ဝန်ကြီးချုပ်တွေကို အလုပ်လုပ်ခိုင်းဖို့ ပြော

( နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဇန်နဝါရီလ ၂၅ ရက်နေ့က မကွေးတိုင်း ပခုက္ကူမြို့နယ် စံပြကြီးရွာက ဒေသခံတွေနဲ့ တွေ့ဆုံစဉ် ) Photo: Kaung Htet Kyaw/ RFA

ဝန်ကြီးချုပ်တွေကို အလုပ်တွေခိုင်းဖို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မကွေးတိုင်း ပခုက္ကူမြို့နယ် စံပြကြီးရွာက ဒေသခံတွေနဲ့ တွေ့ဆုံစဉ်မှာ ပြောပါတယ်။

ဒီနေ့ ပခုက္ကူမြို့နယ် စံပြကြီးရွာကို ရောက်ရှိနေစဉ် ခရီးစဉ်မှာ လိုက်ပါလာတဲ့ ပြည်ထောင်စု ဝန်ကြီးတွေနဲ့ တိုင်းဒေသကြီးဝန်ကြီးချုပ်နှစ်ဦးတို့ကို ဒေသခံရွာသူရွာသားတွေနဲ့ မိတ်ဆက်ပေးစဉ်မှာ ဒေါ်အောင်ဆန်းစုကြည်က ပြောခဲ့တာဖြစ်ပါတယ်။

ပြည်သူတွေအနေနဲ့ အစိုးရအပေါ် သည်းခံသင့်တဲ့နေရာမှာသည်းခံပြီး သည်းမခံသင့်တဲ့ နေရာမှာ မခံကြဖို့ ပြောပါတယ်။

ခရီးစဉ်မှာ ကျန်းမာရေးဝန်ကြီး ဒေါက်တာမြင့်ထွေး၊ ပညာရေးဝန်ကြီး ဒေါက်တာမျိုးသိမ်းကြီး၊ စိုက်ပျိုးရေးနဲ့ မွေးမြူရေးဝန်ကြီး ဒေါက်တာအောင်သူ၊ လူမှုဝန်ထမ်း ကယ်ဆယ်ရေးနဲ့ ပြန်လည်နေရာ ချထားရေးဝန်ကြီး ဒေါက်တာဝင်းမြတ်အေး၊ မကွေးတိုင်းဝန်ကြီးချုပ် ဒေါက်တာအောင်မိုးညိုနဲ့ မန္တလေးတိုင်းဝန်ကြီးချုပ် ဒေါက်တာဇော်မြင့်မောင် တို့ လိုက်ပါလာတာဖြစ်ပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ဟာ မနေ့က ပုဂံရှေးဟောင်းယဉ်ကျေးမှု နယ်မြေမှာ ဘူတန်ဘုရင်မိသားစုဝင်တွေနဲ့အတူ စေတီပုထိုးတွေကို လိုက်လံဖူးမြော်ခဲ့ပြီး ငလျင်ဒဏ်သင့်ခဲ့တဲ့ စေတီတွေ ပြုပြင်နေတာကို ကြည့်ရှုခဲ့တာဖြစ်ပါတယ်။

ဒီနေ့ မနက်ပိုင်းမှာ မကွေးတိုင်း ပခုက္ကူမြို့နယ်က စံပြကြီးရွာက မဟာဝိသုဒ္ဓါရာမကျော်ဇောဦး ကျောင်းတိုက်ကို သွားရောက်ပြီး ကျောင်းတိုက်ဆရာတော်ကို ဖူးမြော်ခဲ့ပါတယ်။

အဲဒီနောက် စံပြကြီးကျေးရွာထဲက ကလေးတွေအာဟာရပြည့်ဝရေး ရက်တစ်ထောင်စီမံချက် ဆောင်ရွက်နေတဲ့အခြေအနေကို ဒေသခံရွာသူ ရွာသားတွေနဲ့ တွေ့ဆုံဆွေးနွေးခဲ့တာဖြစ်ပါတယ်။

ဒီနေ့ နေ့လည်မှာ ပုဂံနဲ့ ပခုက္ကူခရီးစဉ်ကို အဆုံးသတ်ပြီး နေပြည်တော်ကို ပြန်လည် ထွက်ခွာ သွားပါတယ်။

RFA Burmese
https://www.facebook.com/rfaburmese