အစိုးရယာယီအသုံးစရိတ် ကန်လွှတ်တော် အတည်ပြု

အမေရိကန်လွှတ်တော်အဆောက်အဦ။ (မတ် ၁၆၊ ၂၀၂၀)

အမေရိကန်အစိုးရလုပ်ငန်းတွေ ဒီသီတင်းပတ်ကုန်မှာ တစိတ်တပိုင်း ရပ်ဆိုင်းသွားမယ့်အရေး ရှောင်ရှားဖို့အတွက် နှစ်ရက်တာ ယာယီအသုံးစရိတ် ဥပဒေကို ကွန်ဂရက်လွှတ်တော်က သောကြာနေ့နှောင်းပိုင်းမှာ အတည်ပြု ပြဋ္ဌာန်းခဲ့တယ်လို့ AP သတင်းမှာ ဖော်ပြထားပါတယ်။

အစိုးရ ယာယီအသုံးစရိတ် ဥပဒေကို အောက်လွှတ်တော်က ထောက်ခံမဲ ၃၂၀ မဲ၊ ကန့်ကွက်မဲ ၆၀ နဲ့ အတည်ပြုခဲ့ပါတယ်။ အဲဒီနောက် အထက်လွှတ်တော်ကလည်း ချက်ချင်းလို အတည်ပြုခဲ့ပြီး သမ္မတ Donald Trump က သောကြာနေ့နှောင်းပိုင်းမှာ လက်မှတ်ထိုး ပြဋ္ဌာန်းခဲ့တာပါ။

ဒါဟာ COVID-19 ကပ်ရောဂါကြောင့် စီးပွားရေးထိခိုက်မှုကို ကုစားရေး ဒေါ်လာ ဘီလီယံ ၉၀၀ ကျော်ရှိတဲ့ ရန်ပုံငွေအစီအစဉ်ကို အတည်ပြုရေး လွှတ်တော်အမတ်တွေ အပြင်းအထန် ညှိနှိုင်းဆွေးနွေးနေတာ အချိန်ထပ်ရဖို့ပဲ ဖြစ်ပါတယ်။

ဒီသဘောတူညီချက်မူကြမ်းကို တနင်္ဂနွေနေ့မှာ မဲခွဲဆုံးဖြတ်မယ်လို့ လွှတ်တော်အမတ်တွေက ရည်ရွယ်ထားပါတယ်။

ဗဟိုဘဏ်အနေနဲ့ အရေးပေါ် ငွေထုတ်ချေးနိုင်တဲ့ လုပ်ပိုင်ခွင့်အာဏာ ပေးရေး မပေးရေးအပေါ် အချေအတင် ဖြစ်နေတာကို ဖြေရှင်းဖို့ စေ့စပ်ညှိနှိုင်းသူတွေ ကြိုးစားနေကြတာပါ။

ရီပတ်ဘလစ်ကန်တွေရဲ့ ဒီအဆိုပြုချက်ဟာ တိုင်းပြည်စီးပွားရေးကို ရွေးကောက်ခံသမ္မတ Joe Biden စီမံခန့်ခွဲရေးမှာ အရေးပါတဲ့ နည်းလမ်းတွေကို ထိခိုက်စေမယ်လို့ ဒီမိုကရက်တွေက ပြောပါတယ်။

ဒီသဘောတူညီချက်ထဲမှာ စီးပွားရေးလုပ်ငန်းတွေအတွက် အကူအညီ ဒေါ်လာ ဘီလီယံ ၃၀၀၊ အလုပ်လက်မဲ့အတွက် ဖက်ဒရယ်အစိုးရရဲ့ ထောက်ပံ့ကြေး သီတင်းတပတ်အတွက် ဒေါ်လာ ၃၀၀ နဲ့ အမေရိကန်နိုင်ငံသား တဦးချင်းစီအတွက် ထောက်ပံ့ကြေး ဒေါ်လာ ၆၀၀ စီပေးဖို့တို့ ပါဝင်ပါတယ်။

ဗွီအိုအေ (မြန်မာပိုင်း)

https://burmese.voanews.com/a/us-congress-spending-bill/5705775.html