ရက်ပေါင်း ၅၀ ကြာ ဘင်္ဂလာဆိပ်ကမ်းတွင် ပိတ်မိနေသော မြန်မာနိုင်ငံသား ၄၄ ဦးထဲမှ ၁၂ ဦး အိမ်ပြန်

နိရဉ္စရာ၊ အောက်တိုဘာ ၁၆

သြဂုတ်လ ၂၅ ရက်နေ့ကတည်းက ရခိုင်ဘက်တွင် ဖြစ်ပွားနေခဲ့သည့် မတည်ငြိမ်မှုကြောင့် ဘင်္ဂလာဒေ့ရ်ှနိုင်ငံ တက်ကနက်ဆိပ်ကမ်းတွင် ကုန်တင်ဘုတ် ၁၃ စီးဖြင့် ရက်ပေါင်း ၅၀ ကြာ ပိတ်မိနေသာ မြန်မာနိုင်ငံသား ၄၄ ဦးထဲမှ ၁၂ ဦးသည် အောက်တိုဘာ ၁၅ရက်နေ့ ယမန်နေ့က မြန်မာနိုင်ငံသို့ ပြန်သွားခဲ့ကြသည်ဟု သတင်း ရရှိသည်။

၎င်းမြန်မာနိုင်ငံသား ၁၂ ဦးသည် ကုန်တင်မော်တော်ဘုတ် ၄ စီးဖြင့် အောက်တိုဘာ ၁၅ ရက်နေ့က ပြန်သွားခဲ့ကြသည်ဟု ဆိပ်ကမ်းလက်ထောက် မန်နေဂျာ အဏ္ဍ၀ါဟူစိန်က ပြောကြောင်း Cox’bazar News တွင် သတင်းဖော်ပြထားသည်။

မြန်မာနှင့် ဘင်္ဂလာဒေ့ရ်ှနယ်စပ်ကုန်သွယ်ကို သြဂုတ် ၂၅ ရက်နေ့ကတည်းက ရပ်နားခဲ့ရပြီးနောက်ပိုင်း လွန်ခဲ့သော စနေနေ့ (အောက်တိုဘာ ၁၄ ရက်) က မောင်တော- တက်ကနက် ကုန်သွယ်မှုကို ပြန်လည် ဖွင့်လှစ်ခဲ့သည်။

ထိုသို့ ဖွင့်လှစ်ပြီးနောက် ဘုတ်ပေါ်တွင် ပါလာသော ကုန်ပစ္စည်းများကို တင်ပို့ပြီးနောက် မော်တော်ဘုတ် ၄ စီးနှင့် အတူ မြန်မာသား ၁၂ ဦးမှာ ပြန်သွားခဲ့ကြသည်ဟု ဆိုသည်။

ဘင်္ဂလာဒေ့ရ်ှနိုင်ငံတွင် ဆန်ဈေးအထူးမြင့်တက်နေရာ ဆန်များကို ပို့ဆောင်ရန် လာရောက်စဉ် ရခိုင်တွင် ပေါ်ပေါက်ခဲ့သည့် အကြမ်းဖက် ဖြစ်စဉ်များကြောင့် နယ်စပ်ကုန်သွယ်ရေးကို ရပ်နားခဲ့ရရာမှ မြန်မာနိုင်ငံသားများမှာ အိမ်မပြန်နိုင်ဘဲ ဖြစ်ခဲ့ကြရသည်ဟု သိရသည်။

မောင်တော-တက်ကနက် နယ်စပ်ကုန်သွယ်ရေးကို ရပ်နားခဲ့ရသော်လည်း စစ်တွေနှင့် တက်ကနက် နယ်စပ်ကုန်သွယ်ရေးမှာ ရပ်နားခဲ့ခြင်းမရှိခဲ့ကြောင်း၊ သို့သော်လည်း အ၀င်အထွက် နည်းပါးသွားသဖြင့် နယ်စပ် စီးပွားရေးကို များစွာ ထိခိုက်ခဲ့သည်ဟု ၎င်းသတင်းတွင် ဖော်ပြသည်။

မောင်တော- တက်ကနက်နယ်စပ်ကုန်သွယ်ရေးကို ၁၉၉၅ ခုနှစ် စက်တင်ဘာ ၅ ရက်နေ့တွင် နှစ်နိုင်ငံ သဘောတူညီချက်ဖြင့် ဖွင့်လှစ်ခဲ့သည်ဟု သိရသည်။

Narinjara
https://www.facebook.com/Narinjara