မြစ်ဆုံကြောင့်နေရာပြောင်းရွှေ့နေရသူတွေ မူလရွာတွေမှာ ပြန်လည်နေထိုင်နိုင်ရေး ဆွေးနွေး

မြစ်ကြီးနားမြို့နယ် အောင်မြင်သာစံပြကျေးရွာ ကက်သလစ်အသင်းတော် ဘုရားရှိခိုးကျောင်းမှာ ၂၀၁၈ ဇန်နဝါရီ ၂၉ က ပြုလုပ်တဲ့ မြစ်ဆုံဒေသခံတွေရဲ့ တွေ့ဆုံပွဲကိုတွေ့ရစဉ်/ Photo - ဒေါ်လုရာ

ဧရာဝတီမြစ်ဆုံစီမံကိန်းကြောင့် မူလ ရပ်ရွာတွေကနေ ရွှေ့ပြောင်း နေထိုင်နေကြရတဲ့ ရွာသားတွေက စီမံကိန်းကြောင့် ဒေသခံပြည်သူတွေ လူမှုစီးပွား ဒုက္ခရောက်နေကြရတဲ့အခြေအနေတွေကို အောင်မြင်သာရွာ ကက်သလစ် ဘုရားရှိခိုးကျောင်းမှာ ဒီကနေ့ ဆွေးနွေးခဲ့ကြပါတယ်။

မူလရွာတွေမှာ ပြန်လည်နေထိုင်နိုင်ရေးနဲ့ ရေကာတာစီမံကိန်းကို ဆက်လက်အကောင်အထည် မဖော်ဖို့ အဓိကထား ဆွေးနွေးခဲ့တယ်လို့ စီမံကိန်းကြောင့် တန်ဖရဲ ရွာကနေ အောင်မြင်သာရွာမှာ ရွှေ့ပြောင်းနေရတဲ့ ဒေါ်လုရာ က ပြောပါတယ်။

မြစ်ဆုံစီမံကိန်းကြောင့် တန်ဖရဲ၊ မြစ်ဆုံ၊ လဖျဲ့ကထောင်၊ အောင်ဂျာယန်၊ ဒေါင်ပန် စတဲ့ ရွာတွေကနေ မလိယန်နဲ့ အောင်မြင်သာရွာတွေမှာ ရွှေ့ပြောင်းနေထိုင်နေကြတာ တချို့က ၆ နှစ်နဲ့ တချို့က ၇ နှစ်ရှိပြီဖြစ်ပါတယ်။

မူလရွာတွေမှာနေစဉ်က  တောင်ယာစိုက်ခင်းလုပ်တာ၊ တနိုင်တပိုင် ရွှေကျင်တာ၊ ငါးဖမ်းတာ စတာတွေကို လုပ်ကိုင်လို့ရပေမယ့် အခုနေထိုင်ရတဲ့ ရွှေ့ပြောင်းရွာတွေမှာတော့ လုပ်ကိုင်စားသောက်ဖို့ အခက်အခဲတွေနဲ့ ရင်ဆိုင်နေကြရတာလို့ ဆိုပါတယ်။

အဲဒီမြစ်ဆုံစီမံကိန်းကြောင့်ပြောင်းရွှေ့နေရတဲ့ ရွာသားတွေဟာ မြစ်ဆုံရေကာတာ အကောင်အထည် မဖော်ဖို့နဲ့ မူလရွာတွေမှာ ပြန်လည်နေထိုင်ကြရဖို့ မကြာခဏ ဆန္ဒပြနေကြတာဖြစ်ပြီး၊ ဒီကနေ့တွေဆုံပွဲကို ဒေသခံရွာသား အယောက် ၂၀၀ လောက်တက်ရောက်ခဲ့ကြပါတယ်။

RFA Burmese
https://www.rfa.org/burmese