ထိုင်းနိုင်ငံမှ လူသတ်တရားခံပြေးနှင့် ဆက်စပ်၍ သံသယရှိသူ နှစ်ဦးအား စစ်ဆေးနိုင်ရန်အတွက် တာချီလိတ် ရဲတပ်ဖွဲ့က ထိုင်းနိုင်ငံသို့ လွှဲပြောင်း

ထိုင်းနိုင်ငံ ခွမ်ကန်မြို့တွင် မေလ (၂၃)ရက်နေ့က ဖြစ်ပွားခဲ့သော လူသတ်မှုနှင့်ပတ်သက်၍ မြန်မာ - ထိုင်း နယ်စပ် တာချီလိတ်မြို့တွင် အလုပ် လုပ်ကိုင်နေသော သံသယရှိသူ ထိုင်းနိုင်ငံသားနှစ်ဦးကို စစ်ဆေးရန် အတွက် တာချီလိတ်ခရိုင်ရဲတပ်ဖွဲ့မှ ထိုင်းနိုင်ငံမှ တာဝန်ရှိသူများထံ ဇွန်လ (၁)ရက်နေ့က လွှဲပြောင်းပေးလိုက်ကြောင်း သိရသည်။

အဆိုပါ လူသတ်မှုမှ တရားခံလေးဦးအနက် အမျိုးသားတစ်ဦးနှင့် အမျိုးသမီးတစ်ဦးအား ဖမ်းမိထားပြီး ကျန်အမျိုးသမီးနှစ်ဦးမှာ တာချီလိတ်မြို့သို့ တိမ်းရှောင်သွားခြင်းဖြစ်ကြောင်း ထိုင်းသတင်းများတွင် ဖော်ပြထားပြီး ယင်းတရားခံနှစ်ဦးအား တာချီလိတ်မြို့သို့ အကြိုအပို့လုပ်သူနှင့် လက်ခံထားသူတို့ကို သံသယရှိသူ အဖြစ် စစ်ဆေးရန် တာချီလိတ်ခရိုင်ရဲတပ်ဖွဲ့မှ ထိုင်းနိုင်ငံမှ တာဝန်ရှိသူများထံ ဇွန်လ (၁)ရက်နေ့တွင် တာချီလိတ်ခရိုင်ရဲတပ်ဖွဲ့မှူး ဒုတိယရဲမှူးကြီးထိန်ဝင်း၊ တာချီလိတ်ခရိုင် လ၀က ဦးစီးမှူး ဒုတိယညွှန်ကြားရေးမှူး ဦးကျော်မော်ထွန်း၊ တာချီလိတ်မြို့ရဲစခန်းမှ စခန်းမှူး ဒုရဲမှူးထိန်လင်းနှင့် တာဝန်ရှိသူများက ထိုင်းဘက်သို့ လွှဲပြောင်းပေးလိုက်ခြင်းဖြစ်ကြောင်း သိရသည်။

“ဒီလူသတ်မှုထဲက တရားခံတွေကို မြန်မာနိုင်ငံကို ထိုင်းနိုင်ငံသားတွေကပဲ ခေါ်ဆောင်လာပြီးတော့ လက်ရှိ လူသတ်တရားခံကို ဖွက်ထားတဲ့ လူတွေအကုန်လုံးကလည်း ထိုင်းနိုင်ငံသားတွေလို့ပဲ ယူဆပါတယ်”ဟု တာချီလိတ်ခရိုင်ရဲတပ်ဖွဲ့မှူး ဒုတိယရဲမှူးကြီးထိန်ဝင်းက တာချီလိတ်သတင်းအေဂျင်စီသို့ ပြောသည်။
လူသတ်တရားခံနှစ်ဦးကို ထိုင်းနိုင်ငံသားတစ်ဦးက မေလ (၂၅)ရက်နေ့ ည (၈)နာရီကျော်ဝန်းကျင်တွင် ချစ်ကြည်ရေးတံတား အမှတ်(၁)မှဖြတ်၍ ခေါ်ဆောင်လာပြီး ကာရာအိုကေတစ်ခုတွင် မန်နေဂျာ လုပ်ကိုင်နေသော ထိုင်းနိုင်ငံသားတစ်ဦးက လက်ခံထားခဲ့ခြင်းဖြစ်ကြောင်း သိရပြီး ယင်းနောက် ညပျော်ပါးရန် အတွက် ထိုင်းနိုင်ငံသားတစ်ဦးက လာခေါ်သွားခြင်းဖြစ်ကြောင်း တာချီလိတ်ခရိုင်ရဲတပ်ဖွဲ့မှ သိရသည်။

“ထိုင်းတာဝန်ရှိသူတွေက သံသယရှိသူကို စစ်ဆေးပေါ်ပေါက်ရရှိပါက အဲဒီစစ်ဆေးချက်ကိုယူပြီး အမှုမှန် ပေါ်ပေါက်ရန် နှစ်နိုင်ငံချစ်ကြည်ရေးအတွက် ပူးပေါင်းဆောင်ရွက်သွားမှာပါ”ဟု ခရိုင်ရဲတပ်ဖွဲ့မှူး ဒုတိယရဲမှူးကြီးထိန်ဝင်းက ပြောသည်။

ထိုင်းနိုင်ငံ ခွမ်ကန်မြို့ရှိ ကာရာအိုကေဆိုင်တွင် အလုပ် လုပ်နေသည့် အသက် (၂၂)နှစ်အရွယ် အမျိုးသမီးတစ်ဦးအား ခန္ဓာကိုယ် နှစ်ပိုင်းပိုင်းကာ လက်များကို ဖြတ်ပြီး သတ်ခဲ့သည့် လူသတ်တရားခံ လေးဦးမှ အမျိုးသမီးနှစ်ဦးသည် တာချီလိတ်မြို့သို့ ထွက်ပြေးတိမ်းရှောင်လာကြောင်း နှင့် မြန်မာ - ထိုင်းနယ်ခြားကော်မတီ(မြန်မာဘက်)သို့ ၂၀၁၇ ခုနှစ် မေလ(၂၉)ရက်နေ့ ညနေပိုင်းက ထိုင်းနိုင်ငံမှ အချက်အလက်များ ပေးပို့ကာ အကူအညီတောင်းခံလာခြင်း ဖြစ်ကြောင်း သိရသည်။

ယင်းသို့ အကူအညီတောင်းခံလာမှုနှင့် ပတ်သက်၍ မြန်မာဘက် တာချီလိတ်ခရိုင်/မြို့နယ်ရဲတပ်ဖွဲ့က စုံစမ်းဖော်ထုတ်နေလျက်ရှိကြောင်း သိရသည်။

သတင်း/ဓာတ်ပုံ - ဇောင်းညီ
Tachileik News Agency
http://www.tachileik.net