မိန်းမကိုယ်ထဲ စိတ်ကြွဆေးပြားထည့်၍ အချုပ်သား ဧည့်တွေ့လာသည့် အမျိုးသမီးအား ဖမ်းဆီးရမိ

မုနိမြီ၊ အောက်တိုဘာ ၂၆

ရန်ကုန်တိုင်းဒေသကြီး၊အင်းစိန်မြို့နယ် မြောက်ပိုင်းခရိုင် တရားရုံးတွင် မူးယစ်မှုဖြင့် ရုံးထုတ်လာသည့် အချုပ်သားတစ်ဦးထံ လာရောက်တွေ့ဆုံသည့် အမျိုးသမီး၏ မိန်းမကိုယ်တန်ဆာအတွင်းမှ WY စိတ်ကြွဆေးပြား ၅၀၀ ကျော်ကို သိမ်းဆည်းရမိခဲ့ကြောင်း ရဲတပ်ဖွဲ့ထံမှ စုံစမ်းသိရှိ ရပါသည်။

"၂၀၁၈ အောက်တိုဘာလ ၂၂ ရက် မွန်းလွဲ ၁ နာရီခန့်က မြောက်ပိုင်းခရိုင်တရားရုံးသို့ မူးယစ်အမှုဖြင့် ရုံးထုတ်လာသော အချုပ်သားအမျိုးသားတစ်ဦးထံ ဧည့်တွေ့သည့် အမျိုးသမီးကို ရဲမေတွေက စစ်ဆေးတော့ သူ့မိန်းမကိုယ်ထဲမှာ တိပ်အမည်းနဲ့ပတ်ထားတဲ့ အထုပ်တစ်ထုပ်ကို တွေ့တယ်။ အဲဒီအထုပ်ကို ဖွင့်စစ်တော့ အထဲမှာ WYစိတ်ကြွဆေးပြား ၅၉၇ ပြား
ထည့်ထားတဲ့ ကပ်ခွာအိတ်သုံးလုံးကို ထပ်တွေ့တယ်။ ဒီဆေးပြားတွေကို ပို့ခအဖြစ် အချုပ်သားဆီက ကျပ်ငါးသောင်းရတယ်လို့ အမျိုးသမီးက ထွက်ချက်ပေးထားတယ်” ဟု ရဲအရာရှိတစ်ဦးမှ Munimary News Agencyသို့ ပြောကြားသည်။

အဆိုပါအမျိုးသမီးအား ငွေပေး၍ စိတ်ကြွဆေးပြားများ အချုပ်ခန်းအတွင်း ခိုးဝှက်ယူဆောင်လာရန် စေခိုင်းသူ အချုပ်သား အသက် ၂၆ နှစ်ရှိ ကျော်ခိုင်ဖြိုး (ခ) ကျော်ထွဋ်ဆွေမှာ မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာဥပဒေ ပုဒ်မ ၁၉(က)/ ၂၁ အမှုဖြင့် မြောက်ပိုင်းခရိုင်တရားရုံးတွင် အမှုရင်ဆိုင်နေရသူဖြစ်ပြီး WY ဆေးပြားများ ခိုးဝှက်ယူဆောင်လာသူ အမျိုးသမီးနှင့် ယင်းအချုပ်သားကို အင်းစိန်မြို့မရဲစခန်းက မူး/ စိတ် ပုဒ်မ ၁၉(က)/ ၂၁ ဖြင့် အမှုဖွင့်၍ ကျန်အမှုကွင်းဆက်တွင် ပါဝင်သူများကို ဖော်ထုတ်ဖမ်းဆီးအရေးယူနိုင်ရန် စုံစမ်းစစ်ဆေးနေကြောင်း ရဲတပ်ဖွဲ့ထံမှ သိရသည်။

သုတ(မုနိမြီ)
Munimary News Agency
https://www.facebook.com/munimarynews