ရွေးကောက်ခံသမ္မတ Biden ကို COVID-19 တိုက်ဖျက်မှုဖလှယ်ရေး နယူးဇီလန် ဝန်ကြီးချုပ် Ardern ကမ်းလှမ်း

နယူးဇီလန်ဝန်ကြီးချုပ် Ardern က အမေရိကန်ရွေးကောက်ခံသမ္မတ Joe Biden နဲ့ ဖုန်းပြောနေသည့်မြင်ကွင်း

COVID-19 တိုက်ဖျက်ရေးအောင်မြင်အောင် လုပ်ဆောင်နိုင်ခဲ့တဲ့ ကမ္ဘာ့နိုင်ငံစာရင်းတွေထဲ ထိပ်ဆုံးမှာရှိနေတဲ့ နယူးဇီလန်နိုင်ငံ ဝန်ကြီးချုပ် Ardern နဲ့ အမေရိကန် ရွေးကောက်ခံ သမ္မတ ဂျိုးဘိုင်ဒန်တို့ တယ်လီဖုန်းနဲ့ ဆက်သွယ်စကားပြောဆိုမှုမှာ COVID-19 တိုက်ဖျက်ရေးနဲ့အတူ ဒေသတွင်းအခြားစိန်ခေါ်မှုတွေကို ပူးပေါင်းဆောင်ရွက်မယ့်အကြောင်း ကိုအောင်မြတ်သူ က တင်ပြထားပါတယ်။

Biden-Harris အာဏာလွှဲပြောင်းရယူရေးအဖွဲ့က ပြီးခဲ့တဲ့ တနင်္ဂနွေနေ့က ထုတ်ပြန်ချက်အရ ရွေးကောက်ခံသမ္မတ Joe Biden ကို နယူးဇီလန်ဝန်ကြီးချုပ် Jacinda Ardern က ဝမ်းမြောက်ကြောင်းတယ်လီဖုန်းနဲ့ဆက်သွယ်ပြောကြားရာမှာ Covid-19 နဲ့ပက်သက်တဲ့ ကိစ္စရပ်တွေအပါအဝင် အခြားကိစ္စရပ်တွေလည်းဆွေးနွေးခဲ့တယ်လို့ ဖေါ်ပြထားပါတယ်။ လက်ရှိ သမ္မတ ထရမ့်က ရွေးကောက်ပွဲ ရှုံးနိမ့်မှုအပါဝင် Covid-19 နဲ့ပက်သက်တဲ့ စိန်ခေါ်မှုတွေကို ငြင်းဆန်နေချိန်မှာ အခုလို နယူးဇီလန် ဝန်ကြီးချုပ်ရဲ့ တယ်လီဖုန်းခေါ်ဆိုမှုဟာ Joe Biden ကို ကမ္ဘာ့ခေါင်းဆောင်စာရင်းထဲ ထည့်သွင်းလိုက်တာမျိူးလည်းဖြစ်ပါတယ်။

ဘိုင်ဒန်အဖွဲ့ရဲ့ ကြေညာချက်မှာတော့- နယူးဇီလန်ဝန်ကြီးချုပ်ရဲ့ အသိအမှတ်ပြုမှုကို ကျေးဇူးတင်ကြောင်းအပါအဝင် သူမရဲ့ ထပ်မံရွေးချယ်ခံရမှုအပေါ်မှာလည်း ဝမ်းမြောက်ဂုဏ်ယူကြောင်းနဲ့ နယူးဇီလန်နိုင်ငံနဲ့ မိတ်ဖက်အဖြစ် အဓွန့်ရှည်လိုကြောင်း ဖော်ပြထားပါတယ်။

၀န်ကြီးချုပ် Ardern ကိုယ်တိုင်လည်း ပြီးခဲ့တဲ့ အောက်တိုဘာလ နယူးဇီးလန် ရွေးကောက်ပွဲမှာ ပြန်ပြီး အနိုင်ရခဲ့သူဖြစ်ပါတယ်။ ခေါင်းဆောင်နှစ်ဦး တယ်လီဖုန်းစကားပြောဆိုချက်ထဲမှာ တကမ္ဘာလုံး ရင်ဆိုင်နေရတဲ့ COVID-19 ကပ်ရောဂါအပါအဝင် နိုင်ငံစုံဝါဒ ပြန်လည်တောင့်တင်းခိုင်မာရေး၊ ဒီမိုကရေစီ အားကောင်းလာရေး၊ ဒေသတွင်းလုံခြုံရေး ဆက်လက်ထိန်းသိမ်းဖို့နဲ့ အင်ဒို-ပစိဖိတ်ဒေသ အကျိူးဖြစ်ထွန်းစေရေးတို့အတွက် နယူးဇီလန်နိုင်ငံနဲ့ နီးနီးကပ်ကပ် လုပ်ဆောင်တာမျိူးကို ရှေးရှူကြောင်း ဂျိုးဘိုင်ဒန်က ပြောကြားခဲ့တယ်လို့ ထုတ်ပြန်ချက်ထဲမှာ ဖော်ပြထားပါတယ်။

၀န်ကြီးချုပ် Ardern ကလည်း ကိုရိုနာဗိုင်းရပ်စ်ကုသခြင်းနဲ့ပက်သက်တဲ့ သူ့ တိုင်းပြည်ရဲ့ ကျွမ်းကျင်မှုတွေကို မျှဝေပေးလိုကြောင်း ပြန်လည်ပြောကြားခဲ့ပါတယ်။

Joe Biden အားဖုန်းခေါ်ဆိုပြီးနောက် ဝန်ကြီးချုပ် Ardern က သတင်းထောက်တွေကို ပြောကြားရာမှာ- Biden နဲ့ သူတို့ နှစ်ဦး စကားပြောဆိုမှုဟာ နွေးနွေးထွေးထွေးရှိပြီး Biden က နယူးဇီလန်နိုင်ငံအနေနဲ့ ကပ်ရောဂါကို ကိုင်တွယ်တာကို သူအလွန် နှစ်သက်ကြေနပ်မှုရှိကြောင်း ပြောခဲ့တယ်လို့ဆိုပါတယ်။

နယူးဇီလန်နိင်ငံဟာ ကမ္ဘာပေါ်မှာ COVID-19 တိုက်ဖျက်ရေးမှာ အအောင်မြင်ဆုံးနိုင်ငံတွေထဲက တခုဖြစ်ပါတယ်။

တင်းကြပ်တဲ့သွားလာမှုကန့်သပ်ချက်တွေနဲ့ နယ်စပ်ဝင်ရောက်မှုတွေ ကို ပိတ်ပင်ခဲ့တာကြောင့် နယူးဇီလန်မှာ COVID-19 လူနာ ၂၀၀၀ကျော်နဲ့ သေဆုံးသူ ၂၅ ဦးသာရှိခဲ့တာပါ။

ဆက်လက်ပြီး Ardern က Biden အနေနဲ့နယူးဇီလန်ရဲ့ COVID-19 နဲ့ပက်သက်ပြီး နောက်ထပ်တုံ့ပြန်မှုတွေကို ဆက်လက် ဆွေးနွေးလိုပြီး သူမအနေနဲ့ကတော့ နိုင်ငံတနိုင်ငံကို အစစအရာရာ ပုံတူကူးယူဖို့ မဖြစ်နိုင်ကြောင်း သတိပြုမိခဲ့တယ်လို့ဆိုပါတယ်။

“ နယူးဇီလန်မှာ ဗိုင်းရပ်စ်ပိုးကို ထိန်းချုပ်ဖို့သဘာဝတရားကြီးက ပေးထားတဲ့ အားသာချက်တွေ အများကြီးရှိပါတယ်။ နိုင်ငံတကာပူးပေါင်းဆောင်ရွက်မှုဟာ လုံးဝအဓိကကျတဲ့ သော့ချက်တခုဖြစ်ပြီး ကျမတို့ဟာ ဗိုင်းရပ်စ်တိုက်ဖျက်ရေးအတွက် အသုံးဝင်မယ့် အချက်အလက်နဲ့ အသိပညာတွေကို ဘယ်နိုင်ငံနဲ့မဆို မျှဝေချင်ပါတယ်” လို့ပြောသွားတာပါ။

သူ နဲ့ Biden တို့ဟာ ကုန်သွယ်ရေးဆိုင်ရာ ကိစ္စရပ်တွေကို လည်းဆွေးနွေးခဲ့ကြပါတယ်လို့ Ardern ကပြောပါတယ်။

Biden အဖွဲ့ကထုတ်တဲ့ ကြေငြာချက်ထဲမှာကတော့ Ardern ဟာ ၂၀၁၉ အတွင်း ခရစ်ယာန်ဘုရားကျောင်းနှစ်ခုနဲ့ ဗလီတွေမှာ လူအမြောက်အများသေဆုံးစေခဲ့တဲ့ ပစ်ခတ်မှု ၂ ခု ကို ကိုင်တွယ်ဖြေရှင်းရာမှာ သူမတူတဲ့ ဦးဆောင်မှုပေးခဲ့သူ၊ အလုပ်လုပ်ရင်း သားသမီးတွေကို ပြုစုစောင့်ရှောက်နိုင်တဲ့ စံပြမိခင်တဦး အဖြစ် Biden က ချီးကျူးပြောဆိုခဲ့တယ်လို့ ဖေါ်ပြထားပါတယ်။

လက်ရှိအခြေအနေမှာတော့ ရွေးကောက်ခံသမ္မတ Biden ကို အာဏာလွှဲပြောင်းရေး ပူးပေါင်းလုပ်ဆောင်ဖို့ သမ္မတ ထရမ့်က ငြင်းဆိုထားသလို၊ သူ့အစိုးရအဖွဲ့ကိုလည်း ပူးပေါင်းဆောင်ရွက်တာတွေမလုပ်ဖို့ တားမြစ်ထားပါတယ်။

ဗွီအိုအေ (မြန်မာပိုင်း)

https://burmese.voanews.com/a/new-zealand-usa-covid-ardern/5674293.html