"ရခိုင်ပြည်နယ်မှာ ရိက္ခာမပြတ်စေရပါဘူး" - ဒေါ်အောင်ဆန်းစုကြည်

နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်။ (ဓာတ်ပုံ - Myanmar State Counsellor Office - သြဂုတ် ၂၈၊ ၂၀၂၀)

ကိုဗစ်ကပ်ရောဂါ ကူးစက်မှုတွေ ရုတ်တရက်တိုးလာနေတဲ့ ရခိုင်ပြည်နယ်အတွက် လိုအပ်တဲ့ ကူညီထောက်ပံ့မှုတွေ ပေးအပ်သွားမယ့်အကြောင်း နိုင်ငံတော်အတိုင်ပင်ခံပုဂ္ဂိုလ်က ကတိပြုလိုက်တာကို ပြောပြပါမယ်။ ဒီအကြောင်းကို ဗွီအိုအေမြန်မာပိုင်း သတင်းထောက်စုစုက တင်ဆက်ပေးပါမယ်။

ရခိုင်ပြည်နယ်မှာ ကပ်ရောဂါကူးစက်မှုတွေ စံချိန်ချိုးလောက်အောင် တိုးလာရာက စစ်တွေမြို့နယ်မှာ ညမထွက်ရအမိန့်နဲ့ ပြည်နယ်တခုလုံး မလိုအပ်ဘဲ အပြင်မထွက်ဖို့ အမိန့်တွေ ထုတ်ပြန်ထားသလို သွားလာလှုပ်ရှားမှုတွေကိုလည်း ကန့်သတ်ထားရတဲ့အထိပါ။ ကပ်ရောဂါထိန်းချုပ် တားဆီးရေး အစီအမံတွေကြောင့် ဒေသခံတွေအတွက် အခြေခံလိုအပ်ချက်တွေ ပြတ်လပ်မှာ အခက်အခဲကြုံရမှာကိုလည်း စိုးရိမ်မှုတွေ ရှိနေပါတယ်။ ဒါပေမဲ့လည်း ဒီကနေ့ အွန်လိုင်းဆွေးနွေးပွဲမှာတော့ ရခိုင်ပြည်နယ်မှာ အခက်အခဲကြုံနေရသူတွေအတွက် ပံ့ပိုးကူညီမယ့်အကြောင်း နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ကတိပေးလိုက်ပါတယ်။

“ကျမအနေနဲ့ ပြည်ထောင်စုအစိုးရကိုယ်စား ဒါတော့ ကျမရဲရဲကြီးပြောနိုင်ပါတယ်။ ရိက္ခာမပြတ်စေရပါဘူး။ ရခိုင်ပြည်နယ်မှာ ရိက္ခာမပြတ်စေရပါဘူး။ လိုတဲ့ရိက္ခာတွေကို ကျမတို့ရတဲ့နည်းနဲ့ဖြစ်အောင်လို့ ပို့ပေးပါမယ်။ နောက်ပြီးတော့ သက်ဆိုင်ရာတခြားတိုင်းတွေကလည်း ပူးပေါင်းပြီးတော့ ဆောင်ရွက်မယ်ဆိုတာလည်း ယုံကြည်ပါတယ်။ နောက်တခုကတော့ ငွေရေးကြေးရေးပေါ့နော်။ ငွေရေးကြေးရေးလည်း လိုသမျှပံ့ပိုးပါ့မယ်။

ဒီနိုင်ငံဟာ ချမ်းသာတဲ့နိုင်ငံမဟုတ်ဘူး။ အရင်းအမြစ်က သိပ်များတဲ့နိုင်ငံမဟုတ်ဘူး။ သို့သော်ငြားလည်း ကျမတို့ကနေပြီးတော့ ပြည်ထောင်စုရဲ့လိုအပ်တဲ့ အစိတ်အပိုင်းကို အမြဲပဲထောက်ပံ့ပါတယ်။ ပြည့်ပြည့်စုံစုံထောက်ပံ့ပါတယ်။ ပြည်သူတွေကလည်း ဝိုင်းဝန်းပြီးတော့ ကူညီကြမယ် ပံ့ပိုးကြမယ်လို့ ကျမယုံကြည်ပါတယ်။ အဲဒီဟာလည်း ကျမတို့အင်အားတခုပဲ။ နိုင်ငံကမချမ်းသာဘူးဆိုပေမဲ့ ကျမတို့ပြည်သူတွေရဲ့ ရက်ရောတဲ့စိတ်ဓာတ်က အင်မတန်ချမ်းသာပါတယ်။

အဲဒါကြောင့်မို့လို့ တကယ်အရေးဟဲ့ဆိုရင် အရေးကြီးပြီဆိုရင် သွေးစည်းချင်တဲ့စိတ်ဓာတ်ကလည်းရှိတယ်။ အရေးဟဲ့ဆိုရင် ဝိုင်းဝန်းပြီးတော့ ကူညီကြတယ် ပံ့ပိုးကြတယ်။ အဲဒါကြောင့်မို့လို့ ငွေရေးကြေးရေးကလည်း ကျမတို့လုံလုံလောက်လောက် ပေးနိုင်မှာဖြစ်ပါတယ်။ လုံလုံလောက်လောက်ဖြစ်အောင်လည်း ကျမတို့လုပ်ပါ့မယ်။ ဒါကျမတို့ရဲ့ ပြည်ထောင်စုတစိတ်တပိုင်းမှာ ကျန်းမာရေးအတွက် အခြေခံပြည်သူတွေရဲ့လိုအပ်ချက်အတွက် မရှိရဘူးဆိုတာမဖြစ်စေအောင် ကျမတို့ပံ့ပိုးပေးပါ့မယ်။”

ရခိုင်ပြည်နယ်မှာ ရက်ပိုင်းအတွင်း လူ ၂၀၀ ကျော် ကူးစက်တဲ့အထိ ကြုံခဲ့ရတာကြောင့် သက်ရောက်မှုတွေ ရှိနိုင်တာကို လက်ခံပြောကြားခဲ့သလို စိန်ခေါ်မှုတွေကို ရင်ဆိုင်ဖြေရှင်းနိုင်မယ်လို့ ယုံကြည်ကြောင်းလည်း ပြောပါတယ်။ ဒီနေ့အွန်လိုင်းဆွေးနွေးပွဲမှာ ဒေါ်အောင်ဆန်းစုကြည်နဲ့အတူ ပါဝင်ဆွေးနွေးခဲ့တဲ့ ရခိုင်ပြည်နယ်ဝန်ကြီးချုပ်ဦးညီပုကတော့ လိုအပ်ချက်တွေနဲ့ စိန်ခေါ်မှုတွေကို တင်ပြခဲ့ပါတယ်။

“ကျနော်တို့ အခု Quarantine Center တွေမှာ သုံးစွဲနေရတဲ့ အနေအထားတွေရှိပါတယ်။ ပြည်သူတွေကို ကျနော်တို့ထောက်ပံ့နေတာတွေ ရှိပါတယ်။ အဲဒီအပေါ်မှာ ငွေကြေးလိုအပ်ချက်တွေ အခုလောလောဆယ်လိုနေပါတယ်။ အဲတော့ အခုကျနော်တို့မှာ ရံပုံငွေက ၈၅.၅ သန်းလောက်ရထားပါတယ်။ နောက်တခုက အရေးပေါ်ရံပုံငွေ ၁ဘီလီယံကိုလည်း တောင်းခံထားပါတယ်။ တင်ပြထားပါတယ်။ ဆိုတော့ ဒီနှစ်ခုနဲ့ပတ်သက်လို့လည်းပဲ ခွင့်ပြုပေးစေချင်ပါတယ်။

အဲတော့ ငွေကြေးသုံးထားတာအနေနဲ့ ပြောရရင်တော့ ပြည်ထောင်စုက ၁၄.၈ ဘီလီယံ သုံးထားပါတယ်။ကျနော်တို့ ပြည်နယ်အစိုးရက ၁.၅၆၆ ဘီလီယံ သုံးထားပါတယ်။ နောက်တခုက လူကယ်ပြန်ဝန်ကြီးဌာနကလည်း သုံးထားပါတယ်၊ သန်းပေါင်း ၃၁၁.၄ သန်းလောက် သုံးထားပါတယ်။”

ရခိုင်ပြည်နယ်မှာ ရောဂါကူးစက်မှုတွေ တိုးလာတဲ့ အခြေအနေနဲ့ ပတ်သက်လို့ COVID-19 ကာကွယ်၊ ထိန်းချုပ်၊ ကုသရေး အမျိုးသားအဆင့် ဗဟိုကော်မတီဥက္ကဋ္ဌ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဒီသီတင်းပတ် အစောပိုင်းက မိန့်ခွန်းပြောရာမှာတော့ စိုးရိမ်မှုတွေ မလွန်ကဲကြဖို့နဲ့ သန္နိဋ္ဌာန် ခိုင်ခိုင်မာမာနဲ့ တုံ့ပြန်ကြဖို့ တိုက်တွန်းထားပါတယ်။

စုစု/VOA (Burmese)

https://burmese.voanews.com/a/rakhine-covid-dassk/5561617.html