အရက်ချက်စက်ရုံတွေကို ကြပ်မတ်ပေးဖို့ တောင်းဆိုတဲ့ လက်မှတ်တွေ ကောက်ယူ

ရေဆိုးတွေ စွန်ထုတ်နေတဲ့ ပိုက်လိုင်းတစ်ခုကို တွေ့ရစဉ်။ Photo: RFA

ရန်ကုန်တိုင်းဒေသကြီး ရွှေပြည်သာမြို့နယ်မှာရှိတဲ့ အရက်ချက်စက်ရုံတွေကနေ ရေဆိုးတွေ စွန့်ထုတ်နေတာကို ကြပ်မတ်ပေးဖို့ မြို့နယ်အတွင်း နေထိုင်တဲ့လူငယ်တွေက သဘောထား လက်မှတ်တွေ လိုက်လံကောက်ယူနေပါတယ်။

ရေဆိုးတွေစွန့်ပစ်တဲ့ အရက်ချက်စက်ရုံတွေကို အရေးယူကြပ်မတ်ပေးဖို့ လက်မှတ်တွေ ကောက်ယူနေတာဖြစ်တယ်လို့ လက်မှတ်ကောက်ယူရာမှာ ပါဝင်တဲ့ ကိုမြတ်မင်းသူက ပြောပါတယ်။

"အရက်ချက်စက်ရုံကနေပြီးပေါ့ ရေဆိုးတွေပေါ့ သန့်စင်ခြင်းမပြုဘဲနဲ့ မြစ်ချောင်းတွေထဲကို စွန့်ပစ်တဲ့အတွက် ကန့်ကွက်တဲ့အနေနဲ့ ပြည်သူလူထုကနေပြီးတော့ လက်မှတ်ရေးထိုးတဲ့ ကမ်ပိန်းတွေလုပ်တာပေါ့။ စက်ရုံတည်တာတွေတော့ ကြာပြီ။ အရင်တုန်းကတော့ ဒါ တိုင်းဒေသကြီးအစိုးရကနေပြီးတော့ စက်ရုံတွေရပ်ဆိုင်းခိုင်းထားတယ်ပေါ့။ အခုချိန်ခါမှာ ခိုးပြီးလည်ပတ်နေတာပေါ့။ အဲ့ဒီအတွက် ကျနော်တို့ကနေပြီးတော့ တိုင်းဒေသကြီးအစိုးရအဖွဲ့ကို အရေးယူပေးဖို့အတွက်ပေါ့နော်။ နောက်ပြီးတော့ ရေဆိုးစွန့်ပစ်မှုတွေအတွက်ပေါ့နော် တားဆိးပေးဖို့ ကျနော်တို့က လက်မှတ်ရေးထိုးပြီးတောင်းဆိုတာပေါ့နော်"

ရွှေပြည်သာမြို့နယ်မှာ အရက်ချက်စက်ရုံ ၃ ရုံရှိပြီး အဲဒီစက်ရုံတွေကနေ စွန့်ပစ်လိုက်တဲ့ ရေဆိုးတွေဟာ ချောင်းတွေကနေတဆင့် ရပ်ကွက်တွေထဲကို စီးဝင်နေသလို အနံ့ဆိုးတွေ ခံစားနေရတာတွေ ၁၀ နှစ်လောက်ရှိနေပြီလို့ ပြောပါတယ်။

အဲဒါကြောင့် စက်ရုံတွေအနားမှာရှိတဲ့ ၁ ရပ်ကွက်၊ ၁၀ ရပ်ကွက်၊ ၆ ရပ်ကွက်နဲ့ ပတ္တမြားဈေးစတဲ့ နေရာတွေမှာ နေထိုင်သူတွေရဲ့လက်မှတ်တွေကို မနေ့ကစပြီး လူငယ်တွေက ကောက်ယူ နေတာဖြစ်ပါတယ်။

အရက်ချက်စက်ရုံတွေကို ကန့်ကွက်တဲ့အကြောင်း လက်မှတ်ပေါင်း ၅၀၀ လောက် ရရှိအောင် ကောက်ယူသွားမှာဖြစ်ပြီး ရရှိထားတဲ့လက်မှတ်တွေကို တိုင်းဒေသကြီးအစိုးရထံ တင်ပြသွားမှာဖြစ်ပါတယ်။

တနိုင်ငံလုံးမှာ အရက်ချက်စက်ရုံ ၇၃ ရုံရှိပြီး စက်ရုံအများစုကတော့ ရေဆိုးတွေကို စနစ်တကျစွန့်ပစ်တာမရှိသလို စွန့်ပစ်တာတွေလည်း နည်းလမ်းမမှန်ဘူးလို့ ရန်ကုန်တိုင်းဒေသကြီး လွှတ်တော်ကိုယ်စားလှယ် ဦးကျော်ကျော်ထွန်းက ပြီးခဲ့တဲ့နှစ် မတ်လက ပြောခဲ့ပါတယ်။

ရေဆိုးထွက်တဲ့ စက်ရုံတွေကို စနစ်တကျ ရေဆိုးစွန့်ပစ်ဖို့ ကြပ်မတ်ပေးရေးအဆိုကို ၂၀၁၆ ခုနှစ် နိုဝင်ဘာလက ရန်ကုန်တိုင်းဒေသကြီးလွှတ်တော်မှာ အတည်ပြုထားပါတယ်။

RFA Burmese
http://www.rfa.org/burmese