ရန်ကုန်တိုင်းတွင်း ကိုဗစ်ရောဂါထိန်းချုပ်ရေး အခက်အခဲရှိနေ

ရန်ကုန်မြို့ရှိ လမ်းတခုတွင် ပိုးသတ်ဆေးဖျန်းနေကြတဲ့ မီးသတ်တပ်ဖွဲ့ဝင်များ။ (မတ် ၂၉၊ ၂၀၂၀)

မြန်မာနိုင်ငံမှာ ကိုဗစ်ကပ်ရောဂါကူးစက်မှုတွေ တိုးလာနေတဲ့အထဲ ဒုတိယအများဆုံးဖြစ်လာနေတဲ့ ရန်ကုန်တိုင်းအတွင်း ကူးစက်မှုအန္တရာယ်ကို ကာကွယ်ထိန်းချုပ်ဖို့ ကြိုးစားနေပေမဲ့ စိန်ခေါ်မှုတွေလည်း ရှိနေတဲ့အကြောင်း ပြောပြပါမယ်။ ဒီသတင်းကို ဗွီအိုအေမြန်မာပိုင်း သတင်းထောက်စုစုက တင်ဆက်ပေးမှာပါ။

မကြာသေးခင် သီတင်းပတ်တွေကစလို့ ကိုရိုနာဗိုင်းရပ်စ် ကူးစက်မှုတွေ ရုတ်တရက် တိုးလာတဲ့အထဲမှာ ရခိုင်ပြည်နယ်ပြီးရင် ရန်ကုန်တိုင်းက ဒုတိယအများဆုံး ဖြစ်လာပါတယ်။ ကျန်းမာရေးနဲ့ အားကစားဝန်ကြီးဌာနရဲ့ ထုတ်ပြန်ချက်တွေအရ ရန်ကုန်တိုင်းအတွင်း ပိုးတွေ့လူနာတွေထဲမှာ ပြည်ပကပြန်လာသူတွေရှိသလို၊ တကျော့ပြန်ပြည်တွင်းကူးစက်မှု စတင်ရာ စစ်တွေကိုသွားရောက်ခဲ့ဖူးတဲ့ ခရီးသွားရာဇဝင် ရှိသူတွေ၊ အတည်ပြုလူနာနဲ့ ထိတွေ့ခဲ့လို့ တဆင့်ကူးစက်ခံရသူတွေအပြင်၊ ဘယ်ကနေ ကူးစက်ခံရမှန်းမသိတဲ့ သူတွေပါ တွေ့နေရတာပါ။

ဒီလိုအခြေအနေမျိုးမှာ အများပြည်သူ သွားလာရေး လုပ်ငန်းတွေကတဆင့် ကူးစက်မှာကို ကာကွယ်ဖို့ လိုအပ်နေတာကြောင့် နေ့စဉ် ခရီးသည် ၁၀၀,၀၀၀ ဝန်းကျင်လောက် သုံးစွဲနေတဲ့ YBS ယာဉ်လိုင်းတွေမှာ ကြိုတင်ကာကွယ်ရေး ညွှန်ကြားချက်တွေနဲ့အညီ ဆောင်ရွက်ဖို့ ကြိုးပမ်းနေပေမဲ့ စိန်ခေါ်မှုတွေလည်း ရှိနေတယ်လို့ ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့ YRTA ရဲ့ တွဲဖက်အတွင်းရေးမှူး ဦးလှအောင်က ပြောပါတယ်။

“အားလုံးကိုလည်း ကျနော်တို့ဘက်က အနူးအညွှတ် မေတ္တာရပ်ခံချင်တာက Social Distancing ကိစ္စပါ။ ခရီးသွားလာမှုမှာ မနက်ပိုင်းရုံးတက် ရုံးဆင်းချိန်ကြပ်တဲ့အတွက် ဒါလေးအပေါ်မှာတော့ ကျနော်တို့လည်း နိုင်သမျှယာဉ်တွေက တချို့ဆိုရင် စစချင်းမှာ လေ့လာတဲ့အနေနဲ့ ၂ စီးတွဲလွှတ်တာတွေ လုပ်တယ်။ လုပ်တဲ့အခါကျ အလယ်မှာသွားပိတ်နေပြီးတော့ ခရီးသည်တွေက ဒီမှတ်တိုင်မှာ လူတွေစုပြီးတော့ အကြာကြီးစောင့်ရတဲ့အဖြစ်တွေ ဖြစ်တော့ တဘက်မှာ ဟုတ်သလိုလိုနဲ့ ဟိုတဘက်မှာ သွားထိခိုက်ပြန်ရော။ အဲလိုတွေဖြစ်တော့ ဒီ Social Distancing အပိုင်းကိုတော့ တတ်နိုင်သမျှ ယာဉ်တွေပေါ်မှာနေရာ အကျယ်အဝန်းတွေရှိရင် လိုက်နာပြီးတော့ စီးနင်းပေးကြပါလို့ မေတ္တာရပ်ခံပါတယ်။ နောက်တချက်က Mask မဖြစ်မနေတပ်ခြင်းဖြင့် မိမိကိုယ်လည်း ကာကွယ်ပေးပါ။ နောက်မိမိရဲ့ ပတ်ဝန်းကျင်ကိုလည်း ကာကွယ်ပေးပါလို့ ကျနော့်အနေနဲ့ မေတ္တာရပ်ခံ ပန်ကြားလိုပါတယ်ဗျ။”

ထပ်တိုးလူနာသစ် ၁၀၀ ထဲမှာ ရန်ကုန်တိုင်းအတွင်း ကူးစက်ခံရသူပေါင်း ၄၇ ဦး ရှိနေတာပါ။ အဲဒီထဲမှာ စက်ရုံလုပ်သားနဲ့ အခြေခံလူတန်းစား အများဆုံးနေထိုင်ရာ လှိုင်သာယာမြို့နယ်က ၂ ဦးလည်း ပါဝင်ပါတယ်။ ရန်ကုန်မှာ ကူးစက်မှုတွေ တိုးလာနေတာနဲ့အမျှ ကပ်ရောဂါနဲ့ပတ်သက်လို့ ထုတ်ပြန်ထားတဲ့ ညွှန်ကြားချက်တွေကို အားလုံးလိုက်နာကြဖို့လည်း ကျန်းမာရေးပညာရှင်တွေ တိုက်တွန်းနေကြပါတယ်။ ကိုဗစ်တိုက်ဖျက်ရာမှာ စေတနာ့ဝန်ထမ်းအဖြစ် ဆောင်ရွက်ပေးနေတဲ့ ဒေါက်တာနိုင်မင်းထွဋ်ကတော့ ရောဂါကူးစက်မှု အန္တရာယ်ကို ကာကွယ်ဖို့ ကျန်းမာရေးဆိုင်ရာ ညွှန်ကြားချက်တွေကို လိုက်နာဖို့ သတိပေးနေပါတယ်။

“ကျနော့်အနေနဲ့ လှိုင်သာယာမှာနေတဲ့ လူတယောက်အနေနဲ့ရော၊ ဆရာဝန်တယောက်အနေနဲ့ရော စိတ်ပူတာက လှိုင်သာယာက အောက်မြန်မာပြည်ရဲ့အဝင်အထွက်နေရာပဲပေါ့နော်။ ဧရာဝတီတို့ဘက်က အဝင်အထွက်နေရာဖြစ်တဲ့ အတွက်ကြောင့်မို့လို့ ဒီနေရာကိုပိုပြီးတော့ ဂရုစိုက်စေချင်တယ်။ နောက်ပြီးတော့ ပြည်သူတွေအားလုံးကလည်း ပူးပေါင်းပါဝင်စေချင်တယ်။ ဘယ်လိုပူးပေါင်း ပါဝင်စေချင်တယ်ဆိုတော့ ကိုယ့်ရဲ့ဆွေမျိုးပဲဖြစ်ဖြစ် သူငယ်ချင်းပဲဖြစ်ဖြစ် မဖြစ်လောက်ပါဘူးလေဆိုပြီးတော့ အိမ်မှာလက်ခံထားတာမျိုး မဟုတ်ပဲနဲ့ ဘယ်ကနေပဲလာလာ သက်ဆိုင်ရာအုပ်ချုပ်ရေးမှူး၊ ဒေသန္တရဆေးခန်းနဲ့ ဆရာဝန်တွေဆီကို အကြောင်းကြားပြီးတော့ Quarantine ဝင်စေချင်တယ်။ ဘာကြောင့်လည်းဆိုတော့ ကျနော်တို့မျက်စိနဲ့ မြင်ရတာမဟုတ်ဘူး။ လေကနေတဆင့် ကူးစက်တဲ့ရောဂါဖြစ်လို့ ဘယ်သူတွေကိုကူးစက်ခံရနိုင်လည်းဆို လူတိုင်းက ကူးစက်ခံရနိုင်တယ်။ ဒါကြောင့်မို့ လူတိုင်းအကုန်လုံး ပူးပေါင်းပါဝင်ဆောင်ရွက် စေချင်ပါတယ်။”

အင်္ဂါနေ့ မနက်ပိုင်း ကျန်းမာရေးဝန်ကြီးဌာနရဲ့ ထုတ်ပြန်ချက်အရ မြန်မာနိုင်ငံမှာ ကိုဗစ်ဓာတ်ခွဲအတည်ပြုလူနာ ၈၈၇ ဦးရှိနေပြီး၊ အများစုကတော့ ရခိုင်ပြည်နယ်မှာပါ။ ပြည်တွင်းကူးစက်မှုစတင်ခဲ့တဲ့ ရခိုင်ပြည်နယ်မှာတော့ မလိုအပ်ရင် အိမ်ပြင်မထွက်ဖို့နဲ့ ခရီးသွားလာမှုတွေကိုလည်း ကန့်သတ်ထားပါတယ်။

စုစု/VOA (Burmese)

https://burmese.voanews.com/a/covid-myanmar-case/5566183.html