မိတ္ထီလာစီးပွားရေး တက္ကသိုလ် ကျောင်းသူ/သားများ ကျောင်းလမ်းတွင် မကြာခဏ လုယက်ဓားပြတိုက်ခံနေရ

မိတ္ထီလာ စီးပွားရေးတက္ကသိုလ်မှ ကျောင်းသူကျောင်းသားများနှင့် ဆရာများသည် ကျောင်းလမ်းတွင် မကြာခဏ လုယက်ခံရခြင်း၊ ဓားထောက်၍ ဓားပြတိုက်ခံရခြင်း၊ ဆိုင်ကယ်လုယက်မှုများနှင့် မကြာခဏ ကြုံတွေ့နေရ သဖြင့် သက်ဆိုင်ရာတာဝန်ရှိသူများနှင့် အများပြည်သူသိရှိနိုင်ရန် ကာယကံရှင်များက ဇူလိုင် ၁၄ ရက်က မန္တလေးမီဒီယာစင်တာ၌ သတင်းစာရှင်းလင်းပွဲ ကျင်းပခဲ့သည်။

ယင်းနှင့်ပတ်သက်၍ ''ကျွန်တော်က မြန်မာဌာနက ဆရာတယောက်ပါ။ ကျောင်းပတ်ဝန်းကျင်မှာ ကျောင်းသူ ကျောင်းသားတွေ ခဏခဏ လုယက်ခံရတယ်။ ဟန်းဖုန်းတွေ လုယက်ခံရတယ်။ အခုနောက်ပိုင်း ဓားထောက် ပြီး ပစ္စည်းတောင်းတာတွေ မကြာခဏဖြစ်ပွားခဲ့လို့ ကိုယ်တွေ့ခံရတဲ့ ကျောင်းသူကျောင်းသားတွေကို မန္တလေးခေါ်လာပြီး မန္တလေးက သတင်းသမားတွေကနေ အများပြည်သူသိရှိစေဖို့ သတင်းစာရှင်းပွဲ လုပ်ရ တာပါ'' ဟု မြန်မာစာကထိက ဆရာဒေါက်တာမိုးအောင်က ပြောသည်။

ကိုယ်တိုင်ဓားထောက်လုခံရသည့် ကျောင်းသားတဦးက ''ကျွန်တော်တို့ ကျောင်းပတ်ဝန်းကျင်မှာ အလုခံ လိုက်ရတဲ့ဖြစ်စဉ်တွေ အများကြီးပါ။ တချို့ မိန်းကလေးတွေဆို ဖုန်းပိုက်ဆံအိတ်ခဏ ခဏလုခံရတယ်။ ကျောင်းက ဆရာမတဦး သိန်း ၄၀ ကျော် အခိုးခံရတာတွေ ကျောင်းသူကျောင်းသားတွေကို လုယူတာကနေ ဓားပြတိုက်တဲ့အဆင့်ရောက်နေတာ တောင်လုံခြုံရေးမရှိဘူး။ ရဲအင်အားနည်း လို့ပါလို့ပြောတယ်။ ကျွန်တော်ကို ဓားထောက်ပြီးလုတာက သုံးယောက်ပါ။ ပထမဆိုင်ကယ်ပါလုတာ။ သော့လှန်ဖြုတ်တာ။ ကျွန်တော်က အရင်ဖြုတ်ပြီး ရင်ဘက်ထဲထည့်လိုက်တာ အဲဒီတော့မှ အသင့်ပါလာတဲ့ဓားနဲ့ လည်ပင်းကိုထောက်ထားပြီး ကျွန်တော့်ပိုက်ဆံအိတ်ကို တောင်းတယ်။ နောက် ကျွန်တော့်ကောင်မလေးဆီက ပိုက်ဆံအိတ်တောင်းတယ်။ ၀တ်ထားတဲ့ ဆွဲကြိုး၊ လက်ကောက်မြင်သွားပြီး ကျွန်တော့်ကောင်မလေးရဲ့ ရွှေထည်ပစ္စည်းကိုလည်း ဓားနဲ့ ထောက်ပြီး ယူသွားတာ ဇူလိုင် ၅ ရက်နေ့ကပါ။ ရဲတိုင်ထားပါတယ်''ဟု ပြောသည်။

မိတ္ထီလာစီးပွားရေးတက္ကသိုလ်လမ်း၌ ညနေ ၅ နာရီတွင် နေ့စဉ်လိုလို လုယက်မှုများဖြစ်ပွားလျက်ရှိပြီး ယနေ့ အချိန်အထိ လမ်းမီးမရှိခြင်း၊ လုယက်မှုမှ ဓားပြတိုက်အနုကြမ်းစီးသည်ထိ ဖြစ်ပွားခဲ့သော်လည်း မြန်မာနိုင်ငံ ရဲတပ်ဖွဲ့အနေနှင့် ရဲအင်အားနည်းပါး၍ စီးပွားရေးတက္ကသိုလ်တက်ရောက်သူ ကျောင်းသူကျောင်းသားများ၏ အခက်အခဲကို လုံခြုံရေးမပေးနိုင်သဖြင့် ကျောင်းသူကျောင်းသားများ အခက်အခဲများစွာ ကြုံတွေ့နေရကြောင်း ရှင်းလင်းပြောကြားခဲ့သည်။

စိုင်းထူးခန့်
News Watch(စောင့်ကြည့်သတင်းဂျာနယ်)
https://www.facebook.com/NewsWatchJournal