ပုဂံဘုရားတွေပေါ် တက်ရောက်ခွင့် ဒီနှစ်ကုန်မှာ ပိတ်ပင်မည်

(နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဇန်နဝါရီလ ၂၄ ရက်နေ့က ပုဂံဒေသကို သွားရောက်ကြည့်ရှုခဲ့စဉ်) Photo : Kaung Htet Kyaw/RFA

ရိုးရာယဉ်ကျေးမှုအမွေအနှစ်တွေကို ထိန်းသိမ်းရေးအတွက် ပုဂံဒေသက ရှေးဟောင်းစေတီ ပုထိုးတော်တွေပေါ်ကို ခရီးသည်တွေတက်ခွင့်မပြုတော့ပဲ ရှုခင်းကြည့်ဖို့အတွက် စင်မြင့်တွေ စတင်ဆောက်လုပ်နေပြီလို့ မန္တလေးတိုင်းဝန်ကြီးချုပ် ဒေါက်တာ ဇော်မြင့်မောင်က ပြောပါတယ်။

စင်မြင့်တွေအားလုံး ဒီနှစ်ကုန်ပိုင်းမှာ ပြီးသွားပြီဆိုရင် ဘုရားတွေပေါ်ကို တက်ခွင့်လုံးဝပေးတော့မှာ မဟုတ်ဘူးလို့ ဆိုပါတယ်။

ပုဂံဒေသကို ကမ္ဘာ့အမွေအနှစ်စာရင်းသွင်းဖို့အတွက် သတ်မှတ်ဇုန်ချဲ့မယ်ဆိုရင် ပုဂံလူထုရဲ့ လူမှုဘဝတွေ ထိခိုက်နိုင်တာနဲ့ ပတ်သက်ပြီး လူထုကို အာမခံပေးတဲ့အနေနဲ့ ဒီရက်ပိုင်းမှာ ဒေါ်အောင်ဆန်းစုကြည် သွားရောက်ကြည့်ရှုခဲ့တာဖြစ်ပြီး ပုဂံတဝိုက်မှာ ပိုမိုစိုပြေလှပရေးနဲ့
ကမ္ဘာလှည့်ခရီးသည်တွေ ပိုမိုအဆင်ပြေရေးအတွက်လည်း ညွှန်ကြားခဲ့တယ်လို့ သိရပါတယ်။

ပုဂံမှာ အရင်အစိုးရလက်ထက်က ခွင့်ပြုခဲ့တဲ့ ဟိုတယ်တချို့ဟာ စည်းကမ်းချက်တွေကို
ချိုးဖေါက်ဆောက်လုပ်ခဲ့ကြောင်းလည်း ဝန်ကြီးချုပ် ဒေါက်တာဇော်မြင့်မောင်က ပြောပါတယ်။

“ရှေးဟောင်းစေတီတွေနဲ့ ပေ ၁၂ဝ ကွာရင် ဆောက်လို့ရတယ်။ ပြီးတော့ ပေ ၃ဝ
ထက်မြင့်တဲ့ အဆောက်အဦးကို ဆောက်ခွင့်မရှိဘူး။ အကုန်လုံးက ဥပဒေနဲ့ မလုပ်ခဲ့ကြဘူး။ ခွင့်ပြုချက်မှာ ပါဝင်တာတွေကို မသိချင်ယောင်ဆောင်ခဲ့ကြတာတွေ ရှိတယ်ဗျ။ ကျနော့်လက်ထက်ကျမှ ကျနော့်ခေါင်းပေါ် အကုန်ပုံတော့တာပဲ”

အဲဒီလို သတ်မှတ်စည်းကမ်းချိုး ဖေါက်ဆောက်လုပ်ခဲ့တဲ့ ဟိုတယ်တွေကို လက်ငင်းမှာ ပြန်ဖျက်ချလို့ မဖြစ်နိုင်ပေမယ့် တချိန်ချိန်မှာ ဖယ်ရှားမှာဖြစ်တယ်လို့ ဒေါက်တာဇော်မြင့်မောင်က ပြောပါတယ်။

ယဉ်ကျေးမှုအမွေအနှစ်ထိန်းသိမ်းရေးဥပဒေကို ပြန်လည်ပြင်ဆင်ရေးဆွဲနေကြောင်းနဲ့ လူထုကို အဆင့်ဆင့်ချပြ အသိပေးမှာဖြစ်ကြောင်းလည်း သူက ပြောပါတယ်။

RFA Burmese
https://www.facebook.com/rfaburmese/