 |
| ဆီးရီးယားက Raqqa မြို့ကို IS လက်ကပြန်ယူဖို့ ထိုးစစ်ဆင် |
ဂျီဟက် စစ်ပွဲ ဆင်နွှဲနေသူတွေ မြို့တော်အဖြစ် သုံးနေတဲ့ Raqqa မြို့ကို ပြန်လည် သိမ်းယူနိုင်ဖို့ ကာ့ဒ်သူပုန်တွေ ဦးဆောင်တဲ့ တပ်ဖွဲ့တွေကိုသုံးပြီး ထိုးစစ်ဆင်မှုကြီးတွေ အလုံးအရင်းနဲ့ စတင်ဖို့ အမေရိကန်အစိုးရက ကြိုးစားနေချိန်မှာ ဒီသူပုန်အဖွဲ့ နှစ်ခုကြားက တိုက်ပွဲတွေ ပြင်းထန်လာနေတာကြောင့် အခြေအနေကို ပိုပြီးတော့ ရှုပ်ထွေးလာနေပါတယ်။
ဒီအခြေအနေကြောင့် အမေရိကန်နဲ့ တူရကီ အစိုးရကြားမှာ ဆီးရီးယားအရေးနဲ့ ပတ်သက်ပြီး မထင်မှတ်တဲ့ ပဋိပက္ခတွေ ဖြစ်လာမှာကို အနောက်နိုင်ငံတွေက သံတမန်တွေနဲ့ သုံးသပ်သူတွေက စိုးရိမ်နေကြပါတယ်။ Euphrates မြစ်တလျှောက် တိုက်ပွဲတွေ စတင်ခဲ့တဲ့ နိုဝင်ဘာလ ၆ ရက်နေ့ကစလို့ IS စစ်သွေးကြွအဖွဲ့ ထိန်းချုပ်ထားတဲ့ ကျေးရွာ ၄၀ ကျော်ကို ကာ့ဒ်ဦးဆောင်တဲ့ တပ်ဖွဲ့တွေက ပြန်လည် သိမ်းယူခဲ့တာပါ။ Raqqa မြို့တွင်းကို မ၀င်ရောက်ခင် မြို့ရဲ့မြောက်ဘက် ကျေးရွာတွေမှာ ရှိတဲ့ IS အဖွဲ့တွေကို ချေမှုန်းနေတဲ့ ဒီစစ်ပွဲတွေမှာ SDF သူပုန်တွေကို အမေရိကန်က အဓိက ကြောထောက်နောက်ခံ ပေးနေတာပါ။
SDF တပ်ဖွဲ့တွေအနေနဲ့ Raqqa မြို့ကို ပြန်လည် သိမ်းယူနိုင်စွမ်း ရှိပါ့မလားလို့ သုံးသပ်သူတချို့က မေးခွန်းထုတ်နေကြပေမဲ့ အမေရိကန် ပင်တဂွန် စစ်ဌာနချုပ် ပြောခွင့်ရသူတွေကတော့ SDF အဖွဲ့ဟာ IS စစ်သွေးကြွတွေကို ထိထိရောက်ရောက် ချေမှုန်းနေတဲ့အဖွဲ့ ဖြစ်သလို၊ ဒီမြို့ကို ပြန်လည် သ်ိမ်းယူနိုင်စွမ်း ရှိတဲ့အဖွဲ့ဖြစ်တယ်လို့ ပြောဆိုထားပါတယ်။
ဗွီအိုအေ (မြန်မာပိုင်း)
http://burmese.voanews.com
ဆီးရီးယားက Raqqa မြို့ကို IS လက်ကပြန်ယူဖို့ ထိုးစစ်ဆင်
Reviewed by THITHTOOLWIN
on
22:11
Rating:
Reviewed by THITHTOOLWIN
on
22:11
Rating:
