နိရဥၥရာ၊ စက္တင္ဘာ ၁၈/၂ဝ၂ဝ
ချင်းပြည်နယ်၊ ပလက်ဝမြို့တွင် ရခိုင် အမျိုးသမီးတစ်ဦးသည် ယနေ့နံနက် ၉ နာရီခန့်က ပလက်ချောင်းနံဘေး အောင်စေတီအနီးတွင် မိုင်းနင်းမိ၍ ၎င်းနေရာတွင် ပွဲချင်းပြီးသေဆုံးသွားကြောင်းသတင်းရရှိသည်။
သေဆုံးသူမှာ ပလက်ဝမြို့၊ မြို့မရပ်ကွက်နေ ဒေါ်မေနုသိန်း(၄၂)နှစ်ဖြစ်သည်။
သူမသည် အဖော်အမျိုးသမီးနှစ်ဦးနှင့်အတူ ယနေ့နံနက်က (၂၈၉) တပ်ရင်း အောက်ဘက် ပလက်ချောင်းနဘေးတွင် မျှစ်ခူးနေရာမှ မိုင်းပေါက်ကွဲသဖြင့် သေဆုံးသွားခြင်းဖြစ်ကြောင်း သူမအလောင်းအား ဆေးရုံသို့ပို့ဆောင်ရာတွင် ကူညီဆောင်ရွက်ပေးခဲ့သည့် အမည်မဖော်လိုအမျိုးသားက နိရဥ္စရာသတင်းဌာနအားပြောသည်။
“မျှစ်ခူးဖို့သွားကြတာ။အမျိုးသမီးသုံးလေးယောက်ပေါ့။ မေနုသိန်းက ပွဲချင်းပြီးသေတယ်။ နောက် အသက်ခြောက်ဆယ်ကျော် အမျိုးသမီးတစ်ယောက်ကတော့ မေနုသိန်းကိုမြင်လို့ သတိမေ့သွားတယ်။ အခုသူ့ကိုလည်းဆေးရုံတင်ထားတယ်။ သတိတော့ရပြီ။ မေနုသိန်းမှာ ခြေထောက်တွေ၊ လက်တွေနဲ့ တစ်ကိုယ်လုံးမှာ ဒဏ်ရာအပြည့်နဲ့ပါ။ အခုခွဲရုံပို့ထားပါတယ်အလောင်းကို” ဟုသူကပြောသည်။
သေဆုံးသူ ဒေါ်မေနုသိန်း၏ အမျိုးသားမှာ ပလက်ဝမြို့မီးသတ်တပ်ဖွဲ့ဝင်တစ်ဦးဖြစ်ကြောင်းသိရသည်။
သေဆုံးသူအမျိုးသမီး၏ ခဲအိုဖြစ်သူက “ မျှစ်ခူးဖို့သွားတဲ့အချိန်မှာ မိုင်းပေါက်ပြီးအခုလိုဖြစ်သွားတာ။ တပ်ရင်း ၂၈၉ အောက်ဘက် အောင်စေတီအနီးမှာ အဖော်တွေနဲ့သွားခူးတာ။ မိုင်းပေါက်ပြီး သေနတ်ပစ်သံတွေတော့ကြားတယ်” ဟု ဆိုကာ ထပ်မံဖြေဆိုခြင်း မရှိဘဲ ဖုန်းချသွားခဲ့သည်။
အဆိုပါကိစ္စနှင့်ပတ်သက်၍ ပလက်ဝမြို့မှ လူကြီးတစ်ဦးက ၎င်းကိုယ်တိုင် သေဆုံးသူအား သွားရောက်ကြည့်ရှုခဲ့ကြောင်း အတည်ပြုပြောသည်။
“ဆေးရုံကအခုနကပဲပြန်ရောက်တာ။ နောက်ထပ်အဖော်ပါသွားတဲ့လူတွေက ထိခိုက်ဒဏ်ရာရတာတော့မရှိဘူး။ သူတို့က စားဖို့၊ ရောင်းဖို့သွားခူးကြတာ။ စားဖို့မှမရှိလို့သွားခူးကြတာ။ မိသားစုနဲ့ထပ်တူ စိတ်မကောင်း ဖြစ်ရတယ်” ဟု ၎င်းက ပြောသည်။
စစ်ရေးပဋ္ဋိပက္ခပြင်းထန်နေသည့် ရခိုင်ပြည်နယ်မှ မြို့နယ်အချို့နှင့် ချင်းပြည်နယ် ပလက်ဝမြို့နယ်တို့တွင် စက်လက်နက်ပစ္စည်းအကြွင်းအကျန်များကြောင့် သေဆုံးသူများ နှင့် မိုင်းပေါက်ကွဲမှုများကြောင့် သေဆုံး ဒဏ်ရာရရှိသူများစွာရှိနေသည်ဟု ပဋ္ဋိပက္ခလေ့လာစောင့်ကြည့်ရေးအဖွဲ့များ၏ ထုတ်ပြန်ချက်တွင် ဖော်ပြ ထားသည်။
အိမ်စိုးဖြူ
Narinjara
Reviewed by THITHTOOLWIN
on
21:08
Rating:
No comments:
Post a Comment