 |
| ရခိုင်စစ်ဘေးရှောင် ဒုက္ခသည်များ |
ကပ်ဘေးနဲ့ စစ်ဘေးဒဏ်သင့်နေတဲ့ ရခိုင်ပြည်နယ်မှာ တပ်မတော်ရဲ့ စစ်ဆင်ရေးတွေအတွင်း ဒေသခံတွေ ဖမ်းဆီးခံနေရတဲ့အကြောင်းကို ဗွီအိုအေမြန်မာပိုင်းသတင်းထောက် ကိုသက်နိုင်က ပြောပြပေးပါမယ်။
ရခိုင်ပြည်နယ်မှာ ကိုဗစ်ကပ်ရောဂါ ကြုံနေရချိန်မှာပဲ စစ်ရေးတင်းမာမှုတွေ ကြံုနေရသလို ဒေသခံအရပ်သားတွေ ဖမ်းဆီးစစ်ဆေးခံရတာ ထိခိုက်သေဆုံးတာတွေ ရှိနေတယ်လို့ လွှတ်တော်ကိုယ်စားလှယ်တွေနဲ့ ကိုယ်တိုင်ကြံုရသူတွေက ပြောပါတယ်။ မနေ့တုန်းကလည်း ကျောက်တော်မြို့နယ် သာစည်ကျေးရွာမှာ လုံခြံုရေးတပ်ဖွဲ့ဝင်တွေက ဒေသခံတချို့ကို ခေါ်ဆောင်သွားသလို ရွာသားတစ်ဦးလည်း သေနတ်ထိမှန်သေဆုံးသွားတယ်လို့ ဒေသခံတွေက အကြောင်းကြားခဲ့ကြောင်း ကျောက်တော်မြို့နယ် ပြည်သူ့လွှတ်တော် အမတ် ဦးထွန်းဝင်း ကပြော ပါတယ်။
"ကျနော့်ကိုတော့ မနေ့က ည ၉ နာရီလောက်မှာ မိတ်ဆွေ တစ်ယောက် လှမ်းဆက်လာတာပေါ့ ဒီလိုအခြေအနေဖြစ်နေတယ်။ ရွာထဲကို စစ်ကြောင်းတွေ ရောက်နေတယ်။ ခေါ်တာစစ်တာတွေ ရှိတယ်ဆိုပြီးတော့ ကြားတယ်။ ရွာသားတချို့ကိုလည်း ခေါ်သွားတာတွေရှိတယ်ဆိုပြီးတော့ပေါ့။ ပြီးတော့ သိပ်မကြာခင်မှာပဲ ထပ်ဆက်လာတယ်။ တစ်ယောက်ကျည်ထိပြီးတော့ သေတယ်ဆိုပြီးတော့ ကြားတယ်။ ဒီကနေ့ မနက်ပိုင်းကလည်း ရွာကနေ ထွက်ပြေးနေကြတဲ့ အမျိုးသမီးတွေ ဖုန်းဆက်လာတယ်။ ရွာမှာ မနေရဲတော့ဘူး အားလုံး ကြောက်လန့်နေကြရတယ်ဆိုပြီးတော့ပေါ့။"
တပ်မတော်စစ်ကြောင်းက ခေါ်ဆောင်သွားသူတွေအတွက် သက်ဆိုင်ရာ မိသားစုဝင်တွေ စိုးရိမ်နေကြတယ်လို့လည်း ဒေသခံတွေက ပြောပါတယ်။ ဒေသခံတချို့ကတော့ စိုးရိမ်တာကြောင့် တိမ်းရှောင်ခဲ့ကြတယ်လို့လည်း ကိုယ်တိုင်တွေ့ခဲ့တဲ့ သာစည်ကျေးရွာသား တစ်ဦးကပြောပါတယ်။
"မြန်မာ့တပ်မတော်က ဆင်းလာပြီးတာ့ ကျနော်တို့သာစည်ကျေးရွာအနားကို ညနေ သုံးနာရီလောက်မှာ ရောက်တယ်။ အဲဒီအချိန်မှာ သူတို့က လက်နက်ကြီး၊ လက်နက်ငယ်တွေနဲ့ ပစ်ပြီးတော့ ဝင်လာပါတယ်။ နောက်ပြီးတော့ ရွာထဲမှာ ရှိတဲ့ လူတွေ ကလေးတွေ ကိုယ်ဝန်ဆောင်မိန်းမတွေ သက်ကြီးရွယ်အိုတွေကို လူပေါင်း ၁၀၀ ကျော်ခေါ်ဆောင်သွားတယ်။ သူတို့ကို ခေါ်သွားတာမြင်တော့ ကျနော်လည်း ရှောင်ထွက်လာခဲ့တယ်။"
ဒေသခံတွေကို လုံခြုံရေးတပ်ဖွဲ့တွေက ဖမ်းဆီးခေါ်ဆောင်သွားတယ်ဆိုတဲ့ သတင်းတွေနဲ့ ပတ်သက်လို့ တပ်မတော်သတင်းမှန် ပြန်ကြားရေးအဖွဲ့ တာဝန်ရှိသူတွေကို ဗွီအိုအေက ဆက်သွယ်ခဲ့ပေမဲ့ ဖုန်းလက်ခံ ဖြေဆိုခဲ့တာ မရှိခဲ့သလို၊ ရခိုင်ပြည်နယ် လုံခြံုရေးနဲ့ နယ်စပ်ရေးရာဝန်ကြီး ဗိုလ်မှူးကြီး မင်းသန်း ကလည်း သတင်းမရရှိသေးကြောင်း ပြောပါတယ်။
စစ်ရေးတင်းမာမှုတွေ ကြုံနေရချိန်မှာ ဒေသခံတွေ ထိခိုက်သေဆုံးတဲ့ သတင်းတွေလည်း ထွက်ပေါ်နေပါတယ်။ မနေ့က ညနေပိုင်းကလည်း သာစည်ကျေးရွာအနီး ကျောက်ဂူစုကျေးရွာမှာ အသက် ၄၀ အရွယ် ရွာသားတစ်ဦး သေနတ်နဲ့ပစ်သတ်ခံခဲ့ရတယ်လို့ ဒေသခံတစ်ယောက်က ပြောပါတယ်။
"ကျနော်တို့ဒေသကလူတွေက သီးနှံတွေ စိုက်ပျိုးကြတယ်။ ဟင်းသီးဟင်းရွက်တွေပေါ့။ အဓိကတော့ ကွမ်းစိုက် ပျိုးကြတယ်။ သူက ကွမ်းစိုက်ခင်းက အိမ်သို့အပြန်မှာ မြန်မာ့တပ်မတော်နဲ့ တွေ့တော့ သူတိုက လှမ်းပစ် တယ်။ သူကတော့ သေသွားတယ်။ အဖဦးထွန်းအောင် သူ့နာမည်ကတော့ စိန်သာအောင်ပေါ့နော်။ အသက် ၄၀ ဝန်း ကျင်ပေါ့နော်။"
ပုဏ္ဏားကျွန်းမြို့နယ် စပါးထားကျေးရွာမှာလည်း မနေ့တုန်းက တပ်မတော်စစ်ကြောင်းတစ်ခုက ဝင်ရောက်စစ်ဆေးပြီး ဆန်ပိုင်ရှင်တစ်ဦးကို ခေါ်ဆောင်သွားသလို ဆန်အိတ်တွေကိုလည်း ယူဆောင်သွားတယ်လို့ နီးစပ်သူတွေက ပြောပါတယ်။ တပ်မတော်ကတော့ စပါးထားကျေးရွာမှာ ရခိုင်လက်နက်ကိုင် AA အဖွဲ့အတွက် သိုလှောင်ထားတဲ့ ဆန်ရိက္ခာတွေကို ဖမ်းဆီးရမိခဲ့ပြီး ဖမ်းဆီးရမိသူနဲ့ ဆန်အိတ်တွေကို စစ်တွေကို ပို့ဆောင်ပြီး ဥပဒေနဲ့ အညီဆောင်ရွက်သွားမှာဖြစ်ကြောင်း ဒီကနေ့ပဲ သတင်းထုတ်ပြန်ထားပါတယ်။
ကျောက်တော်မြို့နယ် ပြည်သူ့လွှတ်တော်အမတ် ဦးထွန်းဝင်းကတော့ စစ်ဘေးနဲ့ ကပ်ဘေးဒဏ်သင့်နေချိန်မှာ ဒေသခံတွေ ထိခိုက်နစ်နာမှု မရှိအောင် ဆောင်ရွက်ဖို့ တိုက်တွန်းထားပါတယ်။
"ကျနော်တို့ကတော့ ဗျာ ... ဒီအချိန်မှာကတော့ ကိုယ့်အိမ်ထဲမှာ ကိုယ်နေပြီးတော့မှ စိုးရိမ်နေကြရတယ်။ ရောဂါအခြေအနေကလည်း တအားဆိုးနေတဲ့ အခါကျတော့ သတိထားပြီးနေကြရတယ်။ ပြည်သူတွေ ပူလောင် သောကရောက်နေတဲ့ အချိန်မှာကျတော့ ဘယ်လက်နက်ကိုင်အဖွဲ့အစည်းမဆို ဒီအချိန်မှာ လူသားဆန်တဲ့ နှလုံးသားတွေ နဲ့တော့ နည်းနည်းစဉ်းစားပေးသင့်တယ်လို့ ကျနော်ထင်တယ်။ ဒီအချိန်မှာ ပြည်သူတွေကို ထပ်ပြီးတော့ ပူလောင်မှုတွေ ထပ်မပေးဖို့ အထူးသတိပြုဖို့တော့လိုမယ်လို့ ကျနော်ထင်တယ်။"
ကုလသမဂ္ဂ မြန်မာနိုင်ငံဆိုင်ရာ ဌာနေညှိနှိုင်းရေးမှူးနဲ့ လူသားချင်းစာနာထောက်ထားမှုဆိုင်ရာ ညှိနှိုင်းရေးမှူး Mr. Ola Almgren ကတော့ ကပ်ရောဂါနဲ့ စစ်ဘေးဒဏ်တွေကြောင့် အကူအညီလိုအပ်နေချိန်မှာ တိုက်ခိုက်မှုတွေ ရပ်စဲရေး ကုလသမဂ္ဂ အတွင်းရေးမှူးချုပ်ရဲ့ တိုက်တွန်းချက်ကို လိုက်နာဖို့ ဒီကနေ့ပဲ ကြေညာချက်ထုတ်ပြန် တိုက်တွန်းထားပါတယ်။ စစ်ဘေးရော ကပ်ရောဂါနဲ့ပါ ရင်ဆိုင်နေရချိန်မှာ သတင်းအချက်အလက် ရရှိနိုင်အောင် အင်တာနက်ဝန်ဆောင်မှုတွေ အပြည့်အဝသုံးခွင့်ရအောင် ဆောင်ရွက်ဖို့လည်း တိုက်တွန်းထားပါတယ်။
သက်နိုင်/VOA (Burmese)
Reviewed by THITHTOOLWIN
on
18:38
Rating:
No comments:
Post a Comment