နောက်လာမယ့် ၄ ရက် အတွင်း ထိုင်းလူငယ်တွေကို ကယ်ဆယ်နိုင်ရေး

ကယ်ဆယ်ရေး ကို အစဉ်တစိုက် လုပ်ဆောင်နေကြ

မိုးလာမှာမို့ ထိုင်းနိုင်ငံ ဂူ အတွင်း က လူငယ်လေးတွေကို ၄ ရက်အတွင်း ကယ်ဆယ်နိုင်ရေး အတွက် ပြင်ဆင် နေကြပါတယ်။

မိုးကြီး လာရင် ဂူထဲကို နောက်ထပ် ရေတွေ ဝင်လာပြီး ဂူထဲက လမ်းကျဉ်းလေးတွေမှာ ရေတွေ ပြည့်လာကာ လမ်းတွေ ထပ်ပိတ် လာမှာကို စိုးရိမ်နေကြတာပါ။

ကယ်ဆယ်ရေးအဖွဲ့ရဲ့ ခေါင်းဆောင် လည်းဖြစ် ချင်းရိုင်ခရိုင် အုပ်ချုပ်ရေးမှူးလည်း ဖြစ်တဲ့ မစ္စတာ နရွန်တက် အောဆော့တနာခွန်း က ထမ်လွန် နမ့်နွန် ဂူထဲက ရေအခြေအနေ၊ ရာသီဥတု နဲ့ ကလေးတွေ ရဲ့ ကျန်းမာရေး စတဲ့ အခြေအနေတွေက အခုလောလောဆယ် အထိတော့ သိပ်ကောင်းပါတယ် လို့ ဆိုပါတယ်။

ဘာလုပ်မယ်ဆိုတာကို သူတို့ သေသေချာချာရှင်းရှင်းလင်းလင်း ဆုံးဖြတ်ရတော့မယ်လို့လည်း သူ ကပြောပါတယ်။

လူငယ်ကလေးတွေ ဟာ ဇွန်လ ၂၃ ရက်နေ့ကတည်းက ပိတ်မိနေတာဖြစ်ပြီး ဇူလိုင်လ ၂ ရက်နေ့ ည မှာ သူတို့ ဘယ်မှရှိတယ် ဆိုတာကို ပြန်ရှာတွေ့နိုင်ခဲ့တာပါ။

အဲဒီအချိန်ကတည်း က သူတို့အတွက် အစား အစာတွေ၊ အောက်စီဂျင် ဘူးတွေ ကျန်းမာရေး အစောင့်အရှောက်တွေ ပေးထားနိုင်ခဲ့ပါတယ်။

သောကြာနေ့တုံးက ကယ်ဆယ်ရေး လုပ်ငန်းတွေ လုပ်ပေးနေတဲ့ ထိုင်းရေတပ်အဖွဲ့ဝင်ဟောင်း တယောက် ဆုံးပါးခဲ့ရတာ ကို ကြည့်ရင် ဂူတွင်း ကယ်ဆယ်ရေး လုပ်ငန်းတွေက ဘယ်လောက် အထိ အန္တရာယ်များတယ် ဆိုတာ က သိသာနေပါတယ်။

ဒါပေမယ့် ဂူတွင်းမှာ လူတွေများ ပြီး အောက်စီဂျင် ရရှိနိုင်မှု နည်းလာမှာ ကို ကြိုတင် ကာကွယ်တဲ့အနေနဲ့ အောက်စီဂျင်လိုင်းတခု တည်ဆောက်ထားတဲ့အကြောင်း တာဝန်ရှိသူတွေ က ပြောပြပါတယ်။

ဂူထဲက ရေတွေ ကို ဆက်ပြီး စုပ်ထုတ်နေတဲ့အပြင် ရေတွေ ပိုစီးထွက်အောင် ကျောက်တွေ ကို ဖောက်ပြီး ရေထွက်လမ်းတွေလည်း လုပ်နေပါတယ်။

လာမယ့် အရေးကြီးရက်ပိုင်းတွေမှာ ဘယ်လို နည်းလမ်းနဲ့ ပိတ်မိနေတဲ့ လူငယ်လေးတွေ တို့ကို ကယ်ထုတ်မယ်ဆိုတဲ့အသေးစိတ် အစီအစဉ်ကို တော့ ချင်းရိုင် ခရိုင်အုပ်ချုပ်ရေးမှူး က ထုတ်မပြော သေးပါဘူး။

ဒီလို အချိန်မှာပဲ ဂူထဲမှာပိတ်မိနေတဲ့ ကလေးတွေရဲ့ ထွက်ပေါက် ကို မြန်မာနိုင်ငံ ဘက်အခြမ်းမှာ ရှာဖွေပေးဖို့ ထိုင်းအစိုးရ က စနေနေ့မှာ မြန်မာအစိုးရထံ ထပ်မံ အကူအညီတောင်းခဲ့ပါတယ်။

အဲဒီ အတွက် ကြက်ခြေနီအဖွဲ့ဝင်တွေ၊ မီးသတ်တပ်ဖွဲ့ဝင်တွေ နဲ့အတူ စစ်တပ် က လူတွေဟာ အဲဒီ ထိုင်းဖက် က ဂူ နဲ့ ဆက်နေနိုင်တဲ့ ဂူထွက်ပေါက်တွေ ကို မြန်မာဖက် အခြမ်းမှာ လိုက်လံ ရှာဖွေ နေတယ်လို့ တာချီလိတ် ခရိုင် ဆိုင်ရာ ထိုင်း မြန်မာဆက်ဆံရေးရုံး က တာဝန်ရှိသူ တယောက်ဖြစ်တဲ့ ဦးထွန်း က ဘီဘီစီ ကို ပြောပါတယ်။

BBC Burmese
http://www.bbc.com/burmese