တာချီလိတ်မြို့ မိုင်းကိုးကျေးရွာတွင် ရေထဲ ခရုဆင်းကောက်ရာမှ သားအဖ နှစ်ဦး ရေနစ်၍ သေဆုံး

ရှမ်းပြည်နယ်(အရှေ့ပိုင်း) တာချီလိတ်မြို့နယ်၊ မိုင်းကိုးကျေးရွာ အုပ်စုရှိ ၀မ်ကောင်း (၂)ကျေးရွာတွင် သားအဖ နှစ်ဦး ရေထဲဆင်းကာ ခရုကောက်ရာမှ သားအဖ နှစ်ဦးစလုံး ရေနစ်သေဆုံးမှု မတ်လ(၁၄)ရက်နေ့ နံနက်ပိုင်းက ဖြစ်ပွားကြောင်း သိရသည်။

အဆိုပါ အခင်းဖြစ်ပွားရာ နေရာသို့ သက်ဆိုင်ရာ ရဲတပ်ဖွဲ့နှင့် အတူ တာဝန်ရှိသူများ အပါအ၀င် တာချီလိတ်နာရေးကူညီမှုအသင်းတို့ ရောက်ရှိသွားပြီး ရေနစ်သေဆုံးသွားသည့် အလောင်းများအား ရှာဖွေရာတွင် အသက်(၄၃)နှစ်ရှိ ဦးယာလောက်၏ အလောင်းအား ကနဦး ဆယ်ယူရရှိပြီး သေဆုံးသူ ဦးယာလောက်၏ သားဖြစ်သူ အသက်(၆)နှစ်သားအရွယ်၏ အလောင်းအား ဆက်လက်ရှာဖွေရာ နေ့လယ်(၁)နာရီခွဲဝန်းကျင်တွင် ရှာဖွေတွေ့ရှိကြောင်း တာချီလိတ်နာရေးကူညီမှုအသင်းမှ သိရသည်။

"သားအဖ နှစ်ယောက်လုံးက ရေထဲမှာ ခရုဆင်းကောက်ရင်းနဲ့ ရေနစ်သေဆုံးသွားတာပါ၊ ဖခင်ဖြစ်သူရဲ့ အလောင်းကို ပထမဆုံး ရှာတွေ့တယ်။ ကလေးရဲ့ အလောင်းကိုတော့ နေ့လယ်(၁)နာရီခွဲဝန်းကျင်လောက်မှ ရှာဖွေတွေ့ရှိရတာပါ။ ကလေးရဲ့ အလောင်းကိုတော့ ခက်ရာခဲဆစ် ရှာဖွေခဲ့ရပါတယ်"ဟု တာချီလိတ်နာရေး ကူညီမှုအသင်း ဥက္ကဌ ဦးလှမိုးက ပြောသည်။

ရေထဲမှ ဆယ်ယူရရှိသည့် ရုပ်အလောင်းများအား တာချီလိတ်နာရေး ကူညီမှုအသင်းမှ တာချီလိတ်ခရိုင်ပြည်သူ့ ဆေးရုံကြီးသို့ ပို့ဆောင်ပေးထားကြောင်းနှင့် သက်ဆိုင်ရာရဲတပ်ဖွဲ့မှ စစ်ဆေးမှုများ ဆောင်ရွက်နေလျှက်ရှိကြောင်း သိရှိရသည်။

ဓာတ်ပုံ - တာချီလိတ်နာရေးကူညီမှုအသင်း
Tachileik News Agency
http://www.tachileik.net