 |
| အိန္ဒိယနိင်ငံ Hyderabad မှာ ဒေသခံတွေကို COVID-19 စစ်ဆေုးဖို့ ပြင်ဆင်နေတဲ့ ကျန်းမာရေးဝန်ထမ်းများ။ (သြဂုတ် ၂၈၊ ၂၀၂၀) |
ကမ္ဘာမှာ တတိယ ကိုဗစ်အဆိုးဆုံး၊ အာရှမှာတော့ အဆိုးဆုံးဖြစ်နေတဲ့ အိန္ဒိယနိုင်ငံမှာ ကိုဗစ်ပိုးတွေ့သူသစ် ၇၆,၄၇၂ ဦး ဒီနေ့ နောက်ဆုံးရှိခဲ့ပြီး တနိုင်ငံလုံး ပိုးတွေ့သူပေါင်း ၃.၄ သန်း ကျော်သွားပါပြီ။
လူဦးရေ ၁.၄ ဘီလီယျံရှိတဲ့ အိန္ဒိယဟာ အခု ကမ္ဘာမှာ ကိုဗစ်ကူးစက်မှု အမြန်ဆုံးနိုင်ငံ ဖြစ်သွားပါပြီ။ ဒါ့အပြင် နောက်ဆုံး ထပ်သေဆုံးသူ ၁,၀၂၁ ယောက်ရှိတာမို့ သေဆုံးသူပေါင်းလည်း ၆၂,၅၅၀ ထိ တက်လာပါပြီ။
တောင်ကိုရီးယားမှာလည်း လူချင်းခပ်ခွာခွာနေဖို့ တင်းကျပ်ထားတဲ့ကြားက ဒီနေ့ ၃၂၃ ဦး ပိုးထပ်တွေ့ခဲ့ပြီး ခုလို ရာဂဏန်းတွေအဆင့် ၁၆ ရက်ဆက်တိုက် မြင့်တက်လာခဲ့ကာ စုစုပေါင်း ပိုးတွေ့သူ ၁၉,၄၀၀ ယောက် ရှိပြီဖြစ်ပါတယ်။ နောက်ထပ်သေဆုံးသူ ၅ ဦးရှိတာကြောင့် စုစုပေါင်း သေဆုံးသူက ၃၂၁ ဦး ရှိသွားပါပြီ။
အခု နောက်ထပ် ရောဂါပိုးကူးစက်သူ အများစုဟာ လူနေထူထပ်တဲ့ ဆိုးလ်မြို့တော်ကဖြစ်ပြီး အဓိကအားဖြင့် ခရစ်ယာန်ဘုရှားရှိခိုးကျောင်းတွေ၊ စားသောက်ဆိုင်တွေ၊ ကျောင်းတွေနဲ့ လူတွေစုနေကြတဲ့ အိမ်ရာတွေမှာ ဖြစ်ခဲ့တာပါ။ ပြီးခဲ့တဲ့ ၁၆ ရက်အတွင်း ပိုးတွေ့လူူနာသစ် ၄,၆၃၀ အထိ ထိုးတက်လာတာမို့ ဆေးရုံတွေ မနိုင်မှာ စိုးရိမ်နေကြပါတယ်။
မလေးရှားနိုင်ငံမှာတော့ ကိုဗစ်ကာကွယ်ထိန်းချုပ်ရေး ကန့်သတ်ချက်တွေကို ဒီနှစ်အကုန်ထိ ထပ်တိုးလိုက်တာမှာ နိုင်ငံခြားခရီးသည် ကန့်သတ်မှုလည်း ပါသွားပါတယ်။
ကမ္ဘာမှာ ကိုဗစ်ကူးစက်မှု မြင့်မားလာနေချိန် တိုင်းပြည်ထဲမှာ ထိန်းထားနိုင်ပေမယ့် ကွက်ကြားကွက်ကြား ပိုးတွေ့နေရလို့ ခုလို ကန့်သတ်မှု တိုးတာပါလို့ ဝန်ကြီးချုပ် Muhyiddin Yassin က ရုပ်မြင်သံကြားကနေ မိန့်ခွန်းပြောခဲ့ပါတယ်။ မလေးရှားမှာ ပိုးတွေ့သူပေါင်း ၉,၀၀၀ ကျော်လာပြီး သေဆုံးသူ ၁၂၅ ဦး ရှိနေပါတယ်။
သြစတြေးလျမှာတော့ ရောဂါပိုးကူးစက်သူ နောက်ထပ် ၉၄ ဦး ဝိတိုရိယပြည်နယ်မှာ ထပ်တွေ့ခဲ့ပြီး ထပ်သေဆုံးသူကလည်း ၁၈ ဦးအထိ ဒီနေ့ ရှိခဲ့ပါတယ်။ ဒါပေမယ့် နှစ်လအတွင်း ပထမဆုံးနေ့အဖြစ် ပိုးတွေ့သူသစ် ရာဂဏန်းအောက် စကျလာတာပါ။ အခု နောက်ထပ်သေဆုံးသူတွေ အပါအဝင် ဝိတိုရိယပြည်နယ်မှာ သေဆုံးသူပေါင်း ၅၁၄ ဦးအထိ ရှိလာပြီး သြစတြေးလျ တနိုင်ငံလုံးမှာတော့ ၆၀၁ ဦး ရှိသွားပါပြီ။
ကိုဗစ်စဖြစ်ခဲ့တဲ့ တရုတ်နိုင်ငံမှာတော့ အခြေအနေတွေ ပြန်ထိန်းနိုင်ကာ ကျောင်းသူကျောင်းသား အရေအတွက် သုံးပုံတပုံအထိ မြို့တော် ဘေဂျင်းမှာ ဒီနေ့ ကျောင်းပြန်တက်နိုင်ခဲ့ပါတယ်။ အထက်တန်း၊ အလယ်တန်း၊ မူလတန်း ကျောင်းသားကျောင်းသူ စုစုပေါင်း ၆ သိန်းနီးပါး ကျောင်းပြန်တက်နေပြီး အင်္ဂါနေ့မှာ နောက်ထပ် ၄ သိန်း၊ စက်တက်ဘာ ၇ ရက်ကျရင် နောက်ဆုံးကျန်တဲ့ ၅ သိန်းကျော် ကျောင်းပြန်တက်နိုင်ဖို့ ပြင်ဆင်နေပါတယ်။
ဗွီအိုအေ (မြန်မာပိုင်း)
Reviewed by THITHTOOLWIN
on
19:44
Rating:
No comments:
Post a Comment