မြန်မာအာဏာပိုင်တွေ ဖမ်းထားတဲ့ သြစတြေးလျ စီးပွားရေးပညာရှင်နဲ့တွေ့ခွင့်ရဖို့ ရှေ့နေကြိုးပမ်း

စီးပွားရေး ပညာရှင် Sean Turnell (ဓါတ်ပုံ- twitter)

စစ်အာဏာသိမ်းပြီး ၆ ရက်မြောက်နေ့မှာ ဖမ်းဆီးခံခဲ့ရတဲ့ သြစတေးလျ နိုင်ငံသား စီးပွားရေး ပညာရှင် Sean Turnell ကို ဘယ်မှာ ထိန်းသိမ်းထားသလဲ မသိရတဲ့ အတွက် နီးစပ်ရာ ရဲစခန်းတွေနဲ့ အကျဉ်းထောင်တွေမှာ လိုက်လံ စုံစမ်းနေရကြောင်း သူ့ရဲ့ ရှေ့နေက ဗွီအိုအေကို ပြောပါတယ်။ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ရဲ့ စီးပွားရေး အကြံပေး Sean Turnell အတွက် ရှေ့နေဆောင်ရွက်ပေးနေတဲ့ တရားလွှတ်တော်ရှေ့နေ ဦးသန်းဇော်အောင်က အင်းစိန်ထောင်မှာ သွားစုံစမ်းဖို့ ပြင်ဆင်နေကြောင်း ပြောပါတယ်။ မသိင်္ဂ ီထိုက် ဆက်သွယ်မေးမြန်းထားပါတယ်။

တရားလွှတ်တော်ရှေ့နေ ဦးသန်းဇော်အောင်။ ။ Sean Turnell အတွက် အမှုလိုက်ပါဆောင်ရွက်ပေးဖို့ ဆိုပြီးတော့ အကူအညီတောင်းထားတာ ၃-၄ ရက်ရှိပါပြီ။ ၃-၄ ရက်လောက်ရှိပြီဆိုတော့ ကျနော်က အဲဒါနဲ့ ပတ်သက်ပြီးတော့ အခက်အလက်တွေ ကျနော်စုနေတာပေ့ါနော်။ သတင်းဆောင်းပါးတွေ ကျနေ်ာဖတ်နေတယ် ဒါနဲ့ ပတ်သက်ပြီး ကျနော် trace လုပ်တဲ့အခါကျတော့ ပြဿနာက ဘယ်မှာ ဖမ်းထားတယ်ဆိုတာကို မသိရဘူး။ မသိရတဲ့အတွက် မိသားစုပြောကြားချက်အရပဲ ရန်ကုန် Chatrium ဟိုတယ်မှာ ၆ ရက်နေ့က ဖမ်းသွားတယ်ဆိုတော့ ကျနော်တာမွေရဲစခန်းတွေ၊ နောက်တခါ တခြားကြားရတဲ့ သတင်းအရ ဗဟန်း ရဲစခန်းတွေကို ကျနော်သွားမေးတယ်။ အဲဒီမှာ မရှိပါဘူးလို့ အကြောင်းကြားတယ်ပေါ့နော်။ အခု ကျနော် အင်းစိန်ထောင်ကို သွားဖို့အတွက်တော့ စီစဉ်နေပါတယ်။ သွားပြီးတော့ ရှေ့နေ ကိုယ်စားလှယ် လွှဲစာနဲ့ နောက်တခါ လူတွေ့ဆုံခွင့်ရဖို့အတွက်ပေါ့နော် အဲဒါ ကြိုးစားလုပ်နေပါတယ်။

မသိင်္ဂ ီထိုက်။ ။ ဟုတ်ကဲ့ ဆရာ အဲဒီတော့ သြစတေးလျသံရုံး ကရော သူဘယ်မှာ ရှိတယ်ဆိုတာ မသိဘူးလားရှင့်။

တရားလွှတ်တော်ရှေ့နေ ဦးသန်းဇော်အောင်။ ။ သံရုံးကတော့ ကျနော့်ကို Officially ဘယ်မှာ ရှိတယ်ဆိုတာ အကြောင်းကြားတာတော့ မရှိသေးဘူး။ အခုအချိန်ထိလည်း သူတို့ဆီက သံရုံးက မဆက်သွယ်သေးဘူးပေါ့နော်။

မသိင်္ဂ ီထိုက်။ ။ ဟုတ်ကဲ့ရှင့် ၊ ဆိုတော့ ဆရာက Sean Turnell အတွက် ရှေ့နေလွှဲစာတော့ ရပြီပေါ့နော် ဆရာ ဟုတ်ပါသလားရှင့်။

တရားလွှတ်တော်ရှေ့နေ ဦးသန်းဇော်အောင်။ ။ မိသားစုကတော့ ကျနော့်ကို သူ့အမျိုးသမီးကတော့ ဒီအမှု လိုက်ပါကူညီပေးဖို့အတွက်တော့ အကူအညီတောင်းထားပါပြီ။ ကျန်တဲ့အပိုင်းက ဆက်ပြီးတော့ ရှေ့နေ ကိုယ်စားလှယ် လွှဲစာကတော့ Mr. Sean Turnell ဆီကတော့ ရဖို့တော့ လိုသေးတာပေါ့နော်။

မသိင်္ဂ ီထိုက်။ ။ အမှုသည်ဘယ်မှာ ရှိတယ်ဆိုတာကို လွယ်လွယ်ကူကူစုံစမ်းနိုင်ပါ့မလား ၊ ဆရာတို့ တရားရေးကြောင်းအရ ဘယ်လိုလုပ်လို့ရပါသလဲ။

တရားလွှတ်တော်ရှေ့နေ ဦးသန်းဇော်အောင်။ ။ တရားရေးကြောင်းအရတော့ အခုကာလမှာတော့ နည်းနည်းလေး ခက်တယ်ခင်ဗျ။ ကျနော်ကိုယ်တိုင် ရဲစခန်းတွေ သွားတဲ့အခါမှာ သူတို့လည်း CDM ကိစ္စနဲ့ ရှုပ်နေတဲ့အခါကျတော့ နည်းနည်းလေး အပြင်လူကို တွေ့ဖို့အတွက် အရင်လိုတော့ မလွယ်ဘူးပေါ့ အဲလိုမျိုးရှိတယ်။ ကျန်တဲ့အပိုင်းကတော့ အင်းစိန်ထောင်ကိုတော့ ကျနော်တချက်ကြိုးစားကြည့်မှာပေါ့ လောလောဆည်တော့ အဲဒါ စီစဉ်နေပါတယ်။

မသိင်္ဂ ီထိုက်။ ။ ဟုတ်ကဲ့ရှင့် တကယ်လို့ အင်းစိန်မျာ မရှိဘူး ဆိုရင် ဆရာဘာဆက်လုပ်လို့ရပါမလဲ ရှင့်။

တရားလွှတ်တော်ရှေ့နေ ဦးသန်းဇော်အောင်။ ။ ဘာဆက်လုပ်လို့ရမလဲဆိုတော့ အဲဒါကတော့ ဥပဒေကြောင်းအရ ကျနော်လုပ်လို့ရတာတွေတော့ လုပ်သွားမှာပါနော်။ ကြိုတော့ ကျနော်ပြောဖို့ အဆင်မပြေဘူး ။

မသိင်္ဂ ီထိုက်။ ။ ဟုတ်ကဲ့ရှင့် အဲဒီတော့ ကျမ တခုလေး မေးချင်ပါတယ် ။ လူတယောက် အဖမ်းခံထားရတဲ့ ကိစ္စကို ဘယ်မှာ ဖမ်းထားသလဲဆိုတာက လွယ်လွယ်ကူကူ စုံစမ်းလို့မရတဲ့ အခြေအနေမျိုးများဖြစ်နေပါသလားရှင့်။

တရားလွှတ်တော်ရှေ့နေ ဦးသန်းဇော်အောင်။ ။ ဟုတ်တယ် အခုကတော့ လွယ်လွယ်ကူကူ စုံစမ်းလို့မရတဲ့ အခြေအနေမျိုးဖြစ်နေတာပေါ့။

မသိင်္ဂ ီထိုက်။ ။ဟုတ်ကဲ့ ဆရာတို့ ဥပဒေကြောင်းအရ ဘာများ လွယ်ကူအောင်လုပ်လို့ရပါသလဲဆရာ။

တရားလွှတ်တော်ရှေ့နေ ဦးသန်းဇော်အောင်။ ။ အရင်တုန်းကတော့ လူတယောက်ကို ဖမ်းသွားတယ်ဆိုတဲ့ အခြေအနေမျိုးမှာတော့ မသိဘူး ၊ လက်လှမ်းမမီနိုင်ဘူးဆိုရင် စာချွန်တော် ဆောင်ရွက်လို့ရတယ်။ အခုက အရေးပေါ်ကာလမျိုးမှာ စာချွန်တော် ကိစ္စတွေ ဆိုင်းငံ့ထားဖို့အတွက် အမိန့်စာတွေထုတ်ထားတော့ တခြားလုပ်စရာရှိတာတွေတော့ ကျနော် လုပ်သွားမှာပါ။

သြစတေးလျနိုင်ငံ ဆစ်ဒနီမြို့ Macquarie တက္ကသိုလ်က စီးပွာရေးဘာသာရပ်ဆိုင်ရာ ပါမောက္ခ Sean Trunell က နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည်ကို စီးပွားရေး မူဝါဒဆိုင်ရာ အကြံပေးနေသူ ဖြစ်ပါတယ်။ စစ်အာဏာသိမ်းမှု အတွင်း ဖမ်းခံရတဲ့ တဦးတည်းသော နိုင်ငံခြားသားလို့လည်း သိရှိထားရပါတယ်။ သူ အပါအဝင် စစ်အာဏာသိမ်းမှု အတွင်း ဖမ်းဆီးခံရသူတွေနဲ့ ပတ်သက်လို့တော့ ဘယ်မှာ ထိန်းသိမ်းထားသလဲ ဘယ်သူတွေကို ဖမ်းထားသလဲ ဆိုတာကို စစ်ကောင်စီက သတင်းမထုတ်ပြန်ပါဘူး။


ဗွီအိုအေ (မြန်မာပိုင်း)

https://burmese.voanews.com/a/sean-turnell-lawyer-voa-interview-/5790155.html

မြန်မာအာဏာပိုင်တွေ ဖမ်းထားတဲ့ သြစတြေးလျ စီးပွားရေးပညာရှင်နဲ့တွေ့ခွင့်ရဖို့ ရှေ့နေကြိုးပမ်း မြန်မာအာဏာပိုင်တွေ ဖမ်းထားတဲ့ သြစတြေးလျ စီးပွားရေးပညာရှင်နဲ့တွေ့ခွင့်ရဖို့ ရှေ့နေကြိုးပမ်း Reviewed by THITHTOOLWIN on 07:57 Rating: 5

No comments:

Powered by Blogger.