၂ နှစ် ကျော်ကြာ တိုက်ပွဲတွေဖြစ်ပွားခဲ့ပြီးတဲ့နောက် မြန်မာ့တပ်မတော်နဲ့ ရက္ခိုင့်တပ်တော်တို့ဟာ နှစ်ဖက်လူချင်း တွေ့ဆုံဆွေးနွေးမှုတွေ ဝဒေသမှာ စတင် ပြုလုပ်ခဲ့ပါတယ်။
မြန်မာတပ်မတော်နဲ့ ရက္ခိုင့်တပ်တော် အေအေတို့ဟာ မနေ့က ဒီဇင်ဘာ ၉ ရက်နေ့က UWSA ၀ ထိန်းချုပ်တဲ့ နယ်မြေမှာ တွေ့ဆုံ ဆွေးနွေးမှုတွေ လုပ်ခဲ့ကြတယ်လို့ သိရပါတယ်။
ဒီ တွေ့ဆုံခဲ့မှုနဲ့ ပတ်သက်ပြီး ၀ တပ်ဖွဲ့ ပြင်ပဆက်ဆံရေး အကြီးအကဲ တစ်ဦးဖြစ်တဲ့ ဦးကျောက်ကော်အမ်း က ဘီဘီစီကို မှန်ကန်ကြောင်း အတည်ပြုပါတယ်။
ဝ တပ် ဖွဲ့က တွေ့ဆုံပွဲ လာရောက်သူတွေရဲ့ လုံခြုံရေးနဲ့ စားသောက်ရေး တာဝန်တွေကို ယူခဲ့ကြောင်းနဲ့ တွေ့ဆုံပွဲ လာရောက်သူတွေ ဒီဇင်ဘာလ ၁၀ ရက်နေ့မှာ ပြန်သွားပြီဖြစ်တယ်လို့ လည်း ဦးကျောက်ကော်အန်းက ပြောပါတယ်။
UWSA ၀ ထိန်းချုပ်တဲ့ နယ်မြေမှာ နှစ်ဖက် တွေ့ဆုံရာမှာတော့ တပ်မတော်ဘက်က ဗိုလ်ချုပ်အဆင့် တာဝန်ရှိသူတွေ ပါ၀င်ပြီး ရက္ခိုင့်တပ်တော် အေအေဘက်က ဒုတိယစစ်ဦးချုပ် ဒေါက်တာ ညိုထွန်းအောင်ဦးဆောင်ပြီး တွေ့ဆုံခဲ့ကြတယ်လို့ သတင်းတွေ ထွက်ပေါ်နေပါတယ်။
"ဒီတိုက်ပွဲတွေကနေ ရခိုင်တောင်ပိုင်းတင်မကဘူး၊ သေချာမဖြေရှင်းရင်တော့ မြန်မာ တစ်နိုင်ငံလုံး ပြဿနာတွေ တက်သွားနိုင်တာမျိုးပေါ့"
ဒီ တွေ့ဆုံ ဆွေးနွေးပွဲ သတင်းတွေနဲ့ ပတ်သက်လို့ တပ်မတော်ဘက်ကရော ရက္ခိုင့်တပ်တော် အေအေဘက် ကိုပါ ဘီဘီစီက ဆက်သွယ်ပြီး အတည်ပြုနိုင်ခဲ့ခြင်းတော့ မရှိပါဘူး။
ဒါအပြင် ဘာတွေဆွေးနွေးခဲ့တယ်၊ ဘယ်သူတွေ တက်ရောက်ခဲ့တယ်ဆိုတဲ့ အသေးစိတ်အချက် အလက်တွေ ကိုတော့ သူ့အနေနဲ့ ပြောပြခွင့်မရှိဘူးလို့လည်း ဦးကျောက်ကော်အမ်းက ပြောပါတယ်။
မြန်မာ့တပ်မတော်နဲ့ အေအေတို့ အကြား အခုလို လူချင်း တွေ့ဆုံမှု မပြုလုပ်ခင် ပြီးခဲ့တဲ့ နိုဝင်ဘာလ ၂၅ ရက် နေ့က အွန်လိုင်းက တစ်ဆင့် တွေ့ဆုံ ဆွေးနွေးမှုတွေ ပြုလုပ်ခဲ့ပါသေးတယ်။
အွန်လိုင်းက တစ်ဆင့် တွေ့ဆုံမှုနဲ့ ပတ်သက်ပြီး အေအေဘက်က ထုတ်ပြန်ရာမှာတော့ ရခိုင်က ရွေးကောက်ပွဲ မကျင်းပနိုင်ခဲ့တဲ့ ဒေသတွေမှာ ကျင်းပခွင့်ရရေး၊ ဆေးဝါးနဲ့ ရိက္ခာ ပြတ်လပ်နေတဲ့ ကျေးရွာတွေမှာ သယ်ယူ ပို့ဆောင်ရေး အဆင်ပြေစေဖို့ အပါအဝင် ရရှိပြီးတဲ့ အပြန်အလှန် နားလည်ယုံကြည်မှုကို ဆက်လက် ထိန်းသိမ်းသွားဖို့ဆိုတဲ့ အချက် ၃ ချက်ကို ဆွေးနွေးခဲ့တယ်လို့ ပါရှိပါတယ်။
မြန်မာ့တပ်မတော်နဲ့ အေအေတို့အကြား ဆွေးနွေးမှုတွေ မပြုလုပ်ခင် နိုဝင်ဘာလ အစောပိုင်းထိ တိုက်ပွဲတွေ အပြင်းအထန်ဖြစ်ပွားခဲ့ပြီး တိုက်ပွဲတွေကြား နှစ်ဖက် ပစ်ခတ်မှုကြောင့် အရပ်သား သေဆုံးမှု ရာချီရှိခဲ့သလို နေရပ် စွန့်ခွာထွက်ပြေးရသူတွေလည်း သိန်းနဲ့ချီရှိခဲ့ပါတယ်။
တပ်မတော်နဲ့ အေအေ ရက္ခိုင့်တပ်တော်တို့ဟာ ၂၀၁၈ ခုနှစ်ကနေ ၂၀၂၀ ခုနှစ် နိုဝင်ဘာ အထိ နှစ်နှစ်ကျော်ကြာ တိုက်ခိုက်ခဲ့ကြပြီး ဂျပန်အစိုးရ ရဲ့ မြန်မာနိုင်ငံ အမျိုးသား ပြန်လည်သင့်မြတ်ရေးဆိုင်ရာ အထူးကိုယ်စားလှယ် နဲ့ ရွေးကောက်ပွဲ လေ့လာရေး အဖွဲ့ခေါင်းဆောင် မစ္စတာ ဆာဆာကာဝါကပြီးခဲ့တဲ့ နိုဝင်ဘာလ အတွင်း ကြားဝင် ညှိနှိုင်းပေးမှုတွေ ရှိခဲ့ပါတယ်။
နိုဝင်ဘာလ ၈ ရက်ရွေးကောက်ပွဲ နောက်ပိုင်း မြန်မာတပ်မတော်နဲ့ အေအေ ရက္ခိုင့်တပ်တော်တို့ကြားမှာ တိုက်ပွဲတွေ ဖြစ်ပွားမှု မရှိသေလာက် ဖြစ်နေခဲ့ပေမဲ့ လက်ရှိနှစ်ဖက် ဆွေးနွေးမှုတွေ စတင်နေတဲ့ အချိန်အထိ အစိုးရဘက်က အကြမ်းဖက်အဖွဲ့ အဖြစ် အေအေ ကို သတ်မှတ်ထားဆဲ ဖြစ်ပါတယ်။
BBC Burmese
Reviewed by THITHTOOLWIN
on
22:11
Rating:
No comments:
Post a Comment