တိုက်ပွဲ ဖြစ်ရာ ချင်းဒေသမှာ လူ့အခွင့်အရေး ချိုးဖောက်မှုတွေ ရှိနေ

တပ်မတော်နဲ့ AA ရက္ခိုင် လက်နက်ကိုင် အဖွဲ့ တိုက်ပွဲ ဖြစ်ရာ ပလက်ဝ ဒေသ

အစိုးရ တပ်မတော်နဲ့ ရက္ခိုင် တပ်မတော် AA တို့ကြား တိုက်ပွဲတွေ ဖြစ်နေတဲ့ ချင်းပြည်နယ် ပလက်ဝ ဒေသမှာ စစ်ဘေးသင့်နေပြီး လူ့အခွင့်အရေး ချိုးဖောက်မှုတွေ ခံနေရတယ်လို့ အဲဒီ ဒေသကို ရောက်ခဲ့တဲ့ ချင်းလူငယ်တွေက ပြောပါတယ်။

တိုက်ပွဲ ဖြစ်နေတဲ့ ပလက်ဝ ဒေသက ရွာတော်တော် များများမှာ စစ်ပွဲကြောင့် စာသင်ကျောင်းတွေ မဖွင့်နိုင်ဘဲ ရှိခဲ့ပါတယ်။

နှစ်ဖက် စစ်မက်ဖြစ်တဲ့ နေရာမှာ လမ်းပြအဖြစ် ဒေသခံ နှစ်ယောက် အတင်း ခေါ်သွားခံရပြီး လမ်းမှာ ဆုံးပါးသွားခဲ့တယ်လို့ သတင်း ရရှိပါတယ်။

အခုလို လူ့အခွင့်အရေး ချိုးဖောက်မှုတွေကြောင့် ဒေသခံတွေဟာ တောင်ယာ မလုပ်စားနိုင်ဘဲ နေရပ်ကို စွန့်ခွာ ထွက်ပြေး တိမ်းရှောင်နေရတယ်လို့ ချင်းလူငယ်တွေက ဆိုပါတယ်။

တိုက်ပွဲ ဖြစ်တဲ့ နေရာမှာ ရွာသားတွေကို ကူလီ ထမ်းခိုင်းတာ အဓမ္မ စေခိုင်းတာတွေ ရှိခဲ့ပြီး AA ၀င်တဲ့ ချင်းရွာမှာ ရွာလူကြီးကို ခေါ်သွားကာ ရိုက်နှက် နှိပ်စက် ခဲ့တယ်လို့ သူက ပြန်ပြောပြပါတယ်။

သူတို့အနေနဲ့ ဒီမြင်တွေ့ သိရှိခဲ့ရသမျှကို အိုင်အန် ဂျီအို ၊ အန်ဂျီအိုနဲ့ အစိုးရ အဖွဲ့တွေကို တင်ပြကာ ဒေသခံတွေကို အကူညီ ပေးဖို့ ပန်ကြားသွားမယ်လို့ သူက ဆိုပါတယ်။

BBC Burmese
http://www.bbc.com/burmese