လုံခြုံရေး တပ်ဖွဲ့ဝင်များထံမှ သေနတ် လုယူ၍ ကျည်ပေါက်ထွက်မှု ဖြစ်ပွား

နေပြည်တော် ဇွန် ၂၁

ကချင်ပြည်နယ် မြစ်ကြီးနားမြို့ ဗလမင်းထင် တံတားအနီး၌ ဇွန်လ ၂၀ ရက် ည၉ နာရီ ၄၅ မိနစ်ခန့်တွင် လူတစ်စုက တံတား လုံခြုံရေး ယူထားသော လုံခြုံရေး တပ်ဖွဲ့ဝင်များထံမှ သေနတ်လုယူစဉ် ကျည်ပေါက်ထွက်မှု ဖြစ်ပွားပြီး လူတစ်ဦးသေဆုံးခဲ့မှုနှင့် ပတ်သက်၍ လူမှု ကွန်ရက် စာမျက်နှာများတွင် သတင်း အမျိုးမျိုး ဖြစ်ပေါ်လျက် ရှိသည်။

ဖြစ်စဉ်အားစိစစ်ရာ ဇွန် ၂၀ရက် ည ၉ နာရီခန့်က မြစ်ကြီးနားမြို့နေ မောင်စီစာရပ် ၊ မောင်ဝင်းမျိုးသန့်၊ မနွေးနွေးနှင့် မနန်းလေးတို့ ၄ ဦးသည် ဆိုင်ကယ်ဖြင့် ၀ိုင်းမော်မြို့နယ် မိုင်းနားဘက်ခြမ်းမှ ဗလမင်းထင် တံတားအား ဖြတ်သန်း ပြီး မြစ်ကြီးနား ဘက်သို့ ပြန်လာစဉ် စီတာပူ ရပ်ကွက်သို့ အရောက် အမည်မသိ လူ ၈ ဦးက ၎င်းတို့ စီးနင်းလာသည့် ဆိုင်ကယ်အား လုယူရန် နှောင့်ယှက်သဖြင့် ၎င်းတို့မှ ဗလမင်းထင် တံတား လုံခြုံရေးဂိတ်သို့ ရောက်ရှိလာပြီး အကူ အညီ တောင်းခံခဲ့ရာ လုံခြုံရေး စစ်သည် ၂ ဦးမှ စိတ်ချရသည့် နေရာအထိ ပို့ဆောင်ပေးခဲ့ကြောင်း။

၎င်းလုံခြုံရေး စစ်သည် ၂ ဦး တာဝန်ကျ နေရာသို့ ပြန်လာစဉ် အမည်မသိ လူ ၈ ဦးက စစ်သည် ၂ ဦးအား လုံးထွေး ထိုးကြိတ်ခဲ့ပြီး သေနတ်အား လုယက်စဉ် စစ်သည် တစ်ဦး ကိုင်ဆောင်သော သေနတ်မှ ကျည်ပေါက်ထွက်ပြီး လူအုပ်စု အနက်မှ တစ်ဦးမှာ ကျည်ထိမှန် သေဆုံးခဲ့ပြီး ကျန်လူများ ထွက်ပြေး တိမ်းရှောင် သွားကြောင်း၊ စစ်သည် ၂ ဦးတွင်လည်း ဖူးရောင် ဒဏ်ရာများ ရရှိခဲ့ပြီး နယ်မြေ ခံတပ်၌ ဆေးကုသမှု ခံယူလျက် ရှိရာ လုပ်ထုံး လုပ်နည်းနှင့် အညီ ဆက်လက် ဆောင်ရွက် သွားမည် ဖြစ်ကြောင်း ကာကွယ်ရေး ၀န်ကြီးဌာနမှ သတင်းရရှိသည်။

MOI Webportal Myanmar
https://www.facebook.com/MOIWebportalMyanmar