တောင်ဥက္ကလာဖမ်းဆီးမှု မကျေနပ်သူတွေ စုရုံးကန့်ကွက်

 

မြန်မာနိုင်ငံမှာ စစ်အာဏာသိမ်းမှုကို ဆန့်ကျင်တဲ့ ဆန္ဒပြပွဲတွေ ရက်အတန်ကြာ ဖြစ်ပေါ်ခဲ့ပြီး အဲဒီနောက်ဆက်တွဲအဖြစ်နဲ့ လုံခြုံရေးတပ်ဖွဲ့တွေက နေအိမ်တွေမှာ လိုက်လံ ဖမ်းဆီးမှုတွေ ဒီ တရက်၊ နှစ်ရက်အတွင်း ရက်အတွင်းမှာ ဆက်တိုက်ဆိုသလို ပြုလုပ်လာနေတာမှာ မနေ့ညက တောင်ဥက္ကလာမြို့နယ်၊ (၇) ရပ်ကွက်က ရဲစခန်းကို မြို့ခံလူထုက ဝိုင်းဝန်း ဆန္ဒပြတဲ့အထိ အခြေအနေတွေ တင်းမာမှု ဖြစ်သွားခဲ့ပါတယ်။ အပြည့်အစုံကိုတော့ ကိုဇော်ဝင်းလှိုင်က တင်ပြပေးပါမယ်။

ရန်ကုန်မြို့၊ တောင်ဥက္ကလာမြို့နယ်က (၇) ရပ်ကွက်မှာနေထိုင်တဲ့ ဟိန်းမင်းအောင် ဆိုတဲ့ Facebook အကောင့်ပိုင်ရှင်က သူတို့အိမ်ကို ညဘက် အချိန်မတော်မှာ ရဲတွေ၊ ရာအိမ်မှူးတွေ ရောက်လာပြီး ဖမ်းဝရမ်းပြ ဖမ်းတဲ့ကိစ္စကို တိုက်ရိုက် ထုတ်လွှင့်ပြသတာက ရဲစခန်းရှေ့မှာ လူတွေရာနဲ့ချီပြီး ဆန္ဒပြတဲ့အခြေအနေအထိ ကြီးထွားသွားခဲ့တာပါ။

“ရာအိမ်မှူး ။ ။ ငါတို့ခေါ်နေတာ မကြားဘူးလား

ဖြေ။ ။ ဒီအချိန်က အိပ်နေပြီလေ။

ရာအိမ်မှူး ။ ။အိပ်နေရင်လည်း အရေးကြီးလို့ခေါ်ရတာ … ငါရာအိမ်မှူးပဲ တံခါးဖွင့်ပေး

ေျဖ။။ ဘာကိစၥလဲ

ရာအိမ်မှူး။ ။ကိစ္စရှိလို့ တံခါးဖွင့်ခိုင်းတာ

ဖြေ။။ ဘာကိစ္စတုန်း ၊ ဘာကိစ္စရှိလို့လဲ ဒီအချိန်ကြီးကတော့ မဖြစ်လို့ပါ။ ဘာဖြစ်လို့လဲ တချက်လောက်ပြောပါ။

ရဲ ။ ။ ညီလေး တချက်လောက် လာပါလား၊ အကိုက တောင်ဥက္ကလာရဲစခန်းက ရဲအရာရှိပါ။ ညီလေးနာမည်က။

ရဲ ။ ။ တောင်ဥက္ကလာမြို့နယ်တရားရုံးက အမှု ၇၅ အရ ညီလေးတို့ကို ပုဒ်မ ၅၀၅ ခ အရ အမှုဖွင့်ထားတဲ့အတွက် အကိုတို့ လာခေါ်တာပါ။ တကယ်လို့ ညီလေးအနေနဲ့ ဒီ ပုဒ်မ က ထောင်ဒဏ်နဲ့ ငွေဒဏ်နဲ့ ရှိတယ်။”

အသက် ၂၄ နှစ်ရှိပြီဖြစ်တဲ့ ကိုဟိန်းမင်းအောင်ဟာ ဂူတဝါဟန ဂိုဏ်းချုပ်အဖြစ် သူ့ကိုယ်သူ ကြေညာထားသူ ဖြစ်ပါတယ်။ သူ့ဂိုဏ်းဟာ အမောင့်ပရောဂါနဲ့ လောကအစီအစဉ်တွေနဲ့ဆိုင်တဲ့ အဆောင်အယောင်တွေကို အွန်လိုင်းမှာ ရောင်းချနေတာလည်း ဖြစ်ပါတယ်။

ဖေဖော်ဝါရီလ ၁ ရက်နေ့က မြန်မာနိုင်ငံမှာ စစ်တပ်က အာဏာသိမ်းလိုက်ပြီးနောက်ပိုင်း သူ့ဂိုဏ်းသဘောအရ မယ်တော်တဦးကို တိုင်တည်ပြီး စစ်အစိုးရကို ကျိန်တဲ့စာတွေ၊ နိုင်ငံတော်ကို မကောင်းတဲ့သူတွေလက်က ကာကွယ်ပေးဖို့အပြင် ဆေးဖယောင်းထွန်းပြီး ကြိမ်စာတိုက် ဆုတောင်းဖို့ တိုက်တွန်းထားတဲ့ စာတွေကို သူ့အကောင့်ပေါ်မှာ တင်ခဲ့တယ်လို့ ဆိုပါတယ်။ ဒါပေမယ့် အဲဒီ Post ကတော့ အခုသူအကောင့်မှာ မရှိတော့ပါဘူး။

သူ့ကို ဖမ်းဖို့လာတဲ့သူတွေထဲက ရာအိမ်မှူးဆိုသူကလည်း လူမှုကွန်ယက်မှာ သူအဲဒီလို တင်ထားတဲ့ဟာတွေကြောင့် အခုလို ဖမ်းဖို့လာရတဲ့အကြောင်း ပြောဆိုခဲ့ပါတယ်။

ဖမ်းမယ်ဆိုလဲ အခုလို ညကြီးအချိန်မတော်၊ အထူးသဖြင့် ကာဖြူးထုတ်ထားတဲ့အချိန်ကြီးမှာ ဖမ်းဖို့မသင့်တော်တာကြောင့် မနက်လင်းမှ လာဖမ်းဖို့ ပြောပေမယ့် နောက်ဆုံး တံခါးချိုးဝင်မယ်ဆိုပြီး လုပ်တဲ့အချိန်မှာ သူ့ဘက်က အလျော့ပေးပြီး အဖမ်းခံခဲ့တာပါ။

သူ့အပေါ် ဆွဲတဲ့အမှုနဲ့ ပုဒ်မနဲ့ ဘယ်လိုမှမဟပ်စပ်တဲ့အတွက် အဲဒါကို Facebook ကနေ တိုက်ရိုက်ကြည့်နေသူ တော်တော်များများက မကျေမချမ်းဖြစ်ပြီး ရဲစခန်းရှေ့မှာ သွားဆန္ဒပြကြတာမှာ အစပိုင်းမှာ လူက သိပ်မများပေမယ့် နောက်ပိုင်း တဖြည်းဖြည်းနဲ့ လူအုပ်က ၅၀၀ ကျော်လောက်အထိ ဖြစ်သွားခဲ့ပါတယ်။

“ဖယောင်းတိုင်တွေနဲ့ လာနေကြပါပြီ ။ ကျနော်တို့ ဖယောင်းတိုင်ထွန်းလို့ ဖမ်းမယ်ဆိုရင် …ဖယောင်းတိုင်ထွန်းရင် ဖမ်းမယ်ဆို …”

နောက် ဖယောင်းထွန်းလို့ ဖမ်းတယ်ဆိုရင် သူတို့လည်း ဖယောင်းတိုင်တွန်းတယ်။ သူတို့ကိုလည်း ဖမ်းပါဆိုပြီး ဆန္ဒပြနေသူ အတော်များများက အဲဒီ ရဲစခန်းရှေ့မှာဘဲ ဖယောင်းတိုင်တွေ ထွန်းကြတာအပြင် မတရား ဖမ်းဆီးခံထားရသူကို ပြန်လွှတ်ပေးဖို့ ကြွေးကြော်သံတွေ အော်ဟစ်ကြပါတယ်။

“ မတရားဖမ်းဆီးထားတဲ့ တို့ပြည်သူ… ချက်ချင်းလွှတ် ၊ ချက်ချင်းလွှတ်

မတရားဖမ်းဆီးထားတဲ့ တို့ပြည်သူ… ချက်ချင်းလွှတ် ၊ ချက်ချင်းလွှတ်

မတရားဖမ်းဆီးထားတဲ့ တို့ပြည်သူ… ချက်ချင်းလွှတ် ၊ ချက်ချင်းလွှတ်”

အဲဒီလို ဆန္ဒပြသူတွေရဲ့အသံတွေနဲ့ ဆူညံနေတဲ့ကြားမှာဘဲ အဖမ်းခံထားရသူရဲ့ မိခင်ဆိုသူ အမျိုးသမီးတယောက်လဲ ရောက်လာပြီး သူရောက်နေကြောင်း သူ့သားကို လှမ်းပြောတဲ့အသံကလည်း ကြွေးကြော်သံတွေ ဆူညံမှုတွေကြားက ထွက်လာခဲ့ပါတယ်။

“သားရယ် သားအမေ သားကို လာကြည့်နေတယ် သားရယ်။”

ဆန္ဒပြတဲ့နေရာမှာ ကိုယ်တိုင်ရောက်နေတဲ့ ကိုအောင်မြင့်မြတ်ကတော့ သူတို့အနေနဲ့ ဖမ်းထားတဲ့သူကို မလွတ်မချင်း ဆက်လက် တောင်းဆို ဆန္ဒပြသွားမယ်လို့ ဗွီအိုအေကို ပြောပါတယ်။

“နိုင်ငံတော် အကြည်အညိုပျက်စေမှု ပုဒ်မက ဖယောင်းတိုင်ထွန်းတာနဲ့ ဘယ်လို ဆက်စပ်သွားလဲဆိုတာတော့ ကျနော်တို့ မသိဘူး။ သူတို့ အဲလိုပြောတာကို ကျနော်တို့ နားနဲ့ကြားတာပါခင်ဗျ။ ကျနော်တို့ဆီမှာ လူအင်အားက ၃၊ ၄ ၊ ၅၀၀ နည်းနည်းခြင်းနဲ့ များလာတယ်ဆိုတော့ နည်းနည်းတော့ များလာတယ်ခင်ဗျ။ အကုန်လုံးလည်း ဖယောင်းတိုင်ထွန်းပြီးတော့ လွှတ်ပေးဖို့ တောင်းဆိုတာတွေ လုပ်နေပါပြီခင်ဗျ။ သူတို့ကတော့ လွှတ်ပေးဖို့ လုပ်လို့မရဘူး ၊ စအဖ ကနေပြီးတော့ ဖမ်းခိုင်းတယ်။ နောက်ပြီးတော့ တရားရုံးကနေပြီးတော့ ၀ရမ်းထုတ်ပြီးတော့ ဖမ်းခိုင်းတယ်ဆိုပြီးတော့ ပြောတယ်ခင်ဗျ။ အခုအချိန်ထိတော့ လွှတ်ပေးဖို့တော့ မမြင်သေးဘူးခင်ဗျ။ တဖြေးဖြေးနဲ့တော့ ဝန်းရံတဲ့လူကတော့ များလာပြီခင်ဗျ။ အများ ဆန္ဒကတော့ လွှတ်တဲ့အထိ မနက်မိုးလင်းတဲ့အထိ၊ အင်အားတွေ များလာမယ်လို့လည်း ယုံကြည်တယ် အဲဒီအထဲမှာ မလွှတ်မချင်းလည်း ထိုင်စောင့်မယ်လို့ အဲလိုတော့ တယောက်နဲ့တယောက် သဘောတူထားပါတယ်ခင်ဗျ။”

ကိုဟိန်းမင်းအောင်ကို အမှုဖွင့် တရားစွဲဆိုတဲ့သူဟာ ထွေအုပ်ဖြစ်ကြောင်း ရဲစခန်းရှေ့မှာ ဆန္ဒပြနေသူတွေကို လာရောက် စကားပြောခဲ့တဲ့ ရှေ့နေတဦးက ပြောပြခဲ့ပါတယ်။ ဒါပေမယ့် ဒီကိစ္စမှာ တရားသူကြီးအနေနဲ့ ဖမ်းဝရမ်းထုတ်ပေးပိုင်ခွင့် ရှိမရှိဆိုတာကို သူ့တို့ ပြန်လည် ဆန်းစစ်သွားမယ်လို့ ဆိုပါတယ်။

နောက်ဆုံးသိရတဲ့အခြေအချိန်အထိ ရဲစခန်းရှေ့မှာ တောင်းဆို ဆန္ဒပြမှုတွေ ဆက်လက် ပြုလုပ်နေကြဆဲ ဖြစ်တာကြောင့် မနက်မိုးလင်းလာတဲ့အချိန်မှာ ဆန္ဒပြမယ့်သူတွေ သူတို့နဲ့အတူ လာရောက် ပူးပေါင်းလာနိုင်ခြေ ရှိနေပါတယ်။

ကိုဇော်ဝင်းလှိုင်/ VOA Burmese

https://burmese.voanews.com/a/myanmar-arrest-south-okkala-police-station-protest-/5775499.html