မြန်မာနိုင်ငံရဲ့ အာဏာရှင် ဗိုလ်ချုပ်ကြီးဟောင်း ဦးနေဝင်းရဲ့ စတုထ္ထမြောက်ဇနီးဖြစ်သူ ရတနာနတ်မယ် ခေါ် June Rose Bellamy ဟာ အီတလီနိုင်ငံ၊ Florence မြို့မှာ အင်္ဂါနေ့ကကွယ်လွန်သွားကြောင်း သားဖြစ်သူ Michele က ဗွီအိုအေကို အတည်ပြုပြောဆိုပါတယ်။
ကွယ်လွန်ချိန်မှာ အသက် ၈၈ နှစ်ရှိပြီဖြစ်တဲ့ ရတနာနတ်မယ် ကွယ်လွန်ရတဲ့ အကြောင်းရင်း အတိအကျနဲ့ နာရေးအစီအစဉ် အသေးစိတ်တွေကိုတော့ မသိရသေးပါဘူး။ ဒါပေမဲ့ COVID-19 ရောဂါကြောင့် ကွယ်လွန်တာ မဟုတ်ဘူးလို့ သတင်းတွေမှာ ဖော်ပြကြပါတယ်။
မြန်မာနိုင်ငံကို ၂၆ နှစ်ကြာ တပါတီအာဏာရှင်စနစ်နဲ့ အုပ်ချုပ်ခဲ့တဲ့ သူ့ရဲ့ခင်ပွန်းဖြစ်ခဲ့သူ ကွယ်လွန်သူ ဗိုလ်ချုပ်ကြီးဟောင်း ဦးနေဝင်းကို အာဏာရှင်အဖြစ် သတ်မှတ်ကြတာနဲ့ ပတ်သက်ပြီး ၂၀၁၅ ခုနှစ် ဇူလိုင်လက ဗွီအိုအေနဲ့ အင်တာဗျူးတခုမှာ ရတနာနတ်မယ်က အခုလို ပြောခဲ့ဖူးပါတယ်။
"သမိုင်းမှာ ရှင်းရှင်းလင်းလင်း ဖြစ်အောင်တော့ ပြောချင်ပါတယ်။ တကမ္ဘာလုံးမှာရှိတဲ့ ဘယ်နိုင်ငံက အာဏာရှင်ပဲ ဖြစ်နေပါစေ မျိုးချစ်စိတ်ရှိသူအဖြစ်ကနေ စခဲ့ကြတာပါ။ အာဏာရှင်အဖြစ် အချိန်ကြာလာတဲ့အခါ၊ သက်တမ်းရှည်လာတဲ့အခါ အဲဒီ မျိုးချစ်ဆိုတဲ့ ရပ်တည်ချက်က တဖြည်းဖြည်းပျောက်ကွယ်သွားတာပါ။ မြန်မာပြည်နဲ့ ဦးနေဝင်းကလည်း ဒီလိုပါပဲ။"
ရတနာနတ်မယ်ဟာ ဦးနေဝင်းနဲ့ ၁၉၇၆ ခုနှစ်၊ ဒီဇင်ဘာလက လက်ထပ်ခဲ့ပြီးတော့ အိမ်ထောင်သက် လပိုင်းသာကြာပြီး ကွာရှင်းခဲ့ကြပါတယ်။
လင်းပင်မင်းသားကြီးရဲ့ မြေးတော်တော်စပ်သူ ရတနာနတ်မယ်ခေါ် June Rose Bellamy ကို ၁၉၃၂ ခု ဇွန်လ ၁ ရက်နေ့က ရန်ကုန်မြို့မှာဖွားမြင်ခဲ့တာပါ။
သူဟာ ၁၉၅၄ ခုနှစ်က အီတလီဆရာဝန်တစ်ဦးဖြစ်သူ Mario Lucia Postiglione နဲ့ ပထမအိမ်ထောင် ထူထောင်ခဲ့ပီး သားနှစ်ယောက် ထွန်းကားပြီးတဲ့နောက် ၁၉၆၃ ခုနှစ်မှာ ကွာရှင်းပြတ်စဲခဲ့ပါတယ်။
ကွယ်လွန်ချိန်မှာ အီတလီနိုင်ငံ၊ Florence မြို့မှာနေထိုင်ပြီး အီတလီအစားအစာ ချက်ပြုတ်နည်း သင်ကြားပေးနေခဲ့တာဖြစ်ပါတယ်။
ဗွီအိုအေ (မြန်မာပိုင်း)
Reviewed by THITHTOOLWIN
on
21:31
Rating:
No comments:
Post a Comment