မြန်မာနိုင်ငံအတွက် အိန္ဒိယက လှူဒါန်းလိုက်တဲ့ COVID-19 ကာကွယ်ဆေးတွေ နိုင်ငံတဝန်းက ပြည်နယ် တိုင်းတွေဆီ မကြာခင် ရောက်ရှိလာတော့မှာဖြစ်လို့ ကာကွယ်ဆေးထိုးနှံရေး အစီအစဉ်တွေအတွက် ကြိုတင်ပြင်ဆင်နေကြပြီ ဖြစ်ပါတယ်။ ကာကွယ်ဆေး ဘယ်သူတွေကို ဦးစားပေးထိုးနှံမလဲ၊ ဘယ်လိုပြင်ဆင်မှုတွေ ဆောင်ရွက်နေပါသလဲ ဆိုတာကို ဗွီအိုအေမြန်မာပိုင်း သတင်းထောက် မဆုမွန်က ဆက်သွယ်မေးမြန်း တင်ပြထားပါတယ်။
အိန္ဒိယပြည်သူတွေနဲ့ အိန္ဒိယအစိုးရက မြန်မာနိုင်ငံအတွက် လက်ဆောင်အဖြစ် လှူဒါန်းလိုက်တဲ့ ဗြိတိန် အောက်စ်ဖို့တက္ကသိုလ်နဲ့ ဗြိတိန်-ဆွီဒင် AstraZeneca ကုမ္ပဏီတို့ ပူးတွဲသုတေသနလုပ်ပြီး အိန္ဒိယနိုင်ငံ Serum Institute က ထုတ်လုပ်တဲ့ ကာကွယ်ဆေးအလုံးပေါင်း ၁.၅ သန်း ဇန်နဝါရီလ ၂၂ ရက်နေ့က မြန်မာနိုင်ငံကို ရောက်ရှိလာပါပြီ။ ပထမအသုတ် အိန္ဒိယကလာတဲ့ ကာကွယ်ဆေး ၁ သန်းခွဲကို မြန်မာနိုင်ငံက လူဦးရေ ၇ သိန်းခွဲအတွက် လျာထားပြီး ကျန်းမာရေးဝန်ထမ်းတွေကို ဦးစားပေးထိုးနှံဖို့ စီစဉ်ထားတယ်လို့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောပါတယ်။
"တသန်းခွဲဆိုတော့ ကျမတို့ပြည်သူလူထု ၇ သိန်းခွဲအတွက် လုံလောက်ပါတယ်။ ဒီတော့ ကျမတို့ ပထမရမယ့်အသုတ်က ၇ သိန်းခွဲအတွက်ပဲဆိုတော့ ဘယ်လို ဒီကာကွယ်ဆေးတွေကို နိုင်ငံအတွက် အကောင်းဆုံးဖြစ်အောင် သုံးမလဲဆိုတာ ကျမတို့ အင်မတန်မှ အလေးထားပြီးတော့ စဉ်းစားရပါတယ်။ ဒီတော့ ပထမဦးဆုံး ဦးစားပေးရမှာတော့ ရှေ့တန်းမှာ လုပ်ဆောင်နေတဲ့ ကျမတို့ရဲ့ ကျန်းမာရေးဝန်ထမ်းတွေပါ။ ဒါတော့ ကျမတို့ ပြည်သူအားလုံးကလည်း သဘောတူလိမ့်မယ်လို့ ကျမယုံကြည်ပါတယ်။ ဒီကြားထဲမှာ ကာကွယ်ဆေးတွေ ထပ်ပြီးရောက်လာတာနဲ့အမျှ ကျမတို့ တဖြည်းဖြည်းနဲ့ တဆင့်ပြီးတဆင့် ရောဂါပြန့်ပွားမှုကို ကာကွယ်ဖို့အတွက် အရေးကြီးတဲ့နေရာမှာ ကျမတို့နိုင်ငံရဲ့ ယန္တရားများ ပြန်လည်ပုံမှန်လည်ပတ်နိုင်ဖို့ အရေးကြီးတဲ့ နေရာတွေကို ဦးစားပေးပြီး အစီအစဉ်တွေ ချမှတ်သွားမှာပါ။ အစီအစဉ်တွေ ချမှတ်တာနဲ့အမျှ ကျမတို့ပြည်သူတွေကို အသိပေးမှာပါ။ ဘယ်လိုကြောင့် ဘယ်သူ ဘယ်အုပ်စုတွေကို ကျမတို့ ဦးစားပေးမှာလဲဆိုတာ ပြည်သူတွေကို အသိပေး ချပြသွားမှာပါ။ နောက်တခုကတော့ ကာကွယ်ဆေးရောက်တော့မယ်ဆိုပြီး မပေါ့ပါနဲ့၊ ပေါ့ပေါ့ဆဆ မနေပါနဲ့လို့ ကျမ တိုက်တွန်းပါရစေ။ ဒါဟာ သိပ်ပြီးတော့ အရေးကြီးပါတယ်။"
ရန်ကုန်ကို ရောက်ရှိလာပြီဖြစ်တဲ့ COVID-19 ကာကွယ်ဆေးတွေကို ပြည်နယ်၊ တိုင်းအသီးသီးက ကျန်းမာရေးဦးစီးဌာနတွေဆီ ဒီသီတင်းပတ်ထဲ ဖြန့်ဝေတော့မှာ ဖြစ်ပါတယ်။ ဧရာဝတီတိုင်းဒေသကြီး အတွက်ကတော့ COVID-19 ကာကွယ်ဆေး လူ ၁၀,၀၀၀ စာရဖို့ စီစဉ်ထားပြီး ကာကွယ်ဆေးထိုးနှံနိုင်ဖို့ အဓိက ကျန်းမာရေးဝန်ထမ်းတွေနဲ့ အစိုးရ တိုင်းဒေသကြီးအဖွဲ့နဲ့ လွှတ်တော်ကိုယ်စားလှယ်တွေအတွက် ပြင်ဆင်ထားတယ်လို့ ဧရာဝတီတိုင်း ကျန်းမာရေးဦးစီးဌာနမှူး ဒုတိယညွှန်ကြားရေးမှူးချုပ် ဒေါက်တာသန်းထွန်းအောင်က ပြောပြပါတယ်။
"မနေ့ကမှ ရန်ကုန်ကို ဆေးရောက်တယ်ဆိုတော့ ကျနော်တို့ဆီကို မနက်ဖြန် သန်ဘက်ခါလောက်ရောက်ဖို့ ရှိပါတယ်။ ကျနော်တို့ အားလုံးပေါင်း ဧရာဝတီတိုင်းအတွက်က ကျန်းမာရေးဝန်ထမ်းပေါင်း ၉,၀၀၀ ကျော်ရှိပါတယ်။ နောက် တိုင်းဒေသကြီး အစိုးရအဖွဲ့နဲ့ လွှတ်တော်ကိုယ်စားလှယ်တွေအတွက်ပါ အပါ အားလုံး လူ ၁၀,၀၀၀ စာ ကျနော်တို့ တောင်းထားပါတယ်။ ကာကွယ်ဆေး လူ ၁၀,၀၀၀ စာ။ ကျနော်တို့ဆီမှာ ဇန်နဝါရီလ ၂၇ ရက်နေ့စပြီးတော့ ၂၇ ကို ကျန်းမာရေးဝန်ထမ်းတွေ စထိုးပါမယ်။ ၂၇ ရက်နေ့ကနေ ၃၁ ရက်နေ့အထိ ငါးရက်လောက် ထိုးမယ်။ တိုင်းအစိုးရအဖွဲ့တွေနဲ့ လွှတ်တော်ကိုယ်စားလှယ်တွေကို ဆက်ထိုးပါမယ်။ အခု သင်တန်းတွေလည်း ပေးနေပါပြီ။ ဧရာဝတီတိုင်း အတွက်ကတော့ နံပါတ်တစ် ဦးစားပေးက ကျန်းမာရေးဝန်ထမ်းများပါ။ ကိုဗစ်ကာကွယ်ရေး နှိမ်နင်းရေးကို ကုသစောင့်ရှောက်ပေးနေတဲ့ ကျန်းမာရေး ဝန်ထမ်းများနဲ့ စေတနာ့ဝန်ထမ်းများကိုတော့ ပထမဦးစားပေးပါတယ်။ အခုလောလောဆယ်ကတော့ သူတို့ ကာကွယ်ဆေးအကြောင်း၊ ကာကွယ်ဆေးထိုးပြီးရင် ဖြစ်တတ်တဲ့ သဘောသဘာဝလေးတွေ။ ကာကွယ်ဆေးကို ဘယ်လိုထားရမယ်၊ နောက် ဘယ်လိုထိုးရမယ် ဒါတွေကို ကျနော်သင်တန်းပေးနေပါပြီ။”
အခုရောက်ရှိလာတဲ့ COVID-19 ကာကွယ်ဆေး ထိုးနှံခွင့်ရမယ့်သူ ကျန်းမာရေးဝန်ထမ်းတွေနဲ့တကွ ထိုးခွင့်ရမယ့်သူတွေ အနေနဲ့ ပထမတကြိမ်နဲ့ ဒုတိယတကြိမ် ထိုးနှံမှုတွေကြား COVID-19 ရောဂါပိုး ကူးစက်ခံရခြင်းမရှိအောင် အထူးသတိထား နေထိုင်ကြဖို့နဲ့ မကြာခင် ပြည်သူလူထုတိုင်း ကာကွယ်ဆေးထိုးခွင့်ရအောင် အစိုးရက ကြိုးပမ်းနေတဲ့အတွက် ဆေးထိုးခွင့်မရခင်စပ်ကြား ပိုးကူးစက်မှုတွေ လျော့အောင် ပြည်သူတွေ အထူးသတိရှိရှိ နေထိုင်ကြဖို့ကို ကျန်းမာရေးနဲ့ အားကစားဝန်ကြီးဌာန ပြောရေးဆိုခွင့်ရှိသူ ညွှန်ကြားရေးမှူး ဒေါက်တာသန်းနိုင်စိုးက တိုက်တွန်းပါတယ်။
"အခုရောက်လာတဲ့ ကာကွယ်ဆေး Dose ၁.၅ သန်းမှာ လူဦးရေနဲ့ တွက်ကြည့်ရင် လူဦးရေ ၇ သိန်းခွဲစာလောက် ရမယ်ပေါ့နော်။ ဥပမာ အထိုးခံမယ့်လူတယောက်က ပထမတကြိမ်နဲ့ ဒုတိယအကြိမ်ကြားထဲမှာ သတ်မှတ်ကာလ ၂၈ ရက်ပေါ့။ ဒုတိယအကြိမ် ထပ်ပြီး အထိုးမခံရခင်ကာလ အဲ့ဒီ့အချိန်မှာ ကာကွယ်ရေးနည်းလမ်းတွေကို မလိုက်နာဘူးဆိုရင် တကယ် နှမျောဖို့ကောင်းတယ်။ ဒီဟာတွေကို လိုက်နာဖို့ အထူးပဲ အရေးကြီးပါတယ်။ ဘာပဲပြောပြော ဒီအချိန်ကာလမှာ ကျနော်တို့ဆီ ကာကွယ်ဆေးတွေ ရောက်လာတယ်ဆိုတာ အားဆေးတခုပါပဲ။ ဒီအားဆေးသောက်ပြီး ပိုအားစိုက်ပြီး လှော်မယ်ဆိုရင် ပန်းတိုင်ကို ရောက်မယ်ဆိုတဲ့အကြောင်း တင်ပြလိုပါတယ်။ ဒါကြောင့် အားလုံးက Mask တပ်ခြင်း၊ လက်ဆေးခြင်း၊ တဦးနဲ့တဦး ခပ်ခွာခွာနေခြင်း စတာတွေကို ပိုမိုအားစိုက်ပြီးတော့ လိုက်နာဖို့လိုပါတယ်။"
အခု မြန်မာပြည်မှာ ထိုးနှံကြမယ့် အိန္ဒိယက COVID-19 ကာကွယ်ဆေးတွေကတော့ ဗြိတိန် အောက်စ်ဖို့တက္ကသိုလ်နဲ့ ဗြိတိန်-ဆွီဒင် Astra Zeneca ကုမ္ပဏီတို့ ပူးတွဲသုတေသနလုပ်ပြီး အိန္ဒိယနိုင်ငံ Serum Institute ကထုတ်လုပ်တဲ့ ကာကွယ်ဆေးဖြစ်ပြီး မြန်မာအစိုးရဘက်က အခု အိန္ဒိယက လက်ဆောင်အဖြစ် အခမဲ့ပေးအပ်တဲ့ ထိုးဆေးတွေအပြင် နောက်ထပ် လူ ၁၅ သန်းစာအတွက် ကာကွယ်ဆေး သန်း ၃၀ အိန္ဒိယကနေ ဝယ်ယူထားပါတယ်။ ဝယ်ယူထားတဲ့ ဒီဆေးတွေကတော့ ဖေဖော်ဝါရီလကုန်ထဲ ရောက်မယ်လို့ မျှော်လင့်ထားပါတယ်။
အခုလက်ရှိမှာတော့ မြန်မာတနိုင်ငံလုံး အတိုင်းအတာနဲ့ COVID-19 ရောဂါပိုး တွေ့ရှိတဲ့ အတည်ပြုလူနာပေါင်းက ဇန်နဝါရီလ ၂၂ ရက်နေ့ည ၈ နာရီ ထုတ်ပြန်ချက်အရ ၁၃၆,၅၉၁ ယောက် ရှိသွားပြီဖြစ်ပြီး ကိုဗစ်ကြောင့် သေဆုံးသူကတော့ ၃,၀၃၁ ယောက်အထိ ရှိသွားပြီဖြစ်ပါတယ်။
မဆုမွန်/ VOA Burmese
https://burmese.voanews.com/a/myanmar-covid-vaccine/5748958.html
Reviewed by THITHTOOLWIN
on
23:36
Rating:
No comments:
Post a Comment