အမေရိကန်ပြည်ထောင်စုမှာ ဒေါ်လာ ၁ ထရီလီယံနီးပါး သုံးစွဲမယ့် COVID-19 ထောက်ပံ့ရေး အစီအစဉ်သစ် ချမှတ်နိုင်ဖို့ ဦးဆောင်ဆွေးနွေးနေကြတဲ့ ထိပ်တန်း လွှတ်တော်အမတ်တွေကြား တနင်္ဂနွေနေ့က သဘောတူညီမှု ရရှိလိုက်ပါပြီ။
ရက်တွေနဲ့ချီ စေ့စပ်ညှိနှိုင်းခဲ့ကြပြီးတဲ့နောက် ခုလို သဘာတူညီမှု ရရှိလိုက်တာလို့ လွှတ်တော်အမတ်တွေက ကြေညာပါတယ်။
ဒီသဘောတူညီချက်အရ တပတ် ဒေါ်လာ ၃၀၀ အလုပ်လက်မဲ့ အကျိုးခံစားခွင့် ယာယီထောက်ပံ့ပေးနိုင်မှာ ဖြစ်သလို အမေရိကန်အများစုလက်ထဲ ငွေသားထောက်ပံ့ငွေ ဒေါ်လာ ၆၀၀ တိုက်ရိုက်ပေးနိုင်တော့မှာ ဖြစ်ပါတယ်။
ဒါ့အပြင် ကိုဗစ်ကြောင့် ဆိုးဆိုးရွားရွား ထိခိုက်ခဲ့ရတဲ့ စီးပွားရေး လုပ်ငန်းတွေအတွက် နောက်တကျော့ ငွေကြေးထောက်ပံ့မှုတွေ ပေးနိုင်မယ့်အပြင် စာသင်ကျောင်းတွေ၊ ကျန်းမာရေးဝန်ထမ်းတွေနဲ့ အိမ်ငှားခမပေးနိုင်လို့ နှင်ချခံရသူတွေအတွက်လည်း ငွေကြေး ကူညီထောက်ပံ့ပေးနိုင်မှာ ဖြစ်ပါတယ်။
ခုလို သဘောတူညီမှုရလိုက်ပြီး နောက်မှာတော့ ဒီဥပဒေမူကြမ်းကို အောက်လွှတ်တော်မှာ ဒီကနေ့ တနင်္လာနေ့မှာ မဲခွဲဆုံးဖြတ်နိုင်ဖွယ်ရှိတယ်လို့ အေောက်လွှတ်တော် ဒီမိုကရက် လူများစုခေါင်းဆောင် Steny Hoyer ရဲ့ ပြောခွင့်ရက ပြောပါတယ်။
အလားတူ အထက်လွှတ်တော်မှာလည်း တနင်္လာနေ့မှာပဲ မဲခွဲဆွုံးဖြတ်လိမ့်မယ်လို့ ခန့်မှန်းရပြီး အထက်နဲ့ အောက်လွှတ်တော် နှစ်ရပ်စလုံးက အတည်ပြုပြီးရင်တော့ သမ္မတ Donald Trump က လက်မှတ်ထိုး အတည်ပြုပေးရမှာ ဖြစ်ပါတယ်။
ဒီဥပဒေမူကြမ်းကို အတည်ဖြစ်ရင်တော့ ပြီးခဲ့တဲ့မတ်လက ပြဋ္ဌာန်းခဲ့တဲ့ ဒေါ်လာ ၁ ဒသမ ၈ ထရီလီယံ (ဒေါ်လာသန်းပေါင်း ၁ သန်း ၈ သိန်း) သုံးစွဲတဲ့ ထောက်ပံ့ရေး အစီအစဉ်ပြီးရင် COVID-19 ကာလ အကူအညီပေးရေး ဒုတိယအစီအစဉ်ပဲ ဖြစ်ပါတယ်။
ဗွီအိုအေ (မြန်မာပိုင်း)
https://burmese.voanews.com/a/us-bill-agreement/5707229.html
Reviewed by THITHTOOLWIN
on
03:48
Rating:
No comments:
Post a Comment