TNP ပါတီက ပါတီတွေပေါင်းထုတ် တဲ့ကြေညာချက်မှာ မပါလို့ ထုတ်ပြန်

တအာင်းပလောင် အမျိုးသားပါတီမှ ထုတ်ပြန်ထားတဲ့ကြေညာချက်ကို တွေ့ရစဉ်

ကြံ့ခိုင်ဖွံ့ဖြိုးရေးပါတီ အပါအ၀င် ပါတီ ၁၅ ခုက ပူးတွဲထုတ်ပြန်တဲ့ ကြေညာချက်မှာ တအာင်းပလောင် အမျိုးသားပါတီအမည်ကို ထည့်သွင်းထားတာကို ကန့်ကွက်ကြောင်းနဲ့ ပယ်ဖျက်ပေးဖို့ တောင်းဆိုလိုက်ပါတယ်။

တအာင်းပလောင် အမျိုးသားပါတီ အထွေထွေအတွင်းရေးမှုး မိုင်းဝင်းထူးက ထုတ်ပြန်ချက်မှာ လက်မှတ်ထိုးခဲ့တယ်ဆိုတဲ့ ဗဟိုအလုပ်အမူဆောင် ဦးထွန်းကြိုင်ဆိုတာ ပါတီမှာမရှိသလို အဲဒီကြေငြာချက်ကို လက်မခံနိုင်တဲ့အတွက် ဒီနေ့ ရက်စွဲနဲ့ ကြေငြာချက်ထုတ်ရတာလို့ ပြောပါတယ်။

" ဒီဟာက ကျနော်တို့ပါတီက သဘောထားမဟုတ်ပါဘူး၊ အဲဒါကို လက်မခံပါဘူး။ ပါတီထဲမှာလည်း ဗဟိုအလုပ်အမူဆောင် ဦးထွန်းကြိုင်ဆိုတာ မရှိပါဘူး။ ကျနော်တို့က ဘယ်ပါတီနဲ့မဆို အလုပ်ပူးပေါင်း လုပ်ဆောင်ဖို့ဆန္ဒရှိတယ်။ ဟိုပါတီနဲ့ ဒီပါတီနဲ့ ရှမ်းပါတီနဲ့ ကယားပါတီနဲ့ဖြစ်ဖြစ်ပေါ့နော် လက်တွဲ ပြီးလုပ်မယ်၊ ကျနော်တို့မှာ ရန်သူမရှိဘူးပေါ့နော် အဲလိုပုံစံမျိုး၊ ဘယ်သူပဲဖြစ်ဖြစ် ပါတီရဲ့မူနဲ့ ကိုက်မယ်ဆိုရင်လုပ်မယ် ဒါပေမယ့် သူတို့အခုလုပ်တဲ့ပုံစံမျိုးက ကျနော်တို့ကို တကယ့် ဥပက္ခာပြုတဲ့ ပုံစံမျိုး၊ ပါတီအချင်းချင်းအပေါ်မှာ စော်ကားတဲ့ပုံစံမျိုး ဖြစ်သွားတာပေါ့၊အဲဒါကြောင့် ကျနော်တို့ ဒါကိုလုံးဝမဖြစ်သင့်ဘူး ဒါကိုကန့်ကွက်ရမယ်ဆိုပြီး လုပ်တာပါ "

ပြီးခဲ့တဲ့ ဇန်န၀ါရီလ ၂၃ ရက်နေ့က ကြံ့ခိုင်ဖွံ့ဖြိုးရေးပါတီက ဦးဆောင်ပြုလုပ်တဲ့ နိုင်ငံတော်လုံခြုံရေးနှင့် တရားဥပဒေ စိုးမိုးရေး ဆိုင်ရာဆွေးနွေးပွဲ ကို သူတို့ပါတီက မြို့နယ်ကိုယ်စားလှယ်တစ်ဦး တက်ရောက်ခဲ့ပေမယ့် ထုတ်ပြန်ချက်ကို လက်ခံကြောင်း သဘောတူ လက်မှတ်ထိုးတာမရှိခဲ့ဘူးလို့ အထွေထွေအတွင်းရေးမှူး မိုင်းဝင်းထူးကပြောပါတယ်။

နိုင်ငံမှာ လက်ရှိရင်ဆိုင်နေရတဲ့ လုံခြုံရေးဆိုင်ရာခြိမ်းခြောက်မူတွေနဲ့ တရားဥပဒေစိုးမိုးရေးတို့အတွက် အမျိုးသားကာကွယ်ရေးနဲ့ လုံခြုံရေးကောင်စီက ကိုင်တွယ်ဖြေရှင်းပေးဖို့ နဲ့ နိုင်ငံသားမဟုတ်တဲ့သူ အမြောက်အများကို ပြန်လည် လက်ခံမယ့်သတင်းတွေ ထွက်ပေါ်နေတဲ့အတွက် အစိုးရက တိကျတဲ့ သတင်းထုတ်ပြန်ပေးဖို့ဆိုတဲ့ အချက် ၆ ချက်ပါဝင်တဲ့ ကြေငြာချက်ကို ပါတီ ၁၅ ခုက မနေ့က ရက်စွဲနဲ့ ထုတ်ပြန်ခဲ့ပါတယ်။

နိုင်ငံတော် လုံခြုံရေးနဲ့ ဆိုင်တဲ့ ကိစ္စတွေနဲ့ ပက်သတ်ပြီး ဖွဲ့စည်းပုံအခြေခံဥပဒေမှာ ပေးထားချက် နဲ့အညီ အမျိုးသားကာကွယ်ရေးနဲ့ လုံခြုံရေးကောင်စီမှာသာ ဆွေးနွေးဆုံးဖြတ်သင့်ပြီး တစ်ဦး တစ်ယောက်၊ ဌာန တစ်ခုထဲရဲ့ သဘောထားနဲ့ မလုပ်သင့်ဘူးလို့ ယူဆကြောင်း ကြံ့ခိုင်ရေးပါတီ သတင်းထုတ်ပြန်ရေးအဖွဲ့က ဒေါက်တာ ၀င်းအောင်ကျော်က ပြောပါတယ်။

ဒါ့အပြင် ရခိုင်ပြည်နယ်ဆိုင်ရာ အကြံပေးကော်မရှင် ဖွဲ့စည်းရာမှာ အမျိုးသားကာကွယ်ရေးနဲ့ လုံခြုံရေးကောင်စီကို တိုင်ပင်ညှိနှိုင်းမူမရှိခဲ့သလို ပြည်ထောင်စုဝန်ကြီး အဆင့် သတ်မှတ်ထားတဲ့ အမျိုးသားလုံခြုံရေးဆိုင်ရာ အကြံပေးပုဂ္ဂိုလ်ကို ပြည်ထောင်စုအစိုးရအဖွဲ့ရဲ့ ဆုံးဖြတ်ချက်နဲ့သာ ခန့်အပ်ခဲ့တယ်လို့ ပါတီ ၁၅ ခုရဲ့ ကြေငြာချက်မှာ ပါဝင်ပါတယ်။

နိုင်ငံရေး လေ့လာသူ စာရေးရာ ဦးမောင်မောင်စိုးက နိုင်ငံသားမဟုတ်သူတွေကို ပြန်လည် လက်ခံမယ်ဆိုတဲ့ သတင်းတွေဟာ ကောလဟာလ အဆင့်သာရှိသေးပီး အစိုးရက ထုတ်ပြန်တာကို မတွေ့ရသေးကြောင်းနဲ့ တကယ်ပဲ အဲဒီအစီအစဉ်ရှိမယ်ဆိုရင် နယ်စပ်လုံခြုံရေးနဲ့ ပြည်ထဲရေးဌာနကို အုပ်ချုပ်တဲ့ သူတွေဟာ တပ်မတော်ကာကွယ်ရေးဦးစီးချုပ်ရဲ့ လက်အောက်မှာရှိတဲ့အတွက် သူတို့ အရင်ဆုံးသိမယ်လို့ ယူဆကြောင်းပြောပါတယ်။

RFA Burmese
http://www.rfa.org/burmese