ထီးခီးနယ်စပ်ဂိတ် ကိစ္စ ပြေလည်မှုရရှိ

တနင်္သာရီတိုင်းအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ အစည်းအဝေးကို ဇူလိုင်လ ၂ ရက်နေ့က မြိတ်မြို့မှာ ကျင်းပနေစဉ်။ Photo: Ayar Win/ Facebook

ထိုင်း - မြန်မာနယ်စပ်က ထီးခီးနယ်စပ်ဂိတ်နားမှာရှိတဲ့ KNU ဂိတ်စခန်းတစ်ခုကို အစိုးရတပ်မတော်က ဖယ်ရှား ခိုင်းထားတာနဲ့ပတ်သက်ပြီး ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ (JMC-S) ဆွေးနွေးပွဲမှာ ဒီနေ့ ညှိနှိုင်းရာ နှစ်ဘက်ပြေလည်မှု ရရှိသွားပါတယ်။

ထီးခီးနယ်စပ်ဂိတ် ပိတ်ခိုင်းတဲ့ကိစ္စက နားလည်မှုလွဲမှားခဲ့တာဖြစ်ကြောင်း တပ်မတော်ဘက်က ပြောကြားခဲ့တယ် လို့ ဆွေးနွေးပွဲကို တက်ရောက်ခဲ့တဲ့ ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲ စောင့်ကြည့်ရေး ကော်မတီ (JMC-S) အဖွဲ့ဝင် ကိုဧရာဝင်း က ပြောပါတယ်။

ပြီးခဲ့တဲ့ရက်ပိုင်းက တနင်္သာရီတိုင်းဒေသကြီး နယ်စပ်ရေးရာနဲ့ လုံခြုံရေးဝန်ကြီးက ထီးခီးနယ်စပ်မှာရှိတဲ့ KNU ဂိတ်စခန်းတစ်ခုကို ၃ ရက်အတွင်း ဖယ်ရှားခိုင်းထားတာဖြစ်ပါတယ်။

အဲ့ဒီကိစ္စနဲ့ပတ်သက်ပြီး နှစ်ဘက်ဆက်ဆံရေး အနည်းငယ် တင်းမာခဲ့ပေမယ့် မြိတ်မြို့မှာ ဒီနေ့ ကျင်းပတဲ့ တနင်္သာရီ တိုင်းအဆင့်  ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲစောင့်ကြည့်ရေး ကော်မတီ အစည်းအဝေးမှာ ပြေလည်မှု ရရှိတာဖြစ်ပါတယ်။

ထီးခီးနယ်စပ်ဂိတ်ကို ၂ဝ၁၃ ခုနှစ်က ဖွင့်လှစ်ပေးခဲ့တာဖြစ်ပြီး အဲ့ဒီဂိတ်ဟာ တနင်္သာရီတိုင်း ဒေသကြီးရဲ့ မြို့တော် ထားဝယ်ကနေ ကားနဲ့  ၄ နာရီလောက် သွားရင် ရောက်နိုင်တဲ့ ထိုင်း-မြန်မာနယ်စပ် ကုန်သွယ်ရေး လမ်းကြောင်းပေါ်မှာ ရှိတာဖြစ်ပါတယ်။

အဲ့ဒီလမ်းဟာ ထားဝယ်ရေနက်ဆိပ်ကမ်းကနေ ထိုင်းနိုင်ငံ ဘန်ကောက်အထိ သွားနိုင်ဖို့ ဖောက်လုပ်ထားတဲ့ ကားလမ်းလည်းဖြစ်ပြီး ထားဝယ်ကနေ နေ့စဉ်သွား လာနေတဲ့ ခရီးသည်တင်ယာဉ်တွေလည်း အများအပြား ရှိပါတယ်။

RFA Burmese
http://www.rfa.org/burmese/