ရွေးကောက်ခံသမ္မတ ဘိုင်ဒန် ကိုယ်တိုင် COVID 19 ကာကွယ်ဆေးထိုးပြီ

ရွေးကောက်ခံသမ္မတ ဂျိုးဘိုင်ဒန် ကာကွယ်ဆေးထိုးခံနေသည့်မြင်ကွင်း (ဒီဇင်ဘာလ၊၂၁၊၂ဝ၂ဝ)

ရွေးကောက်ခံ သမ္မတဂျိုးဘိုင်ဒန်ဟာ တနင်္လာနေ့မှာ covid 19 ကာကွယ်ဆေး ထိုးခဲ့ပါတယ်။ အသက် ၇၈ နှစ်ရှိပြီဖြစ်တဲ့ မစ္စတာဘိုင်ဒန်က သူနေထိုင်ရာ Delaware ပြည်နယ် Newark က Christiana ဆေးရုံမှာ Pfizer ကုမ္ပဏီထုတ် ကာကွယ်ဆေးကို ထိုးခဲ့တာ ဖြစ်ပြီး ကိုရိုနာဗိုင်းရပ်စ်အတွက်ကာကွယ်ဆေးကို လူတွေယုံကြည်မှုရှိလာစေရေး အတွက် သူဆေးထိုးတာကို ရုပ်သံကနေ ထုတ်လွှင့်ခဲ့တာပါ။

အမေရိကန် ခေါင်းဆောင်တွေထဲက ဒုသမ္မတ Mike Pence လွှတ်တော်ဥက္ကဌ Nancy Pelosi နဲ့ အထက်လွှတ်တော် အများစုအမတ်ခေါင်းဆောင် Mitch McConnell တို့ကတော့ ပြီးခဲ့တဲ့ သီတင်းပတ်ထဲမှာ ကာကွယ်ဆေးထိုးခဲ့ကြတာပါ။

သောကြာနေ့မှာ အရေးပေါ်အခြေနေသုံး ကာကွယ်ဆေးအဖြစ် အမေရိကန်အစားအစာနဲ့ ဆေးဝါးစီမံခန့်ခွဲရေးဌာန FDA က ဒုတိယမြောက်အတည်ပြုပေးလိုက်တဲ့ အမေရိကန် ဆေးကုမ္ပဏီ Moderna ထုတ်ကာကွယ်ဆေးကို အမေရိကန်နိုင်ငံတလွှား မှာ တနင်္လာနေ့မှာ ရရှိကြမှာဖြစ်ပါတယ်။

ဒီလအစောပိုင်းတုန်းက အတည်ပြုပေးခဲ့တဲ့ Pfizer-BioNTech ရဲ့ ကာကွယ်ဆေးနဲ့ အခု Moderna ထုတ် ကာကွယ်ဆေးတွေကို အမေရိကန် နိုင်ငံတလွှားက ကျန်းမာရေးလုပ်သားတွေ နဲ့ နာတာရှည် စောင့်ရှောက်ရေးဌာနတွေမှာ ရှိသူတွေကို ပထမ ဦးစားပေး အနေနဲ့ ထိုးနှံပေးဖို့ လုပ်ဆောင်နေတာပါ။

သူတို့ပြီးရင်တော့ အသက် ၇၅ နှစ်နဲ့အထက် သက်ကြီးပိုင်းတွေနဲ့ မီးသတ်သမားတွေ၊ ကျောင်းးဆရာတွေနဲ့ ကုန်စုံဆိုင်ဝန်ထမ်းတွေကို ဒုတိယ ဦးစားပေးအဖြစ် ထိုးနှံပေးရမယ့် သူတွေအဖြစ် သတ်မှတ်သင့်တယ်လို့ အစိုးရအကြံပေး အဖွဲ့က တနင်္ဂနွေနေ့မှာ ပြောပါတယ်။

အမေရိကန်ပြည်ထောင်စုမှာ ပြီးခဲ့တဲ့ ၂ လအတွင်း ကိုရိုနာဗိုင်းရပ်စ် ကူးစက်မှု သိသိသာသာ တိုးလာခဲ့တာပါ။ အခုဆို သေဆုံးရသူ စုစုပေါင်းကလည်း ၃ သိန်း ၂ သောင်း နီးပါးရှိနေပါပြီ။ 

ဗွီအိုအေ (မြန်မာပိုင်း)

https://burmese.voanews.com/a/biden-receives-covid-19-vaccine-live-on-tv/5708509.html