ဒုက္ခသည်တွေ လက်ခံရာမှာ အကြမ်းဖက်သမားတွေ မပါဝင်အောင် စီစစ်ဖို့ တောင်းဆို

ဘင်္ဂလားဒေ့ရ်ှဘက် ထွက်ပြေးသွားသူတွေကို ပြန်လည်လက်ခံရာမှာ အကြမ်းဖက်သမားတွေ မပါဝင်အောင် စိစစ်လက်ခံပေးဖို့ မော်လမြိုင်မြို့မှာ အမျိုးသားရေးအင်အားစုတွေ အောက်တိုဘာလ ၁၅ ၇က်နေ့က ဆန္ဒပြတောင်းဆိုစဉ်။ Photo: Myint Soe's facebook

ဘင်္ဂလားဒေ့ရ်ှနိုင်ငံဖက် ထွက်ပြေးသွားသူတွေကို ပြန်လည်လက်ခံရာမှာ အကြမ်းဖက်သမားတွေမပါဝင်အောင် စီစစ်လက်ခံပေးဖို့ မွန်ပြည်နယ် မော်လမြိုင်မြို့မှာ အမျိုးသားရေးအင်အားစုတွေက ဒီနေ့ တောင်းဆိုလိုက်ပါတယ်။

ရခိုင်ပြည်နယ်မှာ ဖြစ်ပွားခဲ့တဲ့ အစွန်းရောက် အကြမ်းဖက်မှုတွေကို ကန့်ကွက်ရှုတ်ချပွဲနဲ့ ပြည်ပနိုင်ငံတွေက ဖိအားပေးစွက်ဖက်မှုတွေကို ရှုတ်ချကြောင်း ဟောပြောပွဲမှာ တောင်းဆိုတာဖြစ်တယ်လို့ မွန်ပြည်နယ် အမျိုးသားရေးအင်အားစု ဥက္ကဌ ဦးသန်းဇော်က ပြောပါတယ်။

ဒီနေ့ပွဲကို အမျိုးသားရေးအင်အားစု က ဦးဆောင်ပြုလုပ်တာဖြစ်ပြီး မွန်ပြည်နယ်အတွင်း ၁၀မြို့နယ်က အမျိုးသားရေးတက်ကြွလှုပ်ရှားသူ ၃ ထောင်နီးပါး တက်ရောက်ခဲ့ပါတယ်။

ပြည်ပနိုင်ငံတွေက ဖိအားပေးမှုမှန်သမျှကို ရှုတ်ချကြောင်း၊ ရခိုင်ဒေသမှာ တပ်မတော်သားတွေ၊ ရဲတွေ၊ ဒေသခံ တိုင်းရင်းသားတွေနဲ့ ဟိန္ဒူတွေကို အကြမ်းဖက်သတ်ဖြတ်ခဲ့သူတွေကို ကန့်ကွက်ရှုတ်ချကြောင်း၊ ရခိုင်ဒေသ အကြမ်းဖက်မှု ပြဿနာတွေဟာ မိမိတို့နိုင်ငံရဲ့ အချုပ်အခြာအာဏာကိုထိပါးနေတဲ့အပြင် နယ်မြေကို လက်လွှတ်ရမယ့် အခြေအနေဖြစ်တာကြောင့် မဆုံးရှုံးရအောင် အစိုးရနဲ့ တပ်မတော်ကတာဝန်ယူကာကွယ်ပေးဖို့ စတာတွေကိုလည်း တောင်းဆိုခဲ့ကြပါတယ်။

အလားတူ အကြမ်းဖက်ရှုတ်ချပွဲတွေကို ကရင်၊ ရှမ်း ၊ တနင်္သာရီ၊ ရန်ကုန် စတဲ့ ပြည်နယ်နဲ့တိုင်းဒေသကြီးတွေမှာ လည်း ပြုလုပ်ခဲ့ကြပါတယ်။

RFA Burmese
http://www.rfa.org/burmese