ကျောင်းသား ၉ ဦးအမှုကို တရားရုံးလက်ခံ

(စစ်ပွဲအလိုမရှိကြောင်း ပြဇာတ်ကပြခဲ့တဲ့ ကျောင်းသား ၉ ဦးကို တွေ့ရစဉ်) Photo: Aung Khant Zaw/ Facebook

ဧရာဝတီတိုင်းဒေသကြီး၊ ပုသိမ်မြို့မှာ စစ်ပွဲအလိုမရှိကြောင်း ပြဇာတ်ကပြခဲ့တဲ့ ကျောင်းသား ၉ ဦးရဲ့ အမှုကို အနောက်တောင်တိုင်းစစ်ဌာနချုပ်က အသရေဖျက်မှု ဥပဒေ ပုဒ်မ ၅၀၀ နဲ့ တရားစွဲဆိုရာမှာ အမှုကို ပုသိမ်မြို့နယ်တရားရုံးက မနေ့က လက်ခံလိုက်ပါတယ်။

ပြဇာတ်ကရာမှာ ဦးဆောင်သူ ကိုအောင်ခန့်ဇော်ကို ပုဒ်မ ၅၀၀၊ ကျန်တဲ့ ၈ ဦးကို ပုဒ်မ ၅၀၀/၃၄ နဲ့ တရားစွဲဆိုတာကို လက်ခံလိုက်တာဖြစ်တယ်လို့ ပြဇာတ်ကရာမှာ ပါဝင်ခဲ့တဲ့ ကိုအောင်ခန့်ဇော် က ပြောပါတယ်။

"ပုဒ်မ ၅၀၀ နဲ့ စွဲတာကို လက်ခံပြီးတော့ ကျနော်က ပုဒ်မ ၅၀၀၊ ကျန်တဲ့ ၈ ယောက်က ပုဒ်မ ၅၀၀/၃၄ နဲ့ အမှုကို လက်ခံတယ်၊ ၈ ရက်နေ့မှာ ရုံးထုတ်မယ်ပေါ့၊ အဲဒီနေ့မှ အာမခံတို့ ဘာတို့အကုန်လုံး လုပ်ရမှာပေါ့၊ ၅၀၀/၃၄ ကျတော့ ပါဝင်ပတ်သက်သူပေါ့၊ ကြံရာပါပုံစံမျိုး၊ ပုဒ်မ ၅၀၀ ကျတော့ တိုက်ရိုက်ပတ်သက်သူဆိုတဲ့ပုံစံမျိုးပါ"

အဲဒီအမှုကို လာမယ့် ဖေဖော်ဝါရီလ ၈ ရက်နေ့မှာ စတင်စစ်ဆေးဖို့ ရုံးချိန်း ချိန်းဆိုထားပါတယ်။

ပြီးခဲ့တဲ့ ဇန်န၀ါရီလ ၉ ရက်နေ့က ပုသိမ်ဟိုတယ်မှာ ကျင်းပခဲ့တဲ့ ငြိမ်းချမ်းရေးအလုပ်ရုံဆွေးနွေးပွဲမှာ စစ်ပွဲတွေ အလိုမရှိကြောင်း ပြဇာတ်ကပြဖျော်ဖြေခဲ့ရာမှာ သုံးနှုန်းတဲ့ စကားလုံးအသုံးအနှုန်းတွေဟာ တပ်မတော်ကို ဂုဏ်သိက္ခာညှိုးနွမ်းစေတယ်ဆိုပြီး အသရေဖျက်မှုနဲ့ ဒုတိယဗိုလ်မှူးကြီးတစ်ဦးက တရားလိုလုပ်ပြီး တရားစွဲထားတာ ဖြစ်ပါတယ်။

ဒီပြဇာတ်ရဲ့ရည်ရွယ်ချက်ဟာ ငြိမ်းချမ်းရေးလိုချင်ပြီး စစ်ပွဲတွေအလိုမရှိဘူးဆိုတာကို အဓိကအနေနဲ့ ပြောချင်တာဖြစ်သလို ဘယ်သူ့ကိုမှ ထိခိုက်စေချင်တဲ့စိတ်နဲ့ ရည်ရွယ်ချက်ရှိရှိပြောတာမဟုတ်ဘဲ အနုပညာဖျော်ဖြေမှု တစ်ခုသာဖြစ်တာကြောင့် တရားဥပဒေအတိုင်း ရင်ဆိုင်သွားမှာ ဖြစ်တယ်လို့လည်း ကိုအောင်ခန့်ဇော် က ပြောပါတယ်။

အဲဒီပြဇာတ်မှာ ၁၀ တန်းကျောင်းသား ၄ ဦးနဲ့ တက္ကသိုလ်ကျောင်းသား ၅ ဦးက ပုသိမ်မြို့က စစ်ပွဲထောက်ခံသူတွေကို အင်တာဗျူးမေးတဲ့ပုံစံမျိုးနဲ့ ဟာသနှောပြီး ကပြဖျော်ဖြေခဲ့တာဖြစ်ပြီး သူတို့ ၉ ဦးကို တပ်မတော်က တရားစွဲဆိုလိုက်တာ ဖြစ်ပါတယ်။

RFA Burmese
https://www.facebook.com/rfaburmese/