုပ်ငန်းစဉ်ကို ထိုင်းနိုင်ငံက ထောက်ခံပါတယ်။ ဘယ်လို ဆက်လုပ်မယ်ဆိုတဲ့ ကျန်တဲ့အပိုင်းကတော့ သူ့ပေါ်မူတည်ပါတယ်။" လို့လည်း ပရာယုသ်ကဆိုပါတယ်။

ဝန်ကြီးချုပ် ပရာယုသ်ဟာ သူကိုယ်တိုင်က ၂၀၁၄ ခုနှစ်မှာ ရွေးကောက်ခံဝန်ကြီးချုပ်ကို ဖြုတ်ချပြီး အာဏာသိမ်းခဲ့သူဖြစ်ပြီးတော့ ၂၀၁၉ ခုနှစ်မှာ ရွေးကောက်ပွဲလုပ်ပြီး အာဏာဆက်ယူထားသူပါ။ အဲဒီရွေးကောက်ပွဲဟာ မသမာမှုတွေနဲ့ ပြည့်နှက်နေတယ်လို့ အတိုက်အခံတွေက ဝေဖန်ထားပါတယ်။

ဝန်ကြီးချုပ် နုတ်ထွက်ပေးဖို့ တောင်းဆိုတဲ့ဆန္ဒပြပွဲတွေလည်း ပြီးခဲ့တဲ့နှစ်ကဖြစ်ခဲ့ပြီး ဆယ်စုနှစ်တွေအတွင်း အကြီးမားဆုံး ဆန္ဒပြပွဲတွေဖြစ်ခဲ့ပါတယ်။

မြန်မာနဲ့ထိုင်း နှစ်နိုင်ငံကြား ဆက်ဆံရေးမှာ အဆင်မပြေဖြစ်ခဲ့တဲ့ သမိုင်းကြောင်းရှိခဲ့ပေမယ့်လည်း မကြာသေးခင် ဆယ်စုနှစ်တွေအတွင်းမှာတော့ စစ်တပ်နှစ်ခုကြား အလုပ်သဘော ဆက်ဆံရေးကောင်း ရှိလာခဲ့ပြီး ဗိုလ်ချုပ်မှူးကြီးမင်းအောင်လှိုင်ဟာလည်း ထိုင်း ထိပ်ပိုင်းခေါင်းဆောင်တချို့နဲ့ နီးစပ်တဲ့ဆက်ဆံရေး ရှိထားသူဖြစ်ပါတယ်။


ဗွီအိုအေ (မြန်မာပိုင်း)

https://burmese.voanews.com/a/myanamr-military-coup-thai/5772686.html

မြန်မာစစ်အာဏာသိမ်းမှု ထိုင်းဝန်ကြီးချုပ်တုံ့ပြန်ချက် မြန်မာစစ်အာဏာသိမ်းမှု ထိုင်းဝန်ကြီးချုပ်တုံ့ပြန်ချက် Reviewed by THITHTOOLWIN on 19:14 Rating: 5

No comments:

Powered by Blogger.