ငြိမ်းစုစီကို တပ်မတော်သား ၆၀ ဆွေးနွေးမည်

တပ်မတော်သား လွှတ်တော် ကိုယ်စားလှယ်တွေကို တွေ့ရစဉ်/ Photo: RFA

အရပ်ဖက်အဖွဲ့အစည်းတွေက ကန့်ကွက်နေကြတဲ့ ငြိမ်းချမ်းစွာစုဝေးခြင်းနဲ့ ငြိမ်းချမ်းစွာ စီတန်းလှည့်လည်ခြင်းဆိုင်ရာ ငြိမ်းစုစီ ဥပဒေကြမ်းကို တပ်မတော်သား ကိုယ်စားလှယ် ၆၀ ဦးအပါအ၀င် ကိုယ်စားလှယ်ပေါင်း ၈၀ ခန့်က ဆွေးနွေးမယ်လို့ သိရပါတယ်။

ဝေါမြို့နယ်၊ ပြည်သူ့လွှတ်တော် ကိုယ်စားလှယ် ဦးတင်ထွေးက ငြိမ်းစုစီဥပဒေကို ဆွေးနွေးမယ့် တပ်မတော်သား ကိုယ်စားလှယ် ၆၀ ဦးရှိကြောင်း သတင်းထောက်တွေကို ပြောပါတယ်။

အမျိုးသားလွှတ်တော်က အတည်ပြုလိုက်တဲ့ အဲဒီငြိမ်းစုစီဥပဒေကို ပြည်သူ့လွှတ်တော်မှာ မကြာခင်ဆွေးနွေးတော့ မှာဖြစ်ပါတယ်။

တပ်မတော်သား ကိုယ်စားလှယ် အရေအတွက် ဒီလောက်ပမာဏ ၀င်ရောက်ဆွေးနွေးတာဟာ ၂၀၁၁ ခုနှစ်က စတင်ခဲ့တဲ့ လွှတ်တော်သက်တမ်းမှာ အများဆုံးဖြစ်ပါတယ်။

အရပ်ဖက်အဖွဲ့အစည်းတွေက ကန့်ကွက်နေတဲ့ အဲဒီငြိမ်းစုစီဥပဒေကြမ်းဟာ နိုင်ငံသားတွေ မူလအခွင့်အရေးကို ဆုံးရှုံးစေတယ်ဆိုပြီး ဝေဖန်မှုတွေရှိသလို အင်န်အယ်လ်ဒီ ကိုယ်စားလှယ်အချို့ကလည်း အမျိုးသားလွှတ်တော်မှာ ကန့်ကွက်ခဲ့ပါတယ်။

ဥပဒေကြမ်းမှာပါတဲ့ နိုင်ငံတော်လုံခြုံရေး၊ တရားဥပဒေစိုးမိုးရေး၊ ရပ်ရွာအေးချမ်းသာယာရေးနဲ့ ပြည်သူတို့ရဲ့ ကိုယ်ကျင့်တရားတို့ကို ပျက်ပြားစေရန် စတဲ့စကားလုံးတွေဟာ ကျယ်ပြန့်လွန်းတယ်ဆိုပြီး ကိုယ်စားလှယ်အများစုက ကန့်ကွက်ကြပါတယ်။

ဒါ့အပြင် ဥပဒေကြမ်းမှာ ဆန္ဒပြပွဲတစ်ခုလုပ်မယ်ဆိုရင် ငွေကြေးကုန်ကျခံမယ်ပုဂ္ဂိုလ်၊ အဖွဲ့အစည်းနဲ့ ခန့်မှန်းကုန် ကျစရိတ်ကို တင်ပြရမယ်ဆိုတာကိုလည်း ကန့်ကွက်ကြပါတယ်။

RFA Burmese
https://www.rfa.org/burmese