သမီးလှကျေးရွာမှ ဒဏ်ရာရ ကလေးငယ်ကို ရသေ့တောင်မှ စစ်တွေဆေးရုံသို့ ယူဆောင်

နိရဉ္စရာ၊ ဇန်န၀ါရီ ၂၆

ရသေ့တောင်မြို့နယ်၊ သမီးလှကျေးရွာမှ ကျည်ဆံထိမှန် ဒဏ်ရာရရှိခဲ့သည့် ဦးကျော်ကျော်နိုင်၏သား မောင်နိုင်စိုး (၇) နှစ်ကို ရသေ့တောင်မြို့နယ် ဆေးရုံမှ စစ်တွေဆေးရုံကြီးသို့ယနေ့ ညနေ ၅ နာရီ ၁၅ မိနစ်က ယူဆောင်သွားခဲ့ပြီဟု သိရသည်။

၎င်းကလေးငယ် ရရှိသည့် ဒဏ်ရာမှာ စိတ်မချရသဖြင့် စစ်တွေဆေးရုံကြီးသို့ ပို့ဆောင်ခြင်း ဖြစ်သည်ဟု ရသေ့တောင်မြို့နယ် CSO ပေါင်းစုံ စစ်ဘေးရှောင် ကူညီရေး အသင်း ဥက္ကဋ္ဌ ဦးကျော်သာခင်က ပြောသည်။

သူက “ ဒီကနေ့ ညနေ ၅ နာရီ ၁၅ မိနစ်မှာ ဆေးရုံက လူနာတင်ကားနဲ့ စစ်တွေကို ယူဆောင်သွားပါတယ်။ ကျွန်တော်တို့ အဖွဲ့အနေနဲ့ ငွေသုံးသောင်း ကူညီလိုက်ပါတယ်” ဟု ပြောကြားသည်။

ဒဏ်ရာရရှိခဲ့သူ မောင်နိုင်စိုးသည် ယနေ့ နံနက် ၉ နာရီကျော်ခန့်က မိခင်ဖြစ်သူ၏ ထမင်းချက်ရာတွင် တစ်ခြား ညီအစ်ကို မောင်နှမ ၂ ဦးနှင့် အတူရှိနေစဉ် ဦးခေါင်း နားထင်ကို သေနတ်ကျည်ဆံ ရှပ်ထိမှန်ခဲ့သည်ဟု သူ၏ ဖခင်က ပြောကြားသည်။

တိုက်ပွဲမှာ မြန်မာ့တပ်မတော်နှင့် ရက္ခိုင့်တပ်မတော် (AA) တို့အကြား ယနေ့ နံနက် ၉ နာရီအချိန်ခန့်က သမီးလှ ကျေးရွာ အနောက်ဘက် တံတားအနီးတွင် ဖြစ်ပွားခဲ့သည်ဟု သိရသည်။

Narinjara
https://www.facebook.com/Narinjara-151742128171206