အိန္ဒိယ ကိုဗစ်ကူးစက်မှု ကမ္ဘာ့ဒုတိယအများဆုံးနိုင်ငံ ဖြစ်လာနိုင်

မွမ်ဘိုင်းမြို့မှာ ဒေသခံတွေကို COVID-19 စစ်ဆေးဖို့ Swab နမူနာယူနေတဲ့ ကျန်းမာရေးဝန်ထမ်းများ။ (စက်တင်ဘာ ၅၊ ၂၀၂၀)

အိန္ဒိယနိုင်ငံမှာ ဒီကနေ့ တနင်္ဂနွေနေ့ တရက်တည်း ကိုရိုနာဗိုင်းရပ်စ် ကူးစက်သူ ၉၀,၀၀၀ ကျော် စံချိန်တင်ခဲ့တယ်လို့ အိန္ဒိယ ကျန်းမာရေးဝန်ကြီးဌာနက ပြောပါတယ်။ ဒါဟာ တကမ္ဘာလုံး အတိုင်းအတာနဲ့ တရက်တာကူးစက်မှုနှုန်း အများဆုံးလည်း ဖြစ်ပါတယ်။

Johns Hopkins တက္ကသိုလ် စာရင်းတွေအရ အခုလက်ရှိ အိန္ဒိယမှာ ကူးစက်သူ ၄,၁၀၀,၀၀၀ ကျော်ရှိနေပြီး ကမ္ဘာမှာ ကူးစက်မှု တတိယအများဆုံး ဖြစ်ပါတယ်။

အစောပိုင်းတုန်းက နိုင်ငံတွင်း လူဦးရေထူထပ်တဲ့ မြို့တွေမှာ ကူးစက်မှု မြင့်တက်နေခဲ့တာကနေ အခု ပြည်နယ်အားလုံးမှာ ဆက်ပြီး ကူးစက်ပျံ့နှံ့နေတာပါ။ ကူးစက်မှု အတော်များများက နိုင်ငံအနောက်ပိုင်း Maharashtra ပြည်နယ်နဲ့ တောင်ပိုင်းပြည်နယ်တွေဖြစ်တဲ့ Tamil Nadu၊ Andhra Pradesh၊ Telangana နဲ့ Karnataka ပြည်နယ်တွေမှာ ဖြစ်နေတာ ဖြစ်ပါတယ်။

အိန္ဒိယမှာ ကိုရိုနာဗိုင်းရပ်စ်အရေး အစိုးရရဲ့ တုံ့ပြန်ကိုင်တွယ်ဆောင်ရွက်မှုတွေ နှောင့်နှေးခဲ့ရပြီး မတ်လနှောင်းပိုင်းမှာ အစိုးရကနေ အသွားအလာ ပိတ်ပင်မှုတွေကို တင်းတင်းကျပ်ကျပ် ချမှတ်ထားခဲ့တာပါ။

အခုလက်ရှိမှာ အိန္ဒိယကျန်းမာရေးဌာနက တရက်ကို ဓာတ်ခွဲနမူနာပေါင်း ၁,၀၀၀,၀၀၀ ကျော်ကို စစ်ဆေးပေးနေပေမယ့် တချို့က ခန္ဓာကိုယ်တွင်း ရောဂါပိုးကို တိုက်ထုတ်နိုင်တဲ့ ပဋိဇီဝပစ္စည်း ထွက်ပေါ်ခြင်း ရှိမရှိ အလွယ်တကူ စစ်ဆေးတဲ့ နည်းလမ်းတွေကို အသုံးပြုနေကြတာကလည်း ပြဿနာတခု ဖြစ်နေပါတယ်။

ဒီနည်းလမ်းတွေက ဈေးသက်သာသလို ရလဒ်ကို အချိန်တိုအတွင်း သိနိုင်ပေမယ့် တိကျတဲ့အဖြေကို ရဖို့ ခက်ခဲနိုင်ပါတယ်။ ဒီလို တိကျတဲ့ရလဒ်ကို မပေးနိုင်တဲ့ အလွယ်တကူ ရောဂါစစ်ဆေးတဲ့ နည်းလမ်းတွေကို အသုံးပြုနေကြတာကြောင့် ရောဂါပိုးရှိနေတဲ့ သူတွေကို ရှာဖွေဖော်ထုတ်ဖို့ ပိုပြီး ခက်ခဲစေနိုင်သလို ပိုပြီး အန္တရာယ်များနိုင်တာပါ။

လက်ရှိ တကမ္ဘာလုံး အတိုင်းအတာနဲ့ အမေရိကန်မှာ ကူးစက်သူ ၆,၂၀၀,၀၀၀ ကျော်နဲ့ ကူးစက်မှုနှုန်း အများဆုံးဖြစ်ပြီး ဘရာဇီးလ်က ၄,၂၀၀,၀၀၀ ကျော်နဲ့ ဒုတိယအများဆုံး ဖြစ်ပါတယ်။

 ဗွီအိုအေ (မြန်မာပိုင်း)

https://burmese.voanews.com/a/india-covid/5572691.html