တောင်ကြီးမြို့တွင် မီးပုံးပျံပြုလုပ်ရာမှ မီးလောင်မှုဖြစ်ပွား

တောင်ကြီးမြို့တွင် မီးပုံးပျံပြုလုပ်ရာမှ မီးလောင်မှုဖြစ်ပွား

တောင်ကြီးမြို့ တန်ဆောင်တိုင်ပွဲတော် ပါဝင်ဆင်နွှဲဖို့ ကြိုတင်ပြင်ဆင်နေတဲ့ မီးပုံးပျံတစ်လုံးဟာ စက်တင်ဘာ(၂)ရက် မွန်းလွဲ(၁)နာရီက ယမ်းပိုင်းဆိုင်ရာပြင်ဆင်နေရင်း မီးလောင်မှုဖြစ်ပွားတယ်လို့ သိရပါတယ်။

 အဲဒီမီးပုံးပျံကို ကန်အောက်ရပ်ကွက်၊ နှင်းဆီလမ်းက အိမ်တစ်အိမ်မှာပြုလုပ်တာဖြစ်ပြီး မီးပုံးပျံရဲ့ နာမည်က(တောင်ကြီးမီး)ဆိုတဲ့ မီးပုံးပျံဖြစ်တယ်လို့ သိရပါတယ်။

 မီးလောင်မှုကို သက်ဆိုင်ရာရပ်ကွက်နေပြည်သူတွေ၊ ကြက်ခြေနီတပ်ဖွဲ့ဝင်တွေ၊ မီးသတ်တပ်ဖွဲ့ဝင်တွေ၊ နယ်မြေရဲစခန်းမှတာဝန်ရှိသူတွေက မီးသတ်ယာဉ်(၈)စီး၊ ရေသယ်ယာဉ်(၂)စီးနဲ့ ငြိမ်းသတ်ခဲ့တာဖြစ်တယ်လို့ သိရပါတယ်။မီးလောင်ကျွမ်းမှုကြောင့် ပျက်စီးဆုံးရှုံးမှုတန်ဖိုးကျပ်(၂၈)သိန်းဖိုးခန့်ရှိခဲ့ပြီး အခြားနေအိမ်တွေကို ကူးစက်လောင်ကျွမ်းခဲ့တာမရှိဘူးလို့ တောင်ကြီးမြို့နယ် မီးသတ်ဦးစီးမှူးဦးကျော်ကိုကိုက ပြောပါတယ်။

မီးလောင်မှုနဲ့ပတ်သက်ပြီး မီးပုံးပျံရဲ့မီးဆရာကို တောင်ကြီးမြို့မ၊ အမှတ်(၁)ရဲစခန်းက မီးပေါ့ဆမှုနဲ့ အရေးယူဆောင်ရွက်မှုတွေပြုလုပ်မှာဖြစ်တယ်လို့သိရပါတယ်။ ဒီသတင်းကို တောင်ကြီးဗျူရိုက ဇော်မိုးဦးနှင့်သန်းထိုက်အောင်တို့ ပေးပို့တာဖြစ်ပါတယ်။

Central News Bureau
https://www.facebook.com/skynetcnb/